ارايلىم مۇراتاليەۆا: قازىرگى اقىنداردىڭ «ويعا قونىمسىز» تىركەستەرى جاڭاشىلدىق پا، الدە ەلىكتەۋشىلىك پە؟
***
قازىرگى جاس اقىنداردىڭ ولەڭدەرىندە كەزدەسەتىن «ويعا قونىمسىز» تىركەستەر جاڭاشىلدىق پا، الدە ەلىكتەۋشىلىك پە؟ «شاعىلعان تەرەزە» اتتى ولەڭدە اۆتور نە ايتقىسى كەلدى؟
«ولىك كوزىن باجىرايتىپ قاراڭعى،
ايدىڭ ۇزىن تىرناعىنا تالاندى.
تەرەزەمنىڭ الدىنا كەپ الگى قىز،
مەنىڭ مىلقاۋ كوزدەرىممەن تاراندى» - دەگەن شۋماقتاعى «مىلقاۋ كوز» تىركەسى ورىنسىز قولدانىلعان دەپ ويلايمىن. مۇنى وزگە دە وقىرماننىڭ قۇپتامايتىنى انىق. كەلەسى ولەڭنىڭ شۋماعىنا كەزەك بەرسەك:
قوڭىر كەش، كۇز كەشى، سيدا تەرەكتەر،
قىزداردىڭ كۇلكىسى قۇلاقتا گۇلدەگەن.
كوشەنى كەزىپ مايدا جەل وپكەن،
كوزىمدە - كۇلكى، جۇرەكتە - دۇربەلەڭ...
وسىنداعى «قىزداردىڭ كۇلكىسىن قۇلاقتا گۇلدەتكەنى» ادەمى ءارى لوگيكاعا سىيعانىمەن، قايتالاۋ بايقالىپ تۇر. «كوزىمدە - كۇلكى، جۇرەكتە - دۇربەلەڭ...» - دەگەن جولدارىنان-اق اقىننىڭ شىنايىلىعىن بايقاۋعا بولادى. دۇربەلەڭ اقىننىڭ عانا ەمەس، ءاربىر ادامنىڭ جۇرەگىندە بارى جاسىرىن ەمەس. «سوڭعى كوش» ولەڭىنەن ۋاقىتقا دەگەن رەنىش بايقالادى.
«ارعىماق جىلقىلار سوڭعى رەت ارقىراپ،
كوكجيەك جۇزىندە بولمىستىڭ بوياۋى قالتىراپ...
سوڭعى كوش ءوتتى...» - دەيدى. وتكەنى دە وتىرىك ەمەس. «ءۇرىمجى كوشەسى» دەپ باستالاتىن ولەڭىندە جۇرەگىندەگى ساعىنىشىن، شىندىعىن سول كۇيىندە نازىك جەتكىزە العان.
«بايلانعان بالالىق ارمان،
قوس جۇرەك ىزدەدى، كۇتتى.
مەن ەمەس جوعالتىپ العان،
ءۇرىمجى تۇمانى جۇتتى...»- دەي كەلە بار كىنا «ءۇرىمجى تۇمانىنا» ارتىلدى...
جالپى، بۇل اقىننىڭ جىرلارىنان جىلىلىق پەن قاتار ساعىنىشتىڭ سالقىن سامالى ەسەدى. قالامگەرگە باي، وقىرمانعا ساراڭ كەزەڭدە عۇمىر ءسۇرىپ ءجۇرمىز دەگەن وي كوپتىڭ كوكەيىندە. تالعامى تومەن اقىننان مىقتى دۇنيە شىقپاسى انىق. ال تالعامدى وسىرۋگە نە كەدەرگى؟ ءسىز اقىنسىز با؟ بۇل سۇراققا ۋاقىت ءوزى جاۋاپ بەرە جاتار... ال اۆتورعا بيىكتىك تىلەيمىن!
