ءىليا جاقانوۆتىڭ ءازىلى
الىستاعى اعايىننىڭ الدىندا ءان شىرقاپ، ءبي بيلەپ ونەر كورسەتىپ، كىتاپتار تاراتىپ قايتقانبىز. وسى ساپاردىڭ ويداعىداي ۇيىمداسۋىنا مۇرىندىق بولىپ، قوساعاشقا الدىن الا بارىپ، اۋدان باسشىلارىمەن كەلىسىپ جۇرگەن جاس جۋرناليست ساعاتبەك مەدەۋبەكوۆ ەدى. ارامىزدا سۋرەتشى حاسەن ابايەۆ، ستۋدەنت- ءانشى بەكبولات تىلەۋحانوۆ، كۇيشى ابدۋلحاميت رايىمبەرگەنوۆ، «لەنينشىل جاس» گازەتىنىڭ ءتىلشىسى بەيبىت يسابايەۆ، تاعى ءبىر توپ ونەر يەلەرى بار، مامىر ايىنىڭ سوڭىنا قاراي الىس جولعا شىعىپ كەتتىك. ۇلكەنىمىز - كومپوزيتور ءىليا جاقانوۆ.
الماتىدان ارتىنىپ- تارتىنىپ الدىمەن بارناۋىلعا جەتتىك. ودان ءارى كۇن ءجۇرىپ، شەكاراداعى قوساعاشقا ىلىندىك. اۋىل مەن اۋىلدى ارالاپ كونسەرت قويدىق، وقۋشى جاستارمەن كەزدەسۋلەر وتكىزدىك. «جاڭا اۋىل» دەگەن سوۆحوز ورتالىعىندا ءىليا اعامىز ەكەۋىمىز جاڭادان شىققان كىتاپتارىمىزعا قولتاڭبا بەرىپ، جۇرتشىلىققا تەگىن تاراتىپ جاتىرمىز.
- اتىڭ كىم، باۋىرىم؟ - دەدى ىلەكەڭ داۋىستاپ.
- وكتيابر!
- ە، جارايدى قازان بولماي، وكتيابر بولساڭ دا قولتاڭبا جازىپ بەرەيىن!
قولتاڭباسىن جازىپ، الگى جىگىتتىڭ ارقاسىنان قاعىپ، كىتاپتى قولىنا ۇستاتتى.
- ءيا، شىراعىم، اتىڭدى ايت؟ - دەدى اعامىز كەزەكتە تۇرعان ەكىنشى جىگىتتىڭ قولىنداعى كىتاپقا قولتاڭبا بەرمەك بولىپ.
- كومسومول! - دەدى ول جىگىت قيپاقتاپ.
وعان دا قولتاڭبا جازىپ بەردى.
- وكتيابرگە بەردىم، كومسومولعا جازدىم، ال ەندى پيونەرلەرىڭ بار ما؟ - دەدى ىلەكەڭ ازىلگە باسىپ.
سول ساتتە الماتىلىق قوناقتاردى كۇتىپ الىپ، شارۋانىڭ باسى- قاسىندا جۇگىرىپ جۇرگەن ۇزىن بويلى جىگىت اعاسى:
- ىلەكە، پيونەر مەن ەمەسپىن بە؟ - دەپ ەلپىلدەپ جەتىپ كەلدى.
- ويبۋ- ۋ، سەنىڭ اتىڭ پيونەر مە ەدى؟ - دەپ ىلەكەڭ تاڭەرتەڭنەن بەرى قاسىمىزدا جۇرگەن جىگىتتىڭ اتى- ءجونىن سۇراماعانعا ىڭعايسىزدانىپ قالدى.
سول پيونەر مۇحتاسىروۆ دەگەن اعامىز قازاقستان تاۋەلسىزدىك العاننان كەيىن ءبىر توپ جەرلەستەرىن باستاپ، الماتىعا كوشىپ كەلدى. «بايتەرەكتىڭ وقشاۋ شىققان بۇتاعى» اتتى، قوساعاش قازاقتارىنىڭ تاريحى مەن تاعدىرىن بايانداعان تانىمدىق جاقسى كىتاپ جازىپ شىعاردى.
الىبەك اسقاروۆ
«ايقىن»