+7 (701) 759 90 19
USD 431.07 EUR 485.51
RUB 5.69 CNY 67.47
جاڭالىقتار

كەرەك كەڭەس: بالانى جومارتتىققا ۇيرەتۋ كەرەك

23 تامىز 18:03
:ءبولىسۋ
كەرەك كەڭەس: بالانى جومارتتىققا ۇيرەتۋ كەرەك

نۇر- سۇلتان. قازاقپارات - بالانىڭ بويىندا تەز كوزگە تۇسەتىن مىنەز - ۇيالۋ. ۇياتتىڭ كوپتىگى ىزگىلىكتىڭ بەلگىسى.

بالادا ۇيالۋ بايقالعاندا، ەڭ كەرەگى جامان، بۇزىق بالالارعا قوسپاي، ساق قاراۋ. ويتكەنى، بالالاردىڭ جان دۇنيەسى ايناداي تازا. تۇسكەن بەينەنى تەز قابىلدايدى.

بالانى جاقسىلىققا ىنتالاندىرعان دۇرىس. جاماندىق پەن ناشار قىلىقتار جاساۋىنا تىيىم سالعان ءجون. جاقسى ءىس ىستەسە ماقتاپ، جامان ءىس ىستەسە، جازعىرۋ كەرەك. ءبىراق، ءجيى ۇرىسا بەرۋدەن الىس بولىڭىز. ايتپەسە، ۇرىسۋ نە ايىپتاۋ ۇيرەنشىكتى جاعدايعا اينالادى. بالا قاشاننان تىيىم سالىنعان ىسكە ءۇيىر، سوندىقتان ەرەگەسپەن قايتا ىستەۋى مۇمكىن.

ىلعي جەۋگە، ىشۋگە قۇمار بولماۋى ءۇشىن ەسكەرتۋ جاساعان دۇرىس. اۋەلى اس ءىشۋدىڭ ادەبىن ۇيرەتىپ، اس ىشۋدەن ماقسات ءلاززات الۋ ەمەس، اعزانىڭ ساۋلىعىن ساقتاۋ ەكەنىن بىلدىرگەن ءجون. ۇل بالاعا ءار قالاعان تاماقتى ەمەس، تابىلعان، داستارحانعا قويىلعان تاماقتى جەۋگە ۇيرەتكەن دۇرىس. كەي- كەيدە قاتقان نان دا بەرىپ، سونىڭ دا قادىرىن بىلگىزگەن ءجون.

جالپى بالانىڭ جامان سوزدەر ەستۋىنە تىيىم سالۋ كەرەك. مىندەتىن بىتىرمەيىنشە ءارى قيىندىق كورمەيىنشە تاماعىن بەرە قويۋعا اسىقپاي، جاسىرىن ىستەرىنە تىيىم سالىپ، ۇياتتى ءىس ىستەۋگە دەگەن باتىلدىق بەرمەۋ كەرەك. كۇندىز ءارى تۇندە كوپ ۇيىقتاتپاي، جۇمساق كيىمدەرگە داعدىلاندىرماي، جاياۋ جۇرگىزىپ، كولىككە ءمىنۋدى ۇيرەتىپ، قالاي وتىرىپ، تۇرىپ، سويلەۋدىڭ ادەبىن تۇسىندىرگەن ابزال. اكەسىمەن جانە دۇنيە بايلىعىمەن دوستارىنا ماقتانۋىنا تىيىم سالىپ، وتىرىك ايتپاۋىن، وتىرىك انت سۋ ىشپەۋىن ءجيى ەسكەرتكەن دۇرىس.

ۇلكەندەردىڭ جانىندا ۇندەمەي وتىرۋدى، سۇراق قويىلسا، قىسقا عانا جاۋاپ بەرۋدى ۇيرەتىپ، ىلعي تەك جاقسى سويلەۋدى ادەت ەتۋدى تۇسىندىرگەن ماقۇل. ءىلىم ۇيرەنۋگە تالپىندىرۋ كەرەك. بالانى جومارتتىققا داعدىلاندىرىپ، دۇنيە- مۇلىكتى قادىرسىزدەۋ كورسەتۋ كەرەك. ويتكەنى اقشا مەن دۇنيەگە قۇنىعۋ ءقاۋىپتى. بوس ۋاقىتتاردا بالانىڭ ويىن ويناۋىنا رۇقسات ەتكەن دۇرىس. الايدا ناشار داعدىعا ۇيرەتەتىن ويىنداردى ويناتپاعان ءجون. بۇل ادەپتەر بارشاعا جاقسىلىق اكەلەدى. اركىم كەز كەلگەن ونەردى يگەرىپ كەتە بەرمەيدى. كوبىنە ءبىر سالاعا عانا بەيىم تۇرادى. نەگىزى، ءبىر سالاعا كىم بەيىم بولسا، سول تەز ۇيرەنەدى. ال يكەمى جوق اۋرەلەنگەننەن باسقا تۇك بىتىرمەيدى. سوندىقتان بالانىڭ قابىلەتىن تانىپ بارىپ، ءوز سالاسىنا بەرگەن دۇرىس. ايتپەسە، بالا ۇمىتسىزدىككە سالىنادى.

بالاعا ادال تابىس تاباتىنداي كاسىپ ىستەتۋ كەرەك. اكە-شەشەسىنەن قالعان دۇنيەگە كوپ سەندىرمەۋ كەرەك. ويتكەنى، اكەنىڭ تاپقانىنا ماقتانعان بالالار كوبىنە كاسىپ ءتۇرىن ۇيرەنبەي، كەيىننەن ءبارىبىر وسالدىقتارىن بايقاتادى.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات