+7 (701) 759 90 19
USD 431.07 EUR 485.51
RUB 5.69 CNY 67.47
جاڭالىقتار

قۇلاعىنا قول اپارتپايتىن اساۋ-اردا حالقىمىز قارا تۇياعىنان حال كەتىپ، قول بالاعا اينالدى- قابدەش ءجۇمادىلوۆ

13 تامىز 14:40
:ءبولىسۋ
قۇلاعىنا قول اپارتپايتىن اساۋ-اردا حالقىمىز قارا تۇياعىنان حال كەتىپ، قول بالاعا اينالدى- قابدەش ءجۇمادىلوۆ

نۇر- سۇلتان. قازاقپارات - راديو مەن تەلەديداردى اشىپ قالساڭ دا سولاي: ەرتەدەن كەشكە دەيىن ولەڭ-جىر، توي-دۋمان: «اسپانىمىز اشىق بولسىن، تىنىشتىق بولسىن!» دەپ توست كوتەرىپ جاتقان جۇرت.

جەر بەتىندە قازاقتان ءتورت تۇلىگى ساي ەل جوق سەكىلدى. ۇلتتىق سانا جايىنا قالدى. «قاسقىر دا توق، قوي دا امان» بۇل نەتكەن كەرەمەت دەپ ويلايسىڭ...

ءالى كۇنگە جاڭا كيىمىنە بايعازى سۇراعان بالاداي شاتتانىپ تاۋەلسىزدىكتى تاماشالاپ ماقتانۋمەن كەلەمىز. ارعى بابالارىمىز ىرگەلى ەل بولماعانداي، قازاق حالقى ءتورت عاسىر بويى ءوز الدىنا حاندىق قۇرىپ تۇرماعانداي، شەكتەن شىعا داۋرىعۋدىڭ ىسىك-جەلىگى ەندى باسىلاتىنداي ۋاقىت بولدى عوي. قازىر بىرەۋلەردىڭ ويىنشا، ادامدار بايىسا بولعانى، قوعام ەشقانداي رۋحاني بىرلىكسىز-اق وزىنەن-ءوزى گۇلدەنىپ جۇرە بەرەتىن سەكىلدى. بازارعا باعىنعان ەلدەردە ەشقانداي يدەولوگيا بولمايدى- مىس. بۇلاي ويلاۋ - اڭعىرتتىق.

بىزگە ۇلتتىق سانا مەن ۇلتتىق مۇددە بىرەۋلەردى ىعىستىرىپ، قىسىم جاساۋ ءۇشىن ەمەس، ەڭ الدىمەن باسىمىزداعى قۇلدىقتىڭ تاقيا تاڭباسىن كەتىرۋ ءۇشىن، قانىمىزعا ابدەن ءسىڭىپ قالعان قورقىنىش- ۇرەيدەن، ءوز كۇشىنە سەنبەيتىن جالتاق جاسىقتىقتان تۇبەگەيلى ارىلۋ ءۇشىن كەرەك. الدەنەشە عاسىرعا سوزىلعان، اسىرەسە سوڭعى جەتپىس جىلدا مۇلدە قۇلاقكەستى قۇلعا، ماڭگۇرتكە اينالدىرعان بوداندىقتىڭ باتتاسقان كىرى قىسقا ۋاقىتتى وڭايلىقپەن كەتە قويا ما؟!

شىنى كەرەك، قازاقتا ءتىپتى ءار ۇلىس، ءار رۋدىڭ وزىنە ءتان بوداندىق-قۇلدىق تاريحى بار. بىرەۋى ءسال ەرتەرەك، بىرەۋى ءسال كەشىرەك... ءوز ەلىمىزدە ازشىلىققا اينالىپ ۇزاق جىلدار بويى «قازاقستان - ۇلتتار دوستىعىنىڭ لابوراتورياسى» دەگەن قورلىق ۇراندى نامىستان جارىلىپ كەتپەي تىڭداپ كەلگەن، ءتىپتى، سول ۇرانعا ءوزىمىز دە ءۇن قوسقان جۇرتپىز.

ودان كەيىنگى زۇلماتتى ساناي بەرىڭىز... وتىزىنشى جىلدارداعى اشتىق... 37- جىلعى قۋعىن- سۇرگىن... نە كەرەك، كۇنى كەشە «دالا سەرىلەرى» اتانىپ جۇرگەن كوشپەندىلەر باس-اياعى ەلۋ شاقتى جىلدىڭ ىشىندە باسى اينالعان ماڭگۇرتكە، ەكى قولىنان باسقا تۇگى جوق، قارا جاياۋ توبىرعا اينالىپ شىعا كەلدى. سودان ءبىراز جىل عانا بۇرىن قۇلاعىنا قول اپارتپايتىن اساۋ-اردا حالىقتىڭ قارا تۇياعىنان حال كەتىپ، قول بالاعا اينالدى.

سول ۇرەي ءالى كۇنگە بويىمىزدان ارىلماي كەلەدى. ۇلتتىڭ ىشتەي تۇلەۋىن اڭعارتاتىن يدەيالىق بىرلىكتىڭ، تەوريالىق ازىرلىكتىڭ بولماۋى قازىر دە ءار ىسىمىزدەن بايقالىپ تۇرادى. ەگەر قازاقتى ۇلت رەتىندە جويۋ قاجەت بولسا، ونىڭ ۇستىنە اتوم بومباسىن تاستاۋدىڭ قاجەتى جوق، حالىقتى دىنىنەن، تىلىنەن، مادەنيەتىنەن ايىرساڭ جەتىپ جاتىر.

كەيدە وتىرىپ قايران قالاسىڭ: جەتپىس جىل جەتەگىندە جۇرسەك تە بولشەۆيكتەردەن ەشتەڭە ۇيرەنبەگەن ەكەنبىز. ولار باسقاعا ولاق بولعانىمەن، ساياسي قيسىنعا وتە مۇقيات قارادى. الدەقاشان كۇنى ءوتىپ، ىرگەتاسى ىرىگەن ەسكى يمپەريا مەن قولدان قۇراستىرعان كوممۋنيزم تۋرالى ەرتەگىنى سول ساياسي سالماقتىڭ كۇشىمەن ۇستاپ تۇردى ەمەس پە؟

ال ءبىز بولساق، اعىلعان جۇرتتىڭ اياق استىندا الاڭ-اشىق جاتقان ۇلانعايىر ولكەدە ەشقانداي ءبىرتۇتاس ۇلتتىق سانا مەن مۇراتسىز، جالپىعا بىردەي مەملەكەت قۇرعىمىز كەلەدى. كۇپىرلىك ەمەس پە مۇنىمىز؟ ەگەر ۇلتتىق سانانى - ۇلتتى ۇيىتاتىن بىردەن- ءبىر قارۋ دەسەك، ول باسقادان گورى، ەڭ الدىمەن قازاققا كەرەك. ونى جانە بىزگە وزىمىزدەن باسقا ەشكىم جاساپ بەرمەيدى.

2016 - جىل
ult.kz



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات