فاريزا ايتقان ءبىر سىر

None
None
نۇر- سۇلتان. قازاقپارات - ەل ىشىندە مۇقاعالي مەن فاريزا تۋرالى كەيدە ءارتۇرلى اڭگىمەلەر ايتىلعان كەزدەر دە بولدى. ول - مۇقاعاليدىڭ فاريزاعا ارناپ جازعان «فاريزا قىز» ولەڭىنەن كەيىن ءوربىدى. بىرەۋلەر ايتتى:

- فاريزا مەن مۇقاعالي اراسىندا ماحاببات بولعان، - دەپ...

كەلەسى بىرەۋلەر ايتتى:

- بۇل اقىن قارىنداسىنىڭ ولەڭىن جانە ءور مىنەزىن باعالاعان مۇقاڭنىڭ ءبىر ساتكى «سەزىم نايزاعايى عوي»، - دەپ...

الگى ەكى پىكىرگە كەيبىرەۋى يلاندى، ال كەلەسى بىرەۋلەر ءورشىتىپ، وتقا ماي قۇيدى. شىنىندا، وسىنىڭ راسى قايسىسى ەدى؟

مەن كوڭىل- دارياسى ۇشان- تەڭىز وقىرمانعا فاريزا اقىننىڭ ءوز اۋزىمەن ايتقان مىنا شىندىعىن وزدەرىڭىزگە ۇسىنۋدى قالامگەرلىك پارىزىم دەپ ساناپ وتىرعان جايىم بار.

قازىرگى الماتى قالاسىنداعى جەلتوقسان مەن ماقاتايەۆ كوشەسى قيىلىسىنىڭ كۇنباتىس جاعىنداعى شاعىن ساياباقتا قازىر تۇرعان اقىن ەسكەرتكىشىنىڭ ورنىندا سوناۋ ءبىر زامانداردا سەلدەن قالعان 2-3 ۇلكەن قويتاس جاتاتىن. ارى- بەرى وتكەندە سول جەردى كورگەن مەن بەيباق : «شىركىن- اي! ءوزىنىڭ كوشەسىنىڭ بويىندا، مىنا ءداۋ تاستاردىڭ ورنىندا مۇقاعالي اعامنىڭ ەڭسەلى ەسكەرتكىشى تۇرار ما ەدى»، - دەپ ارماندايمىن عوي. وسى ويىمدى وبلىستىق «جەتىسۋ» گازەتىندە قىزمەت ىستەپ جۇرگەن كەزدىڭ ءبىر ءساتتى كۇنىندە سول كەزدە رەسپۋبليكالىق بالالار باسىلىمىنىڭ باس رەداكتورى فاريزا اپاما ايتىپ قالعانىم بار. ول كىسى مەن ايتقان الگى ورىندى شامالاعانىمەن، انىق بىلمەيدى ەكەن.

- سونى مۇمكىن بولسا بارىپ كورەيىكشى، - دەدى.

ارادا بىرەر كۇن وتكەننەن كەيىن كەزىندە تالاي باتىرلار مەن ءىرى تۇلعالاردىڭ ءمۇسىنىن سومداعان اۋىلداس ءارى ءىنى- دوسىم، ءمۇسىنشى قۇراقباي ەگىزبايەۆتىڭ ەسكى كوك «موسكۆيچىمەن» فاريزا اقىندى جەلتوقسان مەن ماقاتايەۆ كوشەسىنىڭ بويىنداعى الگى ساياباققا الىپ باردىق. مەن قيالىمداعى الگى ارمان- ويىمدى اقىن اپاما باستان- اياق ايتىپ جاتىرمىن:

- مىنا ءداۋ قويتاستاردىڭ ورنىندا مۇقاعالي اعامىزدىڭ ەڭسەلى ەسكەرتكىشى تۇرسا شىركىن! وبلىس اكىمى زامانبەكءنۇرقادىلوۆ - اعام بولعانىمەن، ماعان ول كىسىنىڭ ەسىگىن اتتاتا ما بەرگى جاعىنداعىلار؟ ءسىز باتىلدىق جاساپ، سول كىسىگە وسى ماسەلەنى ايتىپ كورسەڭىز قايتەدى؟ ءتيىستى ورىندارعا ۇسىنىسىن ايتسا، - دەيمىن ءوتىنىپ.

- بالا! قيالعا بەرگىسىز ارمانىڭ دا، پىكىرىڭ دە ورىندى. ءبىراق، - دەدى دە كۇلدى، - بۇرىن دا اعاڭ ەكەۋمىز جايلى وتقا ماي قۇيىپ جۇرگەن مىنا قازاقتار نە دەيدى؟ فاريزا مۇقاعاليعا ەسكەرتكىش قويۋ كەرەك دەپ جانىن سالىپ ءجۇر ەكەن دەمەي مە؟ ... - تاعى دا كۇلدى.

