وتباسى ءۇشىن ونەرىن قۇربان ەتكەن قازاق ونەرپازدارى

استانا. قازاقپارات - ءارتىس بولامىن دەگەن بالا كۇنگى ارمان، ونەر الەمىندە ءوز ورنىمدى تابامىن دەگەن تالپىنىس - مۇنىڭ ءبارى قازىردە ارتتا قالعان ءبىر ەلەس سەكىلدى.

وتباسىنىڭ بەرەكەسى ءۇشىن ونەرىن ىسىرىپ قويىپ، تۇرمىس تىرلىگىنە كىرىسكەن ونەرپازدار از ەمەس. Baistars.kz باسىلىمى ونەر الەمىنەن الىستاپ، وتباسىنىڭ ۇيىتقىسىن كەلتىرىپ وتىرعان ونەر يەلەرىن نازارلارىڭىزعا ۇسىنادى.

ۇلىقپان جولداسوۆتىڭ جۇبايى ايعان جولداسوۆا مەكتەپتە وقىپ جۇرگەندە فورتەپيانودا شەبەر ويناعان. اۋىلداسى ۇلىقپان جولداسوۆ تا ونى ءدال فورتەپيانودا ويناپ وتىرعان ساتىندە بايقاپ قالادى. كەيىن ءوزىنىڭ انسامبلىنە شاقىرادى. وسىلايشا انسامبلمەن تالاي كونسەرت قويىپ، گاسترولدەرگە اتتانعان.

ەكەۋى دۋەت قۇرىپ ونەر كورسەتكەن كەزدەرى دە از ەمەس. دەگەنمەن، ايعان حانىمنىڭ اكەسى قىزىنىڭ ونەر جولىن تاڭداۋىنا قارسى بولعان ەكەن. سول سەبەپتى ول دارىگەردىڭ وقۋىن وقيدى. ءبىراق سوعان قاراماستان ەكى جاس ۇيلەنگەن سوڭ دا بىرىگىپ ونەر كورسەتۋدى جالعاستىرادى. الايدا ۇل-قىزدارى دۇنيەگە كەلگەن سوڭ ايعان حانىم بالا تاربيەسىمەن اينالىسىپ، جولداسى ۇلىقپاننىڭ ونەر الەمىندە ءوز ورنىن تابۋعا بار مۇمكىندىگىن جاسايدى. قازىردە ول سازگەردىڭ بارلىق مەنەدجەرلىك جۇمىستارىن رەتتەۋمەن اينالىسادى.

تانىمال ءانشى ساكەن مايعازيەۆ جارى دينارامەن ونەر ينستيتۋتىندا بىرگە وقىعان. ياعني دينارا دا «ۆوكال» مامانى. ساكەن مايعازيەۆ ءتىپتى ايەلىنىڭ قىزىل ديپلوم الىپ، ال ءوزىنىڭ كوك ديپلوم العانىن دا جازعان ەدى. الايدا ستۋدەنتتىك جىلداردان كەيىن دينارا كاسىبىن اۋىستىرىپ، لوگوپەد ماماندىعىن يگەرەدى. ەكى جاس «ءبىر وتباسىندا ءبىر ونەر ادامى جەتەدى» دەگەن قاعيدانى ۇستانعان بولسا كەرەك، دينارا جولداسىنىڭ ونەر جولىندا ورلەۋىنە سىرتتاي تىلەكشى بولىپ قانا كەلەدى. الايدا انشىگە ۆوكالدىق جاعىنان كەڭەس بەرىپ تۇراتىن كورىنەدى.

اسىل بەدەلحان اتاقتى «وردا» توبىنىڭ مۇشەسى ەربولات بەدەلحانعا تۇرمىسقا شىقپاي تۇرىپ «داۋىس International« توبىندا ونەر كورسەتكەنىن بىلەمىز. ول سوليست بولىپ جۇرگەندە اتالمىش توپ حالىق اراسىندا تانىمالدىلىققا يە بولدى. ءارتىس بولۋدى ارمانداعان اسىل كىشكەنتاي كەزىنەن ءان، بيمەن اينالىستى.

بولاشاق جارى ەربولاتپەن دە وسى ءبي توبىندا ونەر كورسەتىپ جۇرگەندە تانىسقان. ونەر جولىندا ءوز ورنىن تابۋعا بەل بۋعان اسىل وتباسىن قۇرماي تۇرىپ، جەكە ءانشى بولىپ قالىپتاسقىسى دا كەلدى. الايدا بۇل ءىسى وڭعا باسپادى ما، كەيىن ەربولاتتىڭ ۇيلەنۋگە ۇسىنىسىن قابىلداپ، تۇرمىستىق ومىرگە باسىمەن كىرىسىپ كەتتى. ءبىر جىلدارى اسىل ۇلتتىق ارنانىڭ «قازاقستان داۋىسى» جوباسىنا قاتىسقانىن دا بايقادىق. سوعان قاراعاندا اسىل ءالى دە ونەرمەن قوش ايتىسقىسى كەلمەيتىن كورىنەدى.

Superstars.kz تەليەۆيزيالىق جوباسىنىڭ قاتىسۋشىسى جانار حاميتوۆا نۇرجان كەرمەنبايەۆپەن «ارناۋ» توبىن قۇرىپ، حالىقتىڭ سۇيىسپەنشىلىگىنە بولەندى. ەكى جاستىڭ ماحابباتى جايلى دا ايتپاعان، جازباعان باسىلىم بولمادى. الايدا ءبىر ساتتە جانار حاميتوۆا توپتان كەتىپ، نۇرجانمەن اراداعى قاتىناسىن ءۇزدى. بۇعان سەبەپ - ونىڭ جاڭا ماحابباتى بولعان. قازىر جانار ەكى بالانىڭ اناسى، وتباسىنىڭ ۇيىتقىسىن كەلتىرىپ وتىرعان اياۋلى كەلىنشەك. ول ساحنالىق ءومىرىن ءبىرجولاتا تاعدىرىنان سىزىپ تاستاعىسى كەلگەندەي. قازىردە ول جايلى ب ا ق- تا ەش اقپارات جوق.

لەنارا - 2000-جىلداردىڭ باسىندا قۇرىلعان «راحات-لۋكۋم» توبىنىڭ جارقىن انشىلەرىنىڭ ءبىرى. ول توپتا 7 جىل بويى ونەر كورسەتكەن. كەيىن رەسەيلىك Hi-Fi توبىنا شاقىرتۋ العان كورىنەدى. الايدا ولاردىڭ تىعىز گرافيگى قىزدىڭ كوڭىلىنەن شىقپاپتى. توپتا ءان ايتىپ جۇرگەندە وعان قازاقستاندىق اتاقتى بيزنەسمەن، Raimbek Group حولدينگىنىڭ ديرەكتورى رايىمبەك باتالوۆ عاشىق بولادى. كەيىن ول لەناراعا ۇيلەنۋگە ۇسىنىس جاسايدى. قازىر لەنارا ءتورت بالانىڭ اناسى.

قازاقستاندا قىزداردان قۇرالعان توپتاردىڭ ءداۋىرى ەندى باستالىپ كەلە جاتقاندا ەسترادادا «سۋنەكەش» توبى پايدا بولىپ، كوپشىلىكتىڭ كوڭىلىنەن شىققان ەدى. قىزداردىڭ قازاقيلىعى، ۇزىن كويلەكتەر كيىپ، قازاققا جاقىن اندەردى ورىنداۋى توپتى بىردەن تانىمال ەتتى. اسىرەسە توپ قۇرامىنداعى قىزداردىڭ سۇلۋلىعى كوزدىڭ جاۋىن الاتىنداي ەدى. توپ سوليسى شامشىناحار توپ تاراعان سوڭ دا جەكە ءانشى بولۋعا تالپىنىپ كوردى. ءتىپتى ساكەن مايعازيەۆپەن دۋەت ورىنداپ، بەينەبايان تۇسىرگەن ەدى. الايدا تۇرمىس قۇرعان سوڭ ساحنادا جۇلدىز بولىپ جارقىرايمىن دەگەن ارمانى سۋ سەپكەندەي باسىلدى. باسىنا ورامال بايلاعان شامشىناحاردى جاقىندا ايگەرىم قالاۋبايەۆانىڭ «بەنەفيس-شوۋىندا» عانا كوردىك.

اقىلبەك جەمەنەي جۇبايى ورىنكۇل ابىشيەۆانىڭ دا ۆوكالدىق قابىلەتى مىقتى، ءبىر كەزدەرى ءان ايتىپ، ساحنادا ونەر كورسەتكەنىن ءبىر سۇحباتتارىندا ايتقان. ءتىپتى كەيىن ايەلىنە مۇمكىندىك بەرىپ، ساحناعا قايتا شىعارعانى دا بار. ورىنكۇلدىڭ ساحناعا ورالعانىن ءبىرقاتار ب ا ق تا جازىپ ۇلگەردى. دەگەنمەن، ءبىراز ۋاقىت وتكەن سوڭ ورىنكۇل ءۇشىنشى بالاسىن دۇنيەگە اكەلىپ، قايتا وتباسىنىڭ قامىنا كىرىسۋىنە تۋرا كەلدى. بالكىم، بۇل ءبىر «بەلگى» بولار.