باقشالاردان قۇس ءۇنى بوپ جاڭعىردىم - مۇراتحان شوقاننىڭ ولەڭدەرى
قۇمارلىق
جاقىن بارسام كىرپىگىڭمەن جاسقايسىڭ،
سىزۋلى ءبىر سىزىقتاردان اسپايسىڭ.
قارماقشىدان سەزىك العان سازانداي،
تەرەڭىڭە جاسىرىنا باستايسىڭ.
ءمولدىر كولدەن مولتەك- مولتەك سىر اۋلاپ،
مەنىمەن ءبىر مۇڭعا باتىپ تۇر اۋماق.
ءمولدىر كولدىڭ جاعاسىندا قالارمىن،
بالكىم مەنىڭ قىسىم كەلەر قىراۋلاپ...
ەركىڭ ءبىلسىن، ايتەۋىر سەن وكىنبە،
مەن دايىنمىن كەلسەڭ قانداي بەكىمگە.
شاتتىعىمنان تونالعانىم تۇك تە ەمەس،
تونالۋعا تولى جەردىڭ بەتىندە...
كەشقۇرىمعى سۋسىلىنداي قۇستاردىڭ،
ورنى بولەك سۇلۋلىققا قۇشتارمىن.
ۇستاعانداي ايدى كولگە ءتۇسىرىپ،
ۇستايمىن، تەك قالاي سەنى ۇستارمىن؟ !
جاپىراقپىن، قاراما سەن تىم شىتقىل،
قۇمارلىقتىڭ قۇشاعىندا تۇنشىقتىم.
بەۋ، دۇنيە- اي، جۇرەگىمدى تىستەپ اپ،
شىر- شىر ۇشىپ بارا جاتىر شىمشىق كۇن...
ساۋساعىمدى سوزامىن ءبىر بالعىنعا
قۇلاعىنا تالىپ جەتكەن سان قىردىڭ،
باقشالاردان قۇس ءۇنى بوپ جاڭعىردىم.
ساعان العىس و، ماحاببات، سەن مەنىڭ،
شولىركەسەم بار ءشولىمدى قاندىردىڭ...
ۇيىسقاق كەش، تولتىرىپ اپ ۋىسىن،
ماعان بەرگەن سەزىم قالاي سۋىسىن؟
سونان بەرى كەشتەر مەنىڭ جاقىنىم،
سونان بەرى تۇندەر مەنىڭ تۋىسىم!
شىڭ ەمەسپىن ءبىر ورنىندا بەزەرگەن،
كەشتەرىم بار، كەزبەدەيىن كەزەر مەن.
تۇندەرىم بار، جاي قايتاتىن ۇيىمە،
تاعدىرىم بار، ازدى- كوپتى ءسوز ەرگەن...
بەۋ، ومىرگە وكپە ارتاتىن مەن ەمەن!
مەنەن بۇرىن تالاي اقىن شەنەگەن.
سوزدەرىنە پىسقىرعان جوق ولاردىڭ،
سولاي ءومىر، سولاي بولعان كونەدەن...
ساۋساعىمدى سوزامىن ءبىر بالعىنعا...
ساعىنامىن، قۇلى بولام الدىندا.
مەن قولىمدى سوزباس ەدىم، ءتاڭىرىم،
گۇل شوقتارىن قاداماسا شالعىنعا!..
ۇيىسقاق كەش، تولتىرىپ اپ ۋىسىن،
ماعان بەرگەن سەزىم قالاي سۋىسىن؟
سونان بەرى كەشتەر مەنىڭ جاقىنىم،
سونان بەرى تۇندەر مەنىڭ تۋىسىم!
ەلەسىڭمەن سان اۋىرىپ ەمدەلدىم
ساعان ءسىرا قانداي سىيلىق بەرەمىن،
دۇنيەنىڭ ءبارىن ارزان كورەمىن...
ماحابباتقا سەنەر ەدىڭ مەندەگى،
كوڭىلىمنىڭ كوزىڭ شالسا تەرەڭىن.
جۇپار دەمى بۇرقىراعان ارۋدىڭ،
مولدىرەگەن تۇنىق كەشكە ءزارۋمىن.
قۇلانتازا ارىلتادى ول مەنى،
ازابىنان جانىمداعى بار ۋدىڭ...
جابىرقاسام سەنى ەسىمە الامىن،
ىشتەي عانا شىرقايتۇعىن بال ءانىم.
ۇناتامىن سەنىڭ نازىك جانىڭدى،
سەزىمىنەن جاراتىلعان دالانىڭ...
ساعان جاقىن بارار ەدىم ءبىر تابان،
وتە المايمىن وزەندەر مەن قىرقادان.
جۇرەگىمدى ۇنگە مالام تۇندەردە،
سانامداعى سارعالداق قۇس شىرقاعان.
ەلەسىڭمەن سان اۋىرىپ ەمدەلدىم،
دەگەنىنە كونسەم بە ەكەن مەن جەلدىڭ؟
ەن دالاعا شاقىرادى ول مەنى،
قوڭىراۋىن ىسقىرىق قىپ شەڭگەلدىڭ...
بىزدە ءبارى جاقسى ەدى...
عاشىقتارعا كوڭىلىن كىم بولەدى؟
ءتيدى بىزگە قاراڭعى ءتۇن كومەگى.
تال- قايىڭدار باسىندا سىبىرلادى،
ۇيالدى ما، ازدان سوڭ ۇندەمەدى...
قۇشاعىمدا ءشولىمدى باسىپ تۇردىڭ،
وسى ساتكە قانشاما اسىقتىردىڭ.
شىمىلدىعىن تابيعات ءتۇسىردى دە،
ار جاعىنا اي كەتتى اسىپ قىردىڭ.
اقىلعا قاس، بويداعى توزىمگە قاس،
وڭاشادا كۇي كەشتىك سەزىمگە ماس.
بۇلاق جاتتى بۇرىمى سۋ- سۋ بولىپ،
جاپىراقتىڭ جالعىز تال كوزىندە جاس...
قاشىپ شىعىپ قالادان جۇمىسقا لىق،
كىردىم سەنى ورمانعا جىنىسقا الىپ.
كوڭىلدەردى جاپ- جاسىل نىلمەن جۋىپ،
تازاۋىز اۋامەن تىنىستادىق...
كولەڭكەنىڭ سەكىلدى ۇشقان مۇڭى،
قالاي بولگەن قۇدايىم قۇستان مۇنى؟ ..
بىزدە ءبارى جاقسى ەدى... ءدىر ەتكىزگەن،
جاپالاقتىڭ بولماسا دۇشپاندىعى...
كۇلىپ تۇرىپ...
كۇلىپ تۇرىپ نەگە رەنجىپ قالاسىڭ؟
كورسەتپەشى جانارىڭنىڭ الاسىن!
ونسىز- داعى ءجۇرمىن زورعا كوتەرىپ،
مەيىرىمسىز عاسىرىمنىڭ نالاسىن...
ءوزىمسىنىپ ماعان اركەز وكپەلەپ،
كوڭىلىمدى ءجۇرسىڭ مۇڭعا كوپ بولەپ...
كەيدە مەنى قورقىتاسىڭ كەتەم دەپ،
مەن جالىنام كەتە كورمە، كەتپە دەپ!
وسى ساعان جاراساتىن قىلىق پا،
بىرەۋ ەمەن باتىپ جۇرگەن بىلىققا...
تورىماسىن باسقا اۋىلدىڭ ىرگەسىن،
سەزىمىمدى اش بورىدەي ۇلىتپا!..
مەن ءوزىمدى كورگەنىم جوق زور تۇتىپ،
قايتەم سەنى كەتەمىن دەپ قورقىتىپ.
الدا تالاي تۇرعوي كۇتىپ جاقسىلىق،
الدا تالاي تۇرعوي اپپاق جول كۇتىپ...
كۇلىپ تۇرىپ نەگە رەنجىپ قالاسىڭ؟
كورسەتپەشى جانارىڭنىڭ الاسىن!
ونسىز- داعى ءجۇرمىن زورعا كوتەرىپ،
مەيىرىمسىز عاسىرىمنىڭ نالاسىن...
ەن شالعايعا اتتاناسىڭ...
ەن شالعايعا اتتاناسىڭ سەن ەرتەڭ،
قول بۇلعايسىڭ اينەگىنەن كولىكتىڭ.
ءوزىڭ جوقتا نە ىستەر ەكەم مەن ەركەم،
كوڭىلىمدى سەرگىتەدى كەلىپ كىم؟
جاماي الماي سىنىق ايدىڭ كەتىگىن،
قۇس جولىندا ارلى- بەرلى جۇرەرمىن.
جەتى جىلدان ۇزاق بولىپ جەتى كۇن،
قاسىما تەز كەلۋىڭدى تىلەرمىن!
سىركىرەگەن جازعى جىلى جاڭبىردا،
ەرىك بەرىپ ساعىنىشتىڭ ىرقىنا.
مەنىمەنەن ءىزىڭ قالعان سان قىردا،
بالكىم، بارىپ قايتام قالا سىرتىنا...
ءسال جاياۋلاپ كۇبىرلەرمىن جىرىمدى،
سۇرلەۋمەنەن قالعان ەسكى قاۋ باسىپ.
وكىنەرمىن ءبىر بولعاندا بۇرىنعى،
وكپەلەتكەن كەزىمدى ويلاپ داۋلاسىپ...
ەن شالعايعا اتتاناسىڭ سەن ەرتەڭ!
سەن كەتكەلى
سەن كەتكەلى، مازاسىزبىن نەشە كۇن؟
كۇندەرىمدى ساعىنىشپەن كەشەمىن.
ءجۇرىپ كەلەم، ءوزىڭ شىعا كەلەردەي،
بىرەۋىمەن جارىعى ءالسىز كوشەنىڭ...
باعانداردا فونار جىمىڭ قاعىسىپ،
اتجۇيرىك اي تۇر اسپانعا جابىسىپ.
كوبەلەكتەر شىر اينالىپ شىراقتى،
ءتۇننىڭ ءبيىن بيلەپ جاتىر تابىسىپ...
اركىمنىڭ ءوز قۋانىشى بار كۇتكەن،
سەنسىز تۇندەر مازالايدى تارلىقپەن.
الاتاۋدىڭ ءبىر شىڭىنا شىعىپ اپ،
ساعان قاراي كەتەيىن بە قارعىپ مەن؟
ساعىنىشىم ءجۇر مازامدى كەتىرىپ،
ساعىنىشسىز سۇرگەن ءومىر وتىرىك!
ۇيقىم مەنىڭ، شىقتىداعى كورپەمنەن،
قاشىپ كەتتى تەرەزەمنەن سەكىرىپ...
سەن كەتكەلى، مازاسىزبىن نەشە كۇن؟
تۇندەرىمدى ساعىنىشپەن كەشەمىن.
ءجۇرىپ كەلەم، ءوزىڭ شىعا كەلەردەي،
بىرەۋىمەن جارىعى ءالسىز كوشەنىڭ...
ەرتە ۇشىپ جەتەرسىڭ
و، مەنىڭ جانى تازا كوركەم قۇسىم،
ەرتە ۇشىپ جەتەرسىڭ ەرتەڭگىسىن.
تۇنىمەن ءوزىڭدى ويلاپ ۇيىقتامادىم،
تۇنىمەن كۇزگى اتىزداي ورتەندى ءىشىم.
سوندىرمەي سەنى كۇتتىم تىلدەسكىمدى،
ءتۇن تۇردى يىعىمدا ءزىل كەسكىندى.
جۇلدىزداردان تامادى ساپ- سارى ءنىل،
وزىڭدەي ساعىنباپپىن مۇلدە ەشكىمدى.
ساعات تا تۇرىپ الدى تاڭداي قاعىپ،
وتپەيتۇعىن ءتۇن ەدى قانداي، ناعىپ.
ءوزىنىڭ باعىندىرىپ قۇدىرەتىنە،
جۇرەتىن ءبىر نارسە بار قاندا اينالىپ.
ۇيقىمدى دەگەن ەدىم توناتپايىن،
بولدى ونىم پايداسى جوق شولاق پايىم.
ماسا دا ىزىڭ قاعىپ مازامدى الدى،
ماس كەلگەن شاقىرىلماعان قوناقتايىن...
و، مەنىڭ جانى تازا كوركەم قۇسىم،
ەرتە ۇشىپ جەتەرسىڭ ەرتەڭگىسىن.
تۇنىمەن ءوزىڭدى ويلاپ ۇيىقتامادىم،
تۇنىمەن كۇزگى اتىزداي ورتەندى ءىشىم.
قاشان كەلەسىڭ
جوعالتقانداي جەر بەتى اسەمدىگىن،
جولعا قاراپ كوڭىلىم باسەڭ بۇگىن...
سەنى اكەلمەي كولىكتەر قۇر كەلەدى،
سەنسىڭ مەنىڭ جانىمنىڭ ءبىر بولەگى.
سەنىمەنەن اعىسىم كۇشتى مەنىڭ،
سەيىلتەسىڭ سەرپىلتىپ ءىش تۇنەگىن.
كەزىم از با كوڭىلىم قارايماعان،
سەنى كورسەم قۋانام، ارايلانام.
ءنار سىيلايدى جانىما نازىكتىگىڭ،
سەنى تاپپاي وتىرمىن قاجىپ بۇگىن.
بۇل عاسىردا تۇرمىسى اۋىرلاعان،
بارلىق ادام بالاسى باۋىر ماعان.
قاڭعىباستار پاناسىز كوشەدەگى،
مەنىڭ قانشا مۇڭىمدى ەسەلەدى.
سونىڭ ءبارىن كوتەرەر كۇش بەرەسىڭ،
مەنىمەن ءبىر سۇمدىققا تىستەنەسىڭ...
جوعالتقانداي جەر بەتى اسەمدىگىن،
جولعا قاراپ كوڭىلىم باسەڭ بۇگىن...
سەن كەلمەدىڭ كوڭىلسىز ىمىرت ماعان،
اي تۋادى ازدان سوڭ مۇڭ ۇرتتاعان...
