شەراعاڭنىڭ ۋىتتى سول ءبىر ءسوزى- اي
ا ق ش مەملەكەتتىك حاتشىسىنىڭ ءوزى توتە باسشىلىق جاسايتىن حالىقارالىق دامۋ جونىندەگى اگەنتتىك (USAID) ماسكەۋ شاھارىندا ب ا ق قۇرالدارى وكىلدەرىمەن الەمدىك دارەجەدەگى ءبىر عاجاپ كاسىبي سىرلاسۋ - سەمينار- ترەنينگ وتكىزدى. وعان بۇرىنعى وداقتاس رەسپۋبليكالار اراسىنان تۇرىكمەنستان، مولدوۆا مەن بالتىق جاعالاۋى مەملەكەتتەرىنەن باسقا بارلىق رەسپۋبليكالار وكىلدەرى قاتىستى. باس مودەراتور - سەمينار- ترەنينگكە شىعارماشىلىق تۇرعىدان «تۇزدىق» بولۋى ءۇشىن، جيىنعا قاتىسۋشى ءار رەسپۋبليكادان تانىمال قوعام- مەملەكەت قايراتكەرلەرىنىڭ قازىرگى ب ا ق تۋرالى ايتقان ءبىر- ءبىر اۋىز قاناتتى ءسوزى قاجەت دەگەن ءوتىنىش ايتىپتى.
«ەگەمەننىڭ» 5-قاباتىندا (الماتى) ارقالى اقىن ايان اعا (نىسانالين) ەكەۋى ءۇندىنىڭ شي قامىسىنىڭ ءتۇتىنىن باياۋ بۇرقىراتىپ قويىپ، اڭگىمەلەسىپ وتىرعان ساتىندە شەراعانىڭ اۋزىنان بەينەكامەراعا جازىپ العان ءبىر ويلى ءسوز ەسىمە ساپ ەتە ءتۇستى. «بۇگىنگى ب ا ق- تىڭ كۇش- قۋاتىنىڭ ولشەمى جەردىڭ تىنىندە وراسان تەكتونيكالىق جارىلىس جاسايتىن ءزىلزالادان دا، جالىنى الاپات ورتتەن دە، جولىنداعىسىن جايپاپ وتەتىن تاسقىندى سەلدەن دە اسىپ كەتتى...» دەگەن ەدى- اۋ سوندا ءسوز زەرگەرى شەراعام، قالامنىڭ كۇشى تۋرالى قۇشىرلانا تەبىرەنىپ! «ۇرىستا تۇرىس جوق» ، تەز ارادا ابىزدىڭ سول ايتقاندارىن اينا- قاتەسىز «بۋىپ- ءتۇيىپ» ، ەلەكتروندى پوشتامەن ماسكەۋ اسىرىپ جىبەردىم.
جيىننان ورالعان ءبىزدىڭ Internews Network-قازاقستان - حالىقارالىق جاڭالىقتار جەلىسى (ا ق ش) ۇيىمىنىڭ دەلەگاتسياسى شەرحان مۇرتازا اعامىزدىڭ اتىن اۋىزدارىنان نەشە كۇن تاستاماي ايتىپ ءجۇردى! الماتىلىق ارىپتەستەردى سونداعى جەلپىندىرگەنى - شەرحان مۇرتازانىڭ الگى ءسوزى قازاق، ورىس، اعىلشىن تىلدەرىندە جازىلىپ، ۇلكەن زالدىڭ كۇللى قابىرعاسىن الىپ، سەمينار بىتكەنشە شامشىراقتاي جارقىراپ ءىلىنىپ تۇرعانى ەكەن...
***
شەراعاڭنىڭ جاسى بيىل تاياۋ كۇزدە 84 كە تولادى.
قولىنا قالام ۇستاماعانى بولماسا، تىڭ. باقۋات. الماتىدا تۇرىپ جاتىر. بۇقارالىق اقپارات قۇرالدارى سالاسى قىزمەتكەرلەرى كۇنى قارساڭىندا «ەگەمەن قازاقستان» گازەتىنىڭ بۇرىنعى باسشىسى، قازاقستاننىڭ حالىق جازۋشىسى، قازاق جۋرناليستيكاسىنىڭ اقساقال- ابىزى شەرحان مۇرتازانى گازەتتىڭ الماتى بولىمشەسىنىڭ قىز- جىگىتتەرى قۇتتىقتاپ بارىپ، گۇل شوقتارىن ۇسىنىپ، بەتىنەن ءسۇيىپ، باتاسىن الىپ قايتتى. گازەت باسشىسىنىڭ ارنايى بۇيرىعىنا ساي تاعايىندالعان سىياقى تاپسىرىلدى. قارت قالامگەر ءوز تاراپىنان ءىزباسار ارىپتەستەرىنە شىن جۇرەكتەن العىسىن ايتتى.
تالعات ءسۇيىنباي،
«ەگەمەن قازاقستان»
الماتى
