وليمپياداعا قاتىسقان تۇڭعىش قازاق قىزى شەتتەگى قانداستار اراسىنان شىققان

نۇر- سۇلتان. قازاقپارات - موڭعولدىڭ ۇلانباتىر قالاسىندا تۇراتىن الدانىش رامازان قىزى دەيتىن اپامىز بار. وسى كىسى دۇنيەجۇزىندەگى قازاق قىزدارىنىڭ ارسىنان وليمپيادا ويىندارىنا قاتىسقان تۇڭعىش سپورتشى ەكەن.

ريو وليمپياداسىنىڭ باستالۋىنا ساناۋلى عانا كۇندەر قالدى. وسى ورايدا تاريحقا كوز جۇگىرتىپ، سپورتتىڭ تورەسى اتانعان وسىنداي ءىرى دوداعا «تۇڭعىش» قاتىسىپ، ەسىمىن التىن ارىپتەرمەن جازىپ قالدىرعان قازاق بالاسى تۋرالى ايتۋ، وقىرماندار نازارىنا ۇسىنۋ ارتىقتىق ەتپەيتىنى انىق.

الدانىش اپامىز جالىنداپ تۇرعان جاس كەزىندە موڭعولياداعى جەڭىل اتلەتيكادان ءوزى ورناتقان رەكوردتى 30 رەت ءوزى جاڭعىرتىپتى. بۇل كەز كەلگەن سپورتشىنىڭ قولىنان كەلە بەرمەيتىن ۇلكەن ەرلىكتەردىڭ ءبىرى.

الدانىش اپامىزدىڭ سپورتتاعى جولى، جەتىستىكتەرى جانە ۇلكەن سپورتتان كەتكەننەن كەيىنگى ءومىرى تۋرالى وسىعان دەيىن ب ا ق بەتتەرىندە بەلگىلى جۋرناليست بەكەن قايرات ۇلى ءبىراز ماتەريالدار جاريالادى.

شاشاسىنا شاڭ جۇقپاعان قازاقتىڭ جەلاياق قىزى الدانىش رامازان قىزى 1964-جىلى توكيو وليمپياداسىنا قاتىسقان العاشقى قازاق قىزى. ول بۇگىندە ءوزى تۋىپ-وسكەن موڭعوليانىڭ ۇلانباتىر قالاسىندا تۇرادى. كەزىندە تالاي جارىستا تىلەۋلەس بولعان سپورتسۇيەر قاۋىم ونى «جەڭىل اتلەتيكانىڭ حانشايىمى» دەپ اتاعان ەكەن.

بەكەن قايرات ۇلىنىڭ مالىمەتتەرىنە سۇيەنسەك، جەلاياق قىز «ۇلانباتىر قالالىق 18№ ورتا مەكتەپتە وقىپ جۇرگەن كەزىندە-اق جۇگىرۋدەن الدىنا جان سالماپتى. ونى بايقاعان سول كەزدەگى يۆانوۆ دەگەن باپكەر 6-سىنىپتىڭ وقۋشىسىن جەڭىل اتلەتيكا سەكتسياسىنا قابىلداپتى. كەشىكپەي تالانتتى قىز ۇلتتىق قۇرامانىڭ ساپىنان ءبىر-اق شىعادى. بۇل 1961-جىل ەدى.

1962-جىلى موڭعول ەلىنىڭ تاريحىندا العاش رەت بۇكىل حالىقتىق سپارتاكيادا وتەدى. وسى سىندا 16 جاستاعى الدانىش 200 مەتر قاشىقتىققا 26,6 سەكۋند، 400 مەترگە 58,8 سەكۋند، 800 مەترگە 2 مينۋت 18,7 سەكۋندتا جۇگىرىپ ءوتىپ، ەل رەكوردىن جاڭارتقان. بۇل - بۇرىن-سوڭدى بولماعان عاجاپ جەتىستىك ەدى»، دەپ جازادى جۋرناليست.

ءبىر قىزىعى وسى الدانىشتىڭ 800 مەتر قاشىقتىققا توقتاتقان رەكوردىن 1984-جىلى تاعى ءبىر قازاق قىزى موڭعوليا مەملەكەتتىك ۋنيۆەرستەتتىڭ تۇلەگى كۇشاي قۇلىبەك قىزى جاڭارتىپتى.

الدانىش رامازان قىزى - جەڭىل اتلەتيكادان سپورت شەبەرى، موڭعوليا اتىنان وليمپيادا ويىندارىنا قاتىسقان تۇڭعىش قازاق قىزى، موڭعولياداعى قازاق دياسپوراسىنان شىققان العاشقى سپورت شەبەرى.

ەندى الدانىش رامازان قىزىنىڭ ءومىرى مەن سپورتتاعى جەتىستىكتەرىنە قىسقاشا توقتالىپ وتەيىك:

1945-جىلى موڭعوليانىڭ بايان- ولگەي ايماعىندا دۇنيەگە كەلگەن. 1965-جىلى مەديتسينا تەحنيكۋمىن، 1972-جىلى مەملەكەتتىك دەنە شىنىقتىرۋ سپورت ينستيتۋتىن بىتىرگەن.

1964-جىلى توكيو وليمپياداسىنا قاتىسقان جەڭىل اتلەت، 1972-2005-جىلدار ارالىعىندا ۇلانباتىر قالالىق 22№ ورتا مەكتەپتە سپورت مۇعالىمى قىزمەتىن اتقاردى. قازىر زەينەتتە.

ون ەكى دۇركىن چەمپيوندىق تۇعىرعا كوتەرىلگەن، شاشاسىنا شاڭ جۇقپاعان جەلاياق.

ول 1961-جىلدان باستاپ، 1969-جىلعا دەيىن ۇلتتىق قۇرامادا ونەر كورسەتكەن.

جەلاياق سپورتشى 1961-جىلى ماسكەۋدە وتكەن «پراۆدا» گازەتى اتىنداعى جانە اعايىندى زنامەنسكييلەر اتىنداعى جارىستارعا قاتىسىپ جۇلدەلى ورىنعا يە بولدى. 1966-جىلى تاۋلى التاي ولكەسىندە وتكەن موڭعول - كەڭەس ەلدەرىنىڭ ستۋدەنت- جاستار فەستيۆالىنا قاتىسىپ، جۇگىرىستەن التىن مەدالعا قولى جەتكەنى بار. رەسپۋبليكالىق قۇرامادا جۇرگەن جىلدارى ازەربايجان استاناسى باكۋدە وتكەن حالىقارالىق تۋرنيردەن اكەلگەن كۇمىس مەدالى - موڭعوليانىڭ جەڭىل اتلەتيكا سپورتىنىڭ تاريحىندا حالىقارالىق جارىستان اكەلگەن تۇڭعىش مەدال رەتىندە سپورت تاريحىنا تىركەلىپتى.

موڭعوليادا باسقاداي سپورت تۇرلەرى، سونىڭ ىشىندە جەڭىل اتلەتيكا دامىپ، كەمەلدەنە قويماعان 1964-جىلى جاپونيانىڭ استاناسى توكيوداعى وليمپيادا دا الدانىشتىڭ كورسەتكەن ناتيجەسى جامان ەمەس ەدى.

ول ايەلدەر اراسىنداعى 400 مەترلىك قاشىقتىققا قاتىسقان 68 جۇيرىكتەن 20-شى، 800 مەترلىك قاشىقتىققا قاتىسقان 75 سپورتشىدان 22- ورىنعا يە بولىپتى. الەمنىڭ 70-80 ەلىنىڭ تاڭداۋلى جۇيرىك قىز-كەلىنشەكتەرى قاتىسقان مۇنداي دودادا العاشقى جيىرمالىقتان كورىنۋ ەكىنىڭ ءبىرىنىڭ قولىنان كەلە قويماسى انىق.

ونىڭ شاكىرتتەرىنەن كوپتەگەن مىقتى سپورتشىلار شىعىپتى. ءتول شاكىرتى مەملەكەتتىك پەداگوگيكالىق ۋنيۆەرسيتەتتىڭ وقىتۋشىسى، سپورت شەبەرى ۇرتناسىن دەگەن قىز الدانىشتىڭ ءوزى توقتاتقان 400 مەتر قاشىقتىقتىق رەكوردىن بۇزىپتى.

الدانىش اپامىز مونعوليا مەملەكەتتىك جوعارى ناگرادا «التىن جۇلدىز» وردەنىنىڭ يەگەرى. «حالىققا ءبىلىم بەرۋ ءىسىنىڭ وزات قىزمەتكەرى»، «موڭعوليا سپورتىنىڭ ۇزدىگى» قاتارلى اتاقتارى بار.

اۆتور: كۇنسۇلتان وتارباي. 2016- جىل