- سەن انا باۋىرلارىڭا ءتۇسىندىر! سولاردىڭ كەيبىرەۋلەرى ايتىپ جۇرگەنىندەي، مەن - مۇقاعاليعا، ءيا بولماسا، ول - ماعان عاشىق بولعان ەمەس. مەنىڭ جازىعىم - مۇقاڭنىڭ شىن اقىن ەكەنىن تانىپ، باسىمدى يگەنىم. سەنىڭ اعاڭنىڭ جازىعى - تاعدىرى قىزىق مەن سەكىلدى جالعىزباستى اقىن قىزدىڭ پوەزياسىنان ءۇمىت كۇتىپ، باعالاعانى. سەن ءوزىڭ قالاي قارايسىڭ بۇعان؟ - دەپ ءوزىنىڭ مىنەزىندەگى سىناي قاراپ تۇرىپ، كەكەسىندەۋ كۇلەتىن كەلبەتىنە وتكىر جانارى قوسىلىپ، جالت ەتە قالدى...

الگى جەردەن قۇراقبايدىڭ ەسىگىن جىپپەن تارتىپ جاباتىن ەسكى كوك «موسكۆيچىمەن» رەداكسياعا قاراي قايتىپ كەلەمىز. مانادان بەرى ۇندەمەي وتىرعان فاريزا اپامىز كەنەت مىرس ەتىپ كۇلدى دە:

- الگىندەي وسەكتىڭ شىعۋىنا ەڭ الدىمەن اعاڭنىڭ ماعان ارناعان ولەڭى سەبەپ بولدى- اۋ دەيمىن. ايتپاقشى، ءوزىم دە وڭبايمىن... رەداكسيانىڭ تومەنگى قاباتىندا تەرەزەگە سۇيەنىپ، قۋ شاراپتىڭ اسەرىنەن اۋىرلاڭقىراپ تۇرعان مۇقاڭا تۇسكى ۇزىلىسكە بارا جاتقان جاقىن تانىستارىنىڭ دا قاراماعانىنا، ەشكىم ول كىسىگە نازار سالماعانىنا نامىسىم كەلىپ، ۇيىنە جەتكىزەيىن دەگەن ويمەن قىزمەت كولىگىمە سالىپ الىپ نەم بار ەدى؟ اعالارىڭ قاتتى شارشاڭقى... ۇيىنە جاقىنداعان ساتتە ءسال ەسىن جيعان ول ماعان قاراي بۇرىلىپ:

- ءاي بالا! - دەدى. - ءشول قىسىپ بارادى. ءبىر شولمەك قىزىل الدىرشى، - دەگەن سوڭ ورىس شوپىردى جۇمساپ، تاپسىرماسىن ورىندادىم. ءۇيىنىڭ الدىنا كەلگەن سوڭ، جۇرگىزۋشىمە «انا كىسىنى ۇيگە كىرگىز» دەپ ءوتىنىش ايتقانىمدا مۇقاڭ:

- جوق! سەن ءوزىڭ تابىستايسىڭ جەڭگەڭە! - دەدى ساڭق ەتىپ. مۇزداعان تورعايداي بولعان مەن بايعۇس ونىڭ قولتىعىنان ۇستاپ ۇيىنە قاراي سۇيەمەلدەپ كەلەمىن. ءبىر قولىمدا الگىندە شوپىرعا العىزعان تور سەتكاداعى قىزىل اراق. ءبىرىنشى قاباتتاعى ءۇيىنىڭ قوڭىراۋىن ءوزى باستى. ار جاقتان كوڭىلسىز كەيىپتە ءوڭى كوكشىل تارتقان جەڭگەمىز لاشىن شىقتى. جاقتىرىڭقىراماي قارادى. قاتتى ىڭعايسىزداندىم. سوندا مۇقاڭ قايتتى دەيسىڭدەر عوي؟

- ءاي، لاشىن! الگى مەن ايتىپ جۇرگەن بالا وسى. ءبىلىپ ال! - دەدى. نەگە ولاي ايتتى؟ ... ءۇرپيىپ ۇيىنە دەيىن مەن نەگە كەلدىم؟. «اقىماق شىعارمىن؟!» دەدىم ىشتەي وزىمە- ءوزىم. جازىعىم - اعالارىڭدى كوشەگە تاستاپ كەتە الماعانىم. اقىماقتىعىم - قىز بالا باسىممەن الگىندەي جاعدايداعى اقىندى تۋرا ەسىگىنە دەيىن جەتەلەپ اكەلگەنىم عوي. مىنا ەلدىڭ مۇقاڭ ەكەۋمىز جايلى وسەگىنىڭ ءبىر ۇشى وسىندا دا جاتقان شىعار دەپ ويلايمىن كەيدە. وبالى نە كەرەك، لاشىن جەڭگەم ارتىق ءسوز ايتقان جوق،.. - دەپ كوڭىل تۇپكىرىندە جاتقان سىرىن فاريزا اقىننىڭ جاسىرماي ايتقان سول ءبىر ءسوزى «ول دۇنيەدەن ءوتتى!» دەگەن سۋىق حاباردى ەستىگەن ساتتە كوز الدىما الگىندە عانا بولعانداي ەلەستەر اكەلدى...

«ءوتتى داۋرەن وسىلاي» دەپ ديماش قونايەۆ اكەمىز ايتقانداي، انە، ءوتتى ەكەۋى دە ومىردەن... كەتتى مىنا جارىق جالعاننان.

ايتاقىن ءابدىقال، قازاقستان جازۋشىلار وداعىنىڭ مۇشەسى، اقىن،

مۇقاعالي ماقاتايەۆ اتىنداعى سىيلىقتىڭ لاۋرەاتى.

http://almaty-akshamy.kz


سوڭعى جاڭالىقتار