كوكشەتاۋدىڭ ىرگەسىندە بوي كوتەرگەن «نۇرلى كوش» اۋىلى

استانا. قازاقپارات - ەلباسى نۇرسۇلتان نازاربايەۆ رەسپۋبليكا حالقىمەن ءداستۇرلى تىكەلەي سۇحبات بارىسىندا ەلگە ورالعان قانداستارىمىز، ولارعا جاسالىپ جاتقان قامقورلىق جونىندە ايتا كەلىپ، ءبىرقاتار وبلىستاردا بوي كوتەرگەن جاڭا اۋىلدار تۋرالى ايتقان ەدى.

 سونداي ەلدى مەكەندەردىڭ ءبىرى وبلىس ورتالىعىنىڭ ىرگەسىندە بوي كوتەرىپ، تىرشىلىك تامىزدىعىن مازداتىپ وتىر.

«ەلگە ەل قوسىلسا - قۇت» دەيدى حالقىمىز. قازاقستان تاۋەلسىزدىگىنىڭ باستى قۇندىلىعى دا وسىندا. كوك بايراعىمىز جەلبىرەگەن العاشقى كۇننەن باستاپ تالايلى تاعدىر جەتەگىندەگى قانداستارىمىز تاريحي وتانىنا ورالا باستاعانى عانيبەت. قازىر ولار وبلىستا توعىز مىڭ وتباسىنا تاياپ قالدى. ۇلى كوش ءالى دە جالعاسۋدا. ولارمەن بىرگە جاڭا لەپ، جاڭا رۋح كەلگەنىن كورىپ تە ءجۇرمىز. ءبىر عانا مىسال ايتساق، زەرەندى اۋدانىنداعى ۆودوپيانوۆ سەلوسىنا شوعىرلانعان باۋىرلارىمىز اۋىلعا اقادىر دەگەن ادەمى ات بەرىپ، وزدەرى دە ادەمى تىرشىلىك كەشىپ جاتىر. قازىر اقادىر وبلىستاعى ۇلگىلى ەلدى مەكەندەردىڭ قاتارىندا.

سونداي- اق، ەسەلى ەڭبەگىمەن، كورگەندى تالىمىمەن ەل ابىرويىن اسىرىپ جۇرگەن قانداستارىمىز دا كوپ. ولاردىڭ قاتارىنا كوكشەتاۋ مەملەكەتتىك ۋنيۆەرسيتەتىندە قىزمەت اتقاراتىن اۋىل شارۋاشىلىعى عىلىمدارىنىڭ دوكتورى ءابىلجان قۇسايىنوۆتى، جانايدار مۋسين اتىنداعى قازاق پەداگوگيكالىق كوللەدجىنىڭ وقىتۋشىسى، سازگەر قۇرمەت ساحايدى، مەديتسينا عىلىمدارىنىڭ كانديداتى، قالالىق ەمحانانىڭ دارىگەرى ايگۇلىم تەمىروۆا جانە باسقالاردى قوسۋعا بولادى.

ەلباسىمىز نۇرسۇلتان نازاربايەۆ ۇلى كوشكە قاتىستى قامقورلىق شەڭبەرىن كەڭەيتە ءتۇسۋدى تاپسىرسا، ونىڭ يگى ناتيجەلەرى قازىردىڭ وزىندە كورىنىس بەرۋدە. قۇتتى قادامنىڭ ۇلگىسى رەتىندە كوكشەتاۋدىڭ ىرگەسىندە زاماناۋي تۇتاس اۋىلدىڭ بوي كوتەرگەنىن ايتۋعا بولادى. قازىرگى كۇنى ەڭسەسى بيىك ەلدى مەكەنگە اينالعان اۋىلدىڭ العاشقى 30 وتباسىنا پاتەر كىلتتەرىن تاپسىرۋ سالتاناتىنا قاتىسقانىمىز بار. وعان قىرعىزستان، وزبەكستان، رەسەي، قىتاي، موڭعوليا، تاجىكستان مەن تۇركىمەنستاننان ورالعان قانداستارىمىز قونىستاندى. قۋانىش يەلەرى اتىنان قىتايدان ورالعان باۋىرىمىز تۇردىبەك سۇلتان العىس سەزىمدەرىن جەتكىزدى. سالتانات سوڭى شاشۋ جورالعىسىمەن، كونسەرتتىك باعدارلامامەن جالعاسقان ەدى.

كوكشەنىڭ بۇگىنگى قوناقتارى اۋىلدى الاقاي كوڭىلمەن ارالاپ جۇرەتىنىنىڭ تالاي مارتە كۋاسى بولدىق. ارقانىڭ كەڭ قولتىعىنا قوناقتاعان اق شاعالا قونىس بەس- اق ايدا بوي كوتەردى دەگەنگە سۇيسىنە ءارى تاڭدانا قول سوعادى حالىق. مەملەكەت باسشىسىنىڭ باستاماسىمەن ومىرگە كەلگەن «نۇرلى كوش» باعدارلاماسىنىڭ الەۋەتى وسىناۋ ەلدى مەكەننىڭ سالتاناتىنان كورىنىس بەرەدى. جالپى اۋماعى 20,7 مىڭ شارشى مەتردى الىپ جاتقان 138 ەكى پاتەرلى ۇيدە قانداستارىمىزدىڭ 276 وتباسى ءتۇتىن تۇتەتۋدە. جاڭا پاتەرلەر جارىق پەن سۋ، جىلۋ جۇيەلەرىمەن قامتىلعان. ىستىق سۋ «اريستون» تۇرىندەگى يتاليالىق قوندىرعىنىڭ كۇشىمەن بەرىلەدى.

«ءبىز مۇنى اتالىق قامقورلىق دەپ بىلەمىز، - دەيدى تاشكەنت قالاسىنان كەلگەن قارىنداسىمىز ءداميرا جاحانوۆا. - كۇيەۋىمىز ەكەۋمىز جۇمىسقا ورنالاستىق. كەڭسارايداي (75 شارشى مەتر) ءۇي بولىنگەنىنە قۋانىشتىمىز. الدىندا ۋادە ەتىلگەنىندەي، «نۇرلى كوشكە» اۆتوبۋس قاتىناپ، الەۋمەتتىك نىساندار كەزەگىمەن كوبەيىپ كەلەدى» .

 

باقبەرگەن امالبەك،

«ەگەمەن قازاقستان»