الەمدىك سنوۋبورد ساڭلاقتارى