سويلەمدى قۇراۋ - جاننىڭ ءۇنى، جۇرەكتىڭ ءلۇپىلى - جازۋشى روزا مۇقانوۆا

استانا. قازاقپارات - ول جان ەركىندىگىن بارىنەن جوعارى قويادى.

ءوز زاتىنا مامان دەپ ەمەس، ايەل دەپ قارايتىندارعا سۋرەتكەردىڭ كۇش- قۋاتى تەك جازعان شىعارماسى، جاساعان وبرازدارىنان عانا كورىنەتىنىن الدەقاشان دالەلدەگەن.

قالامگەر ادەبيەتتە، ونەردە جۇرگەن نازىكجاندىلاردىڭ جاۋاپكەرشىلىكتى مويىنعا قامىت ەتىپ كيەتىنىن مويىندايدى. الايدا ول ءوزىن قامىت كيىپ ءجۇرمىن دەپ ەمەس، القا تاعىپ ءجۇرمىن دەپ ەسەپتەيدى.

ويتكەنى ءومىرىن جازۋسىز ەلەستەتىپ كورمەگەن. شىعارماشىلىقتىڭ ازابىنان گورى ءلاززاتى كۇشتىرەك دەپ بىلەتىن بەلگىلى جازۋشى، دراماتۋرگ روزا مۇقانوۆامەن اڭگىمەلەسكەننەن كەيىن ءبىزدىڭ دە ءوز ىسىمىزگە كوزقاراسىمىز وزگەرگەندەي. ادەبيەت پەن ونەردىڭ، جالپى قازاق رۋحانياتىنىڭ بۇگىنگى جاي- كۇيى قاۋزالعان سۇحباتتى وقىرمان نازارىنا ۇسىنىپ وتىرمىز.

- «سۋرەتكەرگە مىنەز، تاعدىر، ءومىربايان كەرەك» دەگەن ەكەنسىز. ءبىراق سۇحباتتارىڭىزدا ءوز ءومىربايانىڭىزدى ساراڭ ماعلۇماتتايسىز. روزا مۇقانوۆانىڭ قولىنا قالام ۇستاتقان قانداي قۇبىلىس، نەندەي وقيعالار ەكەنىن بىلۋگە وقىرماندارىڭىزدىڭ قاقىسى بار دەپ ويلايمىز...

- سۋرەتكەردىڭ شىعارماشىلىعىنان ونىڭ ءومىربايانى سىر بەرىپ جاتادى. اباي «ولەڭ شىركىن وسەكشى جۇرتقا جايار» دەيدى. دەمەك ىشكى كۇي، ءومىر، تاعدىر، كوزقاراس جىمداسىپ بارىپ جارىققا شىعادى، شىعارماعا ارقاۋ بولادى. ءسۇيىنىش پەن كۇيىنىشتىڭ، باق پەن سوردىڭ، مۇڭ مەن زاردىڭ نە ەكەنىن بىلمەگەن ادام سۋرەتكەر بولا الا ما؟ مۇنداي باياندى باستان وتكەرە الماعاننىڭ سۋرەتكەرلىكتە تاجىريبەسىزدىگى، تايازدىعى، جۇتاڭدىعى كوزگە ۇرىپ تۇرادى.

م. اۋەزوۆتە عاجاپ ءومىربايان بولدى. ايتپەسە «اباي» جازىلار ما ەدى. ماعجان اقىندى الىڭىز، تاعدىرى ەرەكشە. ماعجان تاتار قىزى گۇلسىم حانىمعا ەسسىز عاشىق بولماسا، اقان سەرىنىڭ جامالعا عاشىق كۇيىنە سونشاما تەرەڭدەپ بارا الار ما ەدى. اقان سەرىنىڭ جان دۇنيەسىمەن ۇندەسەر مە ەدى. اقاندى ەركىندىكتىڭ تورىنە ماعجان شىعارا الدى.

سەبەبى ماعجاننىڭ ارمانى جان ەركىندىگى بولاتىن. سۋرەتكەر كەيىپكەر جاسايدى. قيالدان گورى ءومىر قالتارىستارى سۋرەتكەردى شىنىقتىرىپ، تەرەڭدىككە جەتەلەيدى. مۇنى كورمەگەن جازۋشىنىڭ شىعارماشىلىعى وقىرمانىن سەندىرە الا ما. ەلىكتەپ- سولىقتاۋدان ارىگە اسا المايدى. سويلەمدى قۇراۋ - جاننىڭ ءۇنى، جۇرەكتىڭ ءلۇپىلى. جان باي بولۋى كەرەك. جاننىڭ باي بولۋى ءومىردى تانىپ بىلۋىندە، ءومىربايانىنىڭ قۇنارلى، كۇردەلى بولۋىندا.

ءوز باسىم بالا كۇنىمدە ۇلكەندەردىڭ اڭگىمەسىنە كوبىرەك قۇلاق قويىپ ءوستىم. ولاردىڭ ءومىر جولىن، باستان وتكەرگەن اشتىعىن، قۋعىن- سۇرگىنىن بۇگىنگىلەردەي اقپارات قۇرالدارىنان وقىپ بىلگەن جوقپىن. ءوز اۋزىنان تىڭداپ، قانىعىپ ءوستىم. ءارقايسىسىنىڭ عاجاپ تاعدىرلارىن ەستىپ، سولاردىڭ مۇڭىنا ورتاقتاستىم. بۇگىندە ولاردىڭ ءىزىن دە تاپپايسىز. ونداي اڭگىمەشى قارت بۇگىندە كەزدەسپەيدى. ولار ءتىرى تاريح، جاندى كەيىپكەر بولاتىن. بالا ساناما ماڭگىلىك سۋرەت سالىپ كەتكەن دە سولار.

- جۋىردا قاللەكي تەاترى(استاناداعى قاليبەك قۋانىشبايەۆ اتىنداعى تەاتر) «سارراڭىزدى» ساحنالادى. پرەمەرا كۇنى باس قالاعا جەتە المادىق، اماندىق بولسا، قويىلىمدى ارنايى بارىپ كورۋدىڭ ءساتى تۇسەر. قاتەلەسپەسەك، گۇلسينا مەرعاليەۆا - ءسىزدىڭ شىعارماڭىزدى ساحنالاعان العاشقى ايەل رەجيسسەر. ەرلەردىڭ ءوزى كوتەرە المايتىن كەي جۇكتى وڭگەرىپ جۇرگەن قوس سۋرەتكەردىڭ تاندەمى ءساتتى بولدى ما؟

- مەن ونەردى جىنىسقا بولۋدەن اۋلاقپىن. ايەل رەجيسسەر، ايەل اقىن، ايەل جازۋشى، ايەل دارىگەر دەگەن ۇعىمنان ءبىزدىڭ ۇلت ارىلا الماي كەلەدى. مامان دەپ قاراعان ءجون بولار. وسى تۇرعىدا گۇلسينا مەرعاليەۆانى كاسىبي مامان دەپ تانيمىن. ءوز كوزقاراسى، تالعامى، ونەر الەمىندە ءوز قولتاڭباسى بار رەجيسسەر. بۇل كىسىنى تەاتر باسشىلارى «سارراعا» ارنايى شاقىرتتى. اۆتور مەن رەجيسسەر ءبىرىن- ءبىرى تۇسىنسە عانا سپەكتاكل ءساتتى شىعادى. جۇرتتىڭ قابىلداۋى جامان ەمەس سياقتى، كورەرمەن ءبىر ءسات ويلانىپ قالعانداي بولدى.

- كەزىندە فاريدا ءشارىپوۆانىڭ «ماعان ارناپ ءبىر دۇنيە جاز!» دەگەن بۇيىمتايىن ورىنداي الماساڭىز دا، ق ر حالىق ءارتىسى گۇلجان اسپەتوۆاعا بەرگەن ۋادەڭىزدى اراعا بەس جىل سالىپ ورىندادىڭىز. قالامگەرلىك پارىزدى وتەي الماي، وزەكتى وكىنىش ورتەيتىن ساتتەر ءجيى بولا ما؟

- ونداي ساتتەر كوپ قوي. فاريدا ءشارىپوۆا «پاتشا قاتىن ۋ» اڭگىمەمدى وقىعاننان كەيىن تەلەفون شالىپ ەدى. «مەن قازىر مىنا پاتشا قاتىنىڭدى ويناي الاتىن جاستامىن. ءوزى قىتاي ەكەن، ولاردىڭ دا مىنەز- عۇرپىن، تاربيەسىن مەنەن ارتىق ەشكىم بىلە قويماس» دەپ قىزىعىپ قولقا سالدى. راس، ءشارىپوۆانىڭ ول كەيىپكەردى كەمەلىنە كەلتىرىپ شىعاراتىنىنا كۇمانىم بولماعان. 2004 -جىلى قىزمەتىمە بايلانىستى استاناعا كوشىپ كەتتىم. كۇنكورىس قيىنداعان كەزەڭ، بالالار - شاقالاق، سونىمەن اراعا ۋاقىت ءتۇسىپ كەتتى. ءسويتىپ جۇرگەندە فاريدا اپا دۇنيەدەن ءوتتى. اكتريسانىڭ اياۋلى ارمانىنىڭ ورىندالۋىنا جاردەم كورسەتە المادىم. وسى كۇنگە دەيىنگى ىشتە كەتكەن ءبىر ۇلكەن وكىنىشىم - وسى. بولات اتابايەۆتىڭ ءبىر ايتقانى بار ەدى: «فاريدا اپاعا باردىم، ءۇيىن قاراڭعىلاپ تاستايدى ەكەن، ەشكىممەن سويلەسكىسى جوق، باسقاشا كۇيزەلىسىن كوردىم»، - دەپ. بىلەسىز بە، بالكىم بۇل ۇقساستىق شىعار، ءبىراق «پاتشا قاتىن ۋ- دىڭ» سوڭعى ءومىرى وسىنداي تراگەديامەن بىتەتىن. ويتكەنى 50 جىل پاتشالىقتى بيلەگەن قاتىننىڭ قاپاعان حان باستاعان كوشپەلى تۇرىكتەردىڭ الدىنداعى جەڭىلىس ساتىندەگى كۇيى ەدى.

پارلامەنت سەناتىندا قىزمەتتە جۇرگەن كەزىمدە قازاقستاننىڭ حالىق ءارتىسى گۇلجان اسپەتوۆا: «ماعان ءبىر دۇنيە جاز! قاشانعى جۇرەدى دەيسىڭ، ءبىز دە قارتايىپ بارامىز»، - دەمەسى بار ما. گۇلەكەڭە بەرگەن ۋادەم 5 جىلدان سوڭ ورىندالدى، «ساررانى» اكتريسانىڭ 70 جىلدىعىنا تارتۋ ەتتىم. بۇل دا مەنىڭ ونەر جولىندا جۇرگەن دارا قىزدارىمىزدىڭ الدىنداعى دراماتۋرگ رەتىندەگى پارىزىم دەپ بىلەم.

- اۋەزوۆ تەاترىنىڭ ساحناسىندا 18 جىل بويى ۇزدىكسىز قويىلعان «ماڭگىلىك بالا بەينە» ءبىز الماتىعا ستۋدەنت بوپ كەلگەن جىلى سوڭعى رەت ساحنالاندى، كورىپ ۇلگەردىك. قويىلىمنان كەيىن شىعارمانىڭ ءوزىن وقىدىم، سونىڭ جەلىسى بويىنشا ساتىبالدى نارىمبەتوۆ تۇسىرگەن «قىزجىلاعاندى» كوردىم. وزەك ءبىر بولعانمەن، ۇشەۋى ءۇش ءتۇرلى دۇنيەدەي كورىندى. بۇعان زاڭدىلىق دەپ قاراعان ءجون بە؟

- ارينە، اڭگىمە جانرى، كينوسەناري، دراماتۋرگيا. اۋەلى «ماڭگىلىك بالا بەينە» ءوزىڭىز وقىعان اڭگىمە بولىپ جازىلدى. كەيىن رەجيسسەردىڭ سۇرانىسىمەن پەساعا اينالدىردىم. ودان ساكەن كينوسەناريگە اينالدىردى. وسى جاقىندا عانا استانا قالاسىنىڭ قۋىرشاق تەاترى العاش رەت ساحناعا شىعاردى. رەجيسسەرى - قۇرالاي ەشمۇراتوۆا. شىنىن ايتقاندا كۇدىكتەنىپ باردىم. تاقىرىپ اۋىر، بالالاردىڭ قابىلداۋى قالاي بولادى ەكەن دەپ قينالدىم. ءلايلانى قۋىرشاققا اينالدىرعاندارى سونشالىق، ناق وسى تەاترعا ارنالىپ جازىلعانداي بولىپ شىققان. ءلايلانىڭ شات- شادىمان بالا كۇلكىسى، جارىق ايعا قاراپ مۇڭ شاعىپ وكسىپ جىلاعانى، ورەكپىپ عاشىق بولعانى جانىڭدى تۇرشىكتىرەدى. شىنايى، تاپ- تازا پەرىشتە ءلايلانى قۋىرشاق بەينەسىندە كورىپ وتىرعانداردىڭ جىلاعانىن، كۇلگەنىن كورسەڭىز. عاجاپ قويىلىم.

- قازاق تەاترلارىنىڭ بۇگىنگى جاعدايىن تۋندجەردىڭ «كوشكىن» تۋىندىسىنداعى شاعىن اۋىلدىڭ ۇركەك كۇيىنە تەڭەدىڭىز. سوندا بۇگىنگى رەجيسسەرلەر نەدەن قورقادى، نەدەن قاۋىپتەنەدى؟

- بىلمەدىم... كولەڭكەسىنەن قورقادى. ۇلكەن ماسەلەلەردى كوتەرەتىن سالماقتى شىعارمالار قويىلۋى كەرەك. ۇلتتى توبىرعا اينالدىرا سالۋ وڭاي. ۇلتقا وي سالاتىن، وياتاتىن، شىعارمالار رەپەرتۋاردان ورىن الۋى قاجەت- اق. ونداي دۇنيەلەردى قويۋعا ۇركەكتەۋدىڭ قاجەتى جوق. ءبىزدىڭ رەجيسسەرلەر  ⅩⅩ عاسىردىڭ 40-60- جىلدارىنداعى رەپەرتۋارىن ءالى جاڭارتپاي كەلەدى. شەكسپيردىڭ «گاملەتى» مەن گوگولدىڭ «رەۆيزورى» ساحنادان تۇسپەي كەلە جاتقانىنا 60 جىل بولعان شىعار. نەگە شەكسپيردىڭ «كوريولانىن»، «ريچارد ІІ - نى» قويماسقا. ا. پ. چەحوۆتىڭ «6- پالاتاسىن»، گوگولدىڭ «جىندىنىڭ جازبالارىن» قازاق ساحناسىنان كورگىم كەلەدى. رەجيسسەرلەردىڭ تاماشا ىزدەنىستەرىنە ۇلكەن جول اشىپ تۇرعان عاجايىپ شىعارمالار.

- سىزدەردىڭ تولقىننان بەرى قاراي ادەبيەتتە ۇجىمداسۋ، ۇيىسۋ جاعى كەنجە قالعانداي. قالامگەرلەر ءبىر- ءبىرىن قولداپ- قولپاشتاۋدى، سىناي وتىرىپ دەم بەرۋدى نەگە دوعاردى؟ بۇگىنگى جازۋشىلار شىنىمەن ۇزەڭگىلەستەرىن وقۋدى قويدى ما، الدە وقىسا دا ۇندەمەي قالعاندى قۇپ كورە مە؟

- بۇگىنگى تالانتتى دەپ جۇرگەن جازۋشىلاردىڭ دەڭگەيلەرى ءبىر-بىرىنە ۇقساس. ارەكەتتەرى دە، مىنەز-پيعىلدارى دا، ءتىپتى ءومىر ءسۇرۋ ءادىسى دە ۇقساس. ۇقساستىقتان دارالىق تابا المايسىز. ونەردە قۇبىلىس بولىپ تانىلۋ كەرەك.

- «بۇگىنگى پروزا الپىسىنشى جىلدارداعى ادەبيەتتىڭ توبىعىندا ءجۇر» دەگەن پىكىرىڭىزگە وندىرتە جازىپ جۇرگەن بۇگىنگى جازۋشىلار شامدانعان جوق پا؟

- «وندىرتە جازۋ» دەگەن نە؟ ايتەۋىر جازا بەرۋ مە؟ نە جازدى، قالاي جازىلدى؟ وقىرمان قابىلدادى ما، سۇرانىسقا يە بولدى ما؟ وندا ول شىعارمانىڭ قۇنى قانشالىقتى بولعانى...

- قانشاما جىل بويى تارتپادا جاتىپ بارىپ، وقىرمانعا جول تارتسا دا، كەشە جازىلىپ، بۇگىن باسىلعانداي اسەر قالدىراتىن تۋىندىلار بار. تاقىرىپتىڭ وزەكتىلىگىنەن باسقا شىعارمانىڭ عۇمىرىن ۇزارتاتىن قانداي قاسيەت؟

- تارتپانى ايتاسىز، 1616 -جىلى دۇنيەدەن ءوتىپ كەتكەن شەكسپيردىڭ «كوريولانى» مەن «ريچاردى» ءالى كۇنگە دەيىن وزەكتىلىگىن جوعالتپاي تۇرعان جوق پا. ادام بالاسى تابيعاتىنىڭ وزگەرمەيتىندىگىنە كۋا بولاسىز: قوعام، بيلىك، ماحاببات. شەكسپير ولمەيتىن تاقىرىپتارعا بارعان.

- ادەبيەتتەگى اعا بۋىن وكىلدەرىنە «جاستاردان كىمدى وقيسىز، كىمنىڭ شىعارماشىلىعىنا تۇشىناسىز؟» دەگەن ساۋال ءجيى قويىلادى. ءبىراق ولاردىڭ اۋزىنان ناقتى ەسىمدەردى، جاستاردىڭ قالامىنان تۋعان شىعارمالاردىڭ اتاۋىن سيرەك ەستيمىز. جازعانى جۇيرىكتەردىڭ سىنىنان وتپەسە، جاستار قالاي ىلگەرىلەيدى؟

- تالانت بىرەۋدىڭ ماقتاۋىنا، ناسيحاتتاۋىنا ءزارۋ ەمەس. ءوزىنىڭ وسال ەمەس ەكەنىن ءىشى سەزەدى. شىعارماسى- اق توبە كورسەتەدى. سول جەتكىلىكتى ەمەس پە؟ «ادەبيەت پورتالىنان» نۇرلان حاۆدايدىڭ «سۇر اڭگىمە» دەگەن شىعارماسىن وقىدىم. قاتتى ۇنادى. كلاسسيكالىق اڭگىمە. ءوزىن كورمەگەنمىن، تانىمايتىن ادامىم. باسقا شىعارمالارى بار ما ەكەن دەپ قىزىعىپ قالدىم.

- استاناداعى قازاق ۇلتتىق ونەر ۋنيۆەرسيتەتىندە ۇستازدىق ەتىپ ءجۇرسىز. اكادەميالىق جوسپار بويىنشا نەگىزگى مىندەتىڭىز - شاكىرتتەردى جازۋشى، سۋرەتكەر ەتىپ شىعارۋ. قارىم- قابىلەتى، ماقساتى مەن تالعامى ءار ءتۇرلى جاستاردىڭ جازۋىن شىڭداۋدىڭ ورتاق ءادىسىن تاپتىڭىز با؟

- ورتاق ءادىس جوق، ءارقايسىسىنىڭ قارىم-قابىلەتىنە قاراي باعىت-باعدار عانا بەرە الاسىڭ.

- قالام ۇستاعاننىڭ ءبارى جازۋشى، اقىن اتانعان قازىرگى كەزەڭدە قاپتاعان كىتاپتاردىڭ قالىڭ نوپىرىنەن وزىنە كەرەگىن اداسپاي تابۋ ءۇشىن وقىرمانعا قايتپەك كەرەك؟

- «بازارعا اركىم بارار، تاپقانىن ەمەس، تاڭداعانىن الار». تالعام كەرەك!

- ءسىز جوعارى باعالاعان شىعارمانى، ءسىز مويىنداعان جازۋشىنى ەكىنشى ءبىر وقىرمان ءتىپتى وقىعىسى كەلمەۋى مۇمكىن. تالعامنىڭ جوعارى- تومەندىگى قانداي كريتەريلەرمەن ايقىندالادى؟

- ءسىزدىڭ - ماعان، مەنىڭ - سىزگە ۇقسامايتىندىعىم سياقتى.

- باسپاسوزگە، كىتاپقا سۇرانىس كۇن وتكەن سايىن كەمىپ كەلەدى. جازعان- سىزعانىم كەيىنگىگە كەرەك بولماي قالۋى مۇمكىن دەگەن كوڭىلسىز وي مازالاعاندا جۇباناتىنىڭىز نە؟

- مەن شىعارما جازعاندا ماڭگىلىك ءۇشىن جازىپ وتىرمىن دەپ ويلامايمىن. ءوز كۇيىمدى ءوزىم تىڭداپ، جانىمدى مازالاعان تاقىرىپقا سۋرەتكەر رەتىندە ءتىل قاتۋ ءۇشىن، وزىممەن- ءوزىم سىبىرلاپ سويلەسۋ ءۇشىن جازامىن. ال سونى الدەكىم كوز توقتاتىپ وقىپ، باعالاپ، ءدال وزىمدەي تۇسىنسە بەكەر جازىلماپتى- اۋ دەپ قاتتى قۋانامىن. بارى وسى عانا.

- سوڭعى ۋاقىتتا حالىقارالىق دەڭگەيدەگى ونەر بايقاۋلارىندا قاتىسۋشىلاردىڭ بابى مەن باعى عانا ەمەس، ساياسي مۇددەلەر دە سىنعا تۇسەتىنى جاسىرىن ەمەس. ادەبي بايگەلەرگە قاتىستى دا سىن كوپ. ونىڭ ءبارى توپ جارا الماعانداردىڭ كۇڭكىلى ەمەس شىعار؟

- بايگەگە تانىلۋ ءۇشىن تۇسەدى. داڭق شىعارماڭمەن عانا كەلەدى.

- قوعام قيت ەتسە قالامگەرلەردىڭ اۋزىنا اڭتارىلادى وسى كۇنى. «پالەنشە نەگە پىكىر بىلدىرمەدى، تۇگەنشە نەگە ءۇنسىز قالدى؟ » دەگەن ايىپتاۋلاردىڭ كوبەيۋىنە نە سەبەپ؟

- دەمەك، حالىقتىڭ ۇعىمىندا جازۋشىنىڭ بەدەلى ءالى ۇستەم.

- جازۋ قانشالىقتى قيىن بولسا، جازعانىڭدى جارقىراتىپ كورسەتۋدىڭ ماشاقاتى ودان دا كوپ. بۇل تۇرعىدان عالامتوردىڭ ءتىلىن تاپقانداردىڭ جولى بولىپ تۇر. ءسىزدىڭ شىعارمالارىڭىزدىڭ ينتەرنەتتەگى ناسيحاتى قالاي؟

- ينتەرنەتتە دە، باسپا سوزدە دە ناسيحاتىم جوق. ينتەرنەتكە شىعارمالارىمدى جاريالاعان ەمەسپىن.

- وزگەلەر كيگەندى كيۋگە، باسقالار بارعان جەرگە بارۋعا، بىرەۋ وقىعاندى وقۋعا قۇمارتۋ قانىمىزدا بار قاسيەت. دارالانۋدان جۇرەكسىنۋ، تاجىريبە جاساۋدان قورقۋدىڭ اقىرى شىعارماشىلىق ادامىن قايدا جەتەلەيدى؟

- ءبىر بىلەتىنىم، ونداي ادامنان شىعارماشىلىق تۇلعا قالىپتاسپايدى.

- «جۋرناليستيكانى كاسىپ ەتىپ مەڭگەرگەندەردىڭ ادەبيەتكە ءسىڭۋى قيىن» دەگەن پىكىرىڭىزدى وقىدىم ءبىر سۇحباتتان. نەگىزگى ءناسىبىن وسى كاسىپتەن تاۋىپ جۇرگەن جازۋشىلار كەلىسە مە بۇل ويىڭىزبەن؟

- نەسىبەسىن ەدەن جۋىپ تا تابۋعا بولادى، ءبىراق تابيعاتى جازۋشى بولىپ قالا بەرەدى. مەنىڭ ايتقىم كەلگەنى - جۋرناليست بولىپ قالىپتاسقان كاسىبي ماماننىڭ جازۋشىلىقتىڭ تابيعاتىنا توزە المايتىندىعى. سۋرەتكەردىڭ كورۋى دە، ايتۋى دا باسقا ۇلگىدە، جۋرناليستىكا باسقا. جالپى بۇل پىكىرمەن كەلىسپەۋىڭە دە بولادى، ول مەنىڭ جەكە ءوز پىكىرىم. پايعامبارىمىز دا نەسىبەسىن ساۋدا جاساپ تاپقان، ءبىراق ساۋداگەرلەردىڭ پايعامبار بولا الماعانى سياقتى. وسى ەكەۋمىز كوپ سويلەسىپ كەتكەن جوقپىز با، كوپ سويلەگەن ادام شاتاسا باستايدى...

- سىزبەن سۇحباتتاسۋدىڭ ءساتى كۇندە تۇسە بەرمەيتىندىكتەن كوكەيدەگى سۇراقتىڭ ءبارىن قويىپ قالسام دەگەن قوماعاي وي توقتاتار ەمەس. جازۋشىعا جار بولماعاندا روزا مۇقانوۆانىڭ شىعارماشىلىعى قالاي ءوربۋى مۇمكىن ەدى؟

- ءدال وسى شامادا عانا شىعار.

- ارىپتەستەرىمنىڭ ءبىرى ماقالالارىندا «باقىتتىڭ تورەسى» دەگەن تىركەستى ءجيى قولدانادى. سىزدىڭشە، قالامگەر ءۇشىن ەڭ ۇلكەن باقىت نە؟

- باقىتتىڭ ۇلكەن- كىشىسى بولا ما؟ باقىتقا ولشەممەن قاراۋعا بولا ما؟ جالپى ادام بالاسى باقىتتى جاراتىلىس پا دەگەن ساۋالدار مەنىڭ جادىمدا جاۋاپسىز جاتادى. باقىتتى ادام باقىتسىزدىقتان قورقادى. باقىتسىز ادام دا باقىتتان قورقاتىن سياقتى. بايدىڭ كەدەيلىكتەن، كەدەيدىڭ بايلىقتان قورقاتىنى سياقتى.

- باقىتتى جازۋشى بولۋعا ۇمتىلۋ باقىتتى ايەل بولۋعا كەدەرگى كەلتىرگەن جوق پا؟

- وي، سۇراعىڭىزدى- اي! باقىتتى جازۋشى ەكەنىمدى قايدام، باقىتتى ايەل بولۋ، باقىتتى انا بولۋ قىمباتتىراق!

- اڭگىمەڭىزگە راحمەت!

سۇحباتتاسقان انار لەپەسوۆا

 turkystan.kz