نۇرعيسا تىلەنديەۆ قايرات بايبوسىنوۆقا قالاي وكىل اكە بولدى؟

نۇر- سۇلتان. قازاقپارات - قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى، ءانشى قايرات بايبوسىنوۆ «استانا اقشامى» گازەتىنە بەرگەن سۇحباتىندا نۇرعيسا تىلەنديەۆتىڭ وزىنە قالاي وكىل اكە اتانعان وقيعانى ايتىپ بەردى.

«مەكتەپتە وقىپ جۇرگەندە قاراعاندىعا الماتىداعى اباي اتىنداعى وپەرا جانە بالەت تەاترى جازعى گاسترولدىك ساپارمەن كەلدى.

ونى اتالعان تەاتردىڭ ديرەكتورى، كەيىن مادەنيەت ءمينيسترى بولعان جەكسەنبەك ەركىنبەكوۆ اعامىز باستاپ كەلدى. تەاتر قۇرامىندا عاريفوللا قۇرمانعاليەۆ، نۇرعيسا تىلەنديەۆ، ەرمەك سەركەبايەۆ، ايسۇلۋ بايقاداموۆا جانە انۋاربەك ۇمبەتبايەۆ سەكىلدى بىرىنەن ءبىرى وتكەن ايگىلى انشىلەر بار. سوندا نۇرعيسا اعامىز ءوزى فورتەپيانودا ويناپ، مەن ونىڭ «جانساۋلەم» دەپ اتالاتىن ءانىن قوسىلا ورىندادىم.

ونەرىمە ريزا بولعانى سونشالىق نۇراعام مەنى كوتەرىپ الىپ: «ماعان بالا بولاسىڭ با؟» - دەدى. «مەن بولامىن»، دەدىم. وسى ءسوزدى اللا اۋزىما سالعان بولار، الماتىعا وقۋعا تۇسكەندە جۇسەكەڭنىڭ ساباعىنا «قايراتتى تىڭداپ كەتەيىن» دەپ ءجيى كەلەتىن.

وقۋىما دا ءبىر جىل بولماعان شاق ەدى. بىردە نۇرعيسا اعام كەلدى. «جۇسەكە، «قىز جىبەك» فيلمى تۇسىرىلەدى. تولەگەننىڭ اندەرىن قايراتقا ورىنداتام. بالامدى ماعان بەر» دەپ سۇرادى. ۇستازىم ابدىراپ قالدى. «قايرات ءالى ءاننىڭ الىپپەسىن اياقتاعان جوق. ەندى باستاپ جاتىر، شيكى عوي»، دەدى. «جوق، قايرات ءاندى الىپ كەتەدى. وعان سەنىمىم مول» دەپ نۇراعام نىقتاپ قويدى.

قولىمنان جەتەكتەپ كينو ءتۇسىرىپ جاتقان الاڭعا الىپ باردى. فيلمدى قاپشاعاي جاقتا ءتۇسىرىپ جاتىر ەكەن. كۇن شىجىعان ىستىق. تۋرا توبەڭنەن وتەدى. ماعان سانسىزبايدىڭ ءرولىن بەرمەكشى بولدى. ودان باس تارتتىم. مەن ءانشىمىن، اكتەرلىك قولىمنان كەلمەيدى دەپ. تولەگەننىڭ اندەرىن تولىق ورىنداپ شىقتىم. ءسويتىپ، ونەردەگى وكىل اكەم - نۇرعيسا بولدى»، - دەيدى ءانشى قايرات بايبوسىنوۆ.