ساحنادا ۇنەمى كۇلىمسىرەپ جۇرەتىن وتاندىق انشىلەر قانداي مىنەز كورسەتە الادى؟
ساحنادا شالكەز مىنەزدەرىن كورسەتپەي، ۇنەمى كۇلىپ جۇرەتىن كەيبىر جۇلدىزدار شىنايى ومىردە مۇلدەم باسقا دەپ حابارلايدى 31- ارنا.
كورەرمەندى قىران-توپان كۇلكىگە كومكەرەتىن «باۋىرجان-شوۋ» تەاترىنىڭ باسشىسى باۋىرجان يبراگيموۆ جاقىندا قوناق ۇيلەردىڭ بىرىندە بەيادەپ قىلىق كورسەتىپ، ەلدىڭ نارازىلىعىنا قالعان بولاتىن. تانىمال تۇلعا قوناق ۇيدە وزىنە ورىننىڭ جوقتىعىن ەستىگەندە، ءتۇسىندىرىپ تۇرعان قىزمەتكەرگە ءبىرتالاي ءسوز ايتىپ تاستاعان.
الايدا، ەكى كۇننەن كەيىن «جاڭىلمايتىن جاق، سۇرىنبەيتىن تۇياق جوق» دەگەن ەل اعاسى بولعان وقيعاعا وكىنىپ، قىزمەتكەرلەردەن كەشىرىم سۇرادى.
ارنانىڭ ءتۇسىرىلىم توبى انشىلەردىڭ ناعىز كەلبەتىن ءبىلۋ ماقساتىندا تەكسەرىپ كورمەك بولىپ، ونەر ادامدارىنا ءبىر-ەكى تاجىريبە جاساپ كورگەن ەدى. ءسويتىپ، ولار انشىلەر كوپ جينالاتىن ورىنعا باردى.
سايات مەدەۋوۆ
بۇل - رەسپۋبليكا سارايى. تىلشىلەر ساحنادا اسا سابىرلى ءارى ەلدىڭ سۇيىكتى ءانشىسى سايات مەدەۋوۆتى اڭگىمەگە تارتتى. سۇحبات بارىسىندا تەحنيكالىق اقاۋدىڭ بولعانىن العا تارتىپ، ءبىر سۇراقتى ءۇش رەت قويىپ، وعان ءانشى ءۇش رەت جاۋاپ بەرسە دە ساياتتىڭ جۇيكەسى سىر بەرمەدى.
الايدا، 4- رەت قايتالاتپاق بولعاندا ءانشى شىداماي كەتتى.
«وسى جازباي-اق قويايىقشى، باعانادان بەرى ءبىر اڭگىمەنى 100 ايتىپ جاتىرمىن دا. بولمايتىن نارسە بولماي-اق قويسىن. قويشى»، - دەپ قايىردى سايات مەدەۋوۆ.
ايگەرىم قالاۋبايەۆا
جۋرناليستەر بوتەلكەگە سۋ تولتىرىپ الىپ، انشىلەردىڭ جۇيكە جۇيەسىن تەكسەرمەك بولىپ ولاردىڭ بەتىنە سۋ دا شاشتى.
«مەنىڭ ويىمشا، ءاربىر ساحنادان شىققان ونەر ازاماتتارىنا ءوستىپ سەۋىپ تۇرساڭىزدار كەرەمەت بولادى»، - دەپ بۇل ارەكەتتەرىنە جاۋاپ قاتتى ءانشى ايگەرىم قالاۋبايەۆا.
جازيرا بايىربەكوۆا
ءانشى جازيرا بايىربەكوۆا دا ءدال وسىنداي پىكىردە. ەل الدىندا جاعىمسىز مىنەز كورسەتىپ ۇياتقا قالماۋدى قاداعالاپ جۇرەدى ەكەن.
«مەنىڭ مىنەزىم جامان دەپ ەشكىم ايتپايدى عوي. اركىمگە ءوزىنىڭ مىنەزى دۇرىس سياقتى كورىنەدى. ءبىراق ونەر ادامداردىڭ بارلىعىندا مىنەز بار. نەگىزى كوبىسى ايتادى، ساحناداعىداي ەمەسسىز دەپ، مەن ساحنادا وجەت، مىقتى، ۇستانىمى مىقتى، جىگەرلى ايەل سياقتى كورىنەدى ەكەنمىن. شىنىندا مەن وتە نازىكپىن»، - دەيدى ول.
مەرۋەرت تۇسىپبايەۆا
ال ءانشى مەرۋەرت تۇسىپبايەۆا بولسا، شالكەز مىنەزىن ەش جاسىرمايدى. وزىنە تيىسكەندەردى ايامايمىن، تىك مىنەزدىڭ ارقاسىندا جۇرتقا جاقپاي قالاتىنىم تاعى بار دەيدى.
«مەن تىكپىن. ۇناسا ۇنادى دەيمىن، ۇناماسا ۇنامادى دەيمىن. مەن امانداسپايمىن، كوڭىل-كۇيىم جاقسى بولسا سويلەسەمىن، جاقسى بولماسا مەن ەشكىمگە، كەشىرىڭىز، جاعىمپازدانىپ، وي بۇل پروديۋسەر، وي بۇل كينوعا تۇسىرمەي قويادى-اۋ، جاقسى امانداسايىن، بەتىنەن سۇيەيىن دەگەن سياقتى مەندە ونداي بولمايدى»، - دەپ اعىنان جارىلدى ءانشى مەرۋەرت تۇسىپبايەۆا.
روزا ءالقوجا
ال روزا ءالقوجا تىپتەن سابىرلى بولىپ شىقتى. كۇنى كەشە ونەر يەسى ورامال ساتاتىن دۇكەنىنە ءۇش بىردەي ۇرى تۇسكەن. بۇل تۋرالى ءانشىنىڭ ءوزى الەۋمەتتىك جەلىگە سالىپ، كوپشىلىكپەن ءبولىستى. قالادا بولماعان ءانشىنىڭ جوقتىعىن باسىنعان ۇرىلار 40 مىڭ تەڭگە مەن ساتۋشى قىزدىڭ قۇجاتتارىن ۇپتەپ كەتكەن.
ەرنار ايدار
ەركە مىنەزىمدى تەك ۇيدە عانا كورسەتەمىن دەگەن ەرنار ايدار جاقىندا «جاراي ما؟» اتتى جەكە كەشىن ۇيىمداستىردى. قۇشاق-قۇشاق گۇلدىڭ استىندا قالعان ونەر يەسى جينالعان جۇرتتى جاڭا تۋىندىسىمەن قۋانتتى.
«ساحنادا بارىنشا قويىلىم كوپ بولادى عوي، ونى وزگەرتۋگە تۋرا كەلەدى. مەنىڭ مىنەزىم بار دەپ انانى مىنانى كورسەتۋگە بولا بەرمەيدى. وعان باعىنامىز ءبارىمىز. اعا-اپكەلەرىمىزدىڭ جولىن، ءىزىن باسىپ كەلە جاتىرمىز»، - دەيدى ەرنار ايدار.
ءانشى ەرناردىڭ كونسەرتتەن كەيىن جۇمىس كەستەسى تىعىز. ءتۇرلى شەتەلدەرگە شاقىرتۋ الۋدا. باسى داۋعا قالىپ، مىنەزدەرىن بارىنشا اشىق كورسەتىپ جۇرگەن ونەر جۇلدىزدارى دا باسىم. ولاردىڭ اراسىندا ءانشى بەيبىت قورعان، «شىمكەنت-شوۋ» تەاترىنىڭ اكتەرى بەرىك تۇرسىنبەكوۆ تە بار. دەگەنمەن، وسىندايدا «ۇلىق بولساڭ، كىشىك بول» دەگەن سوزدەر ەرىكسىز ەسكە تۇسەتىنى انىق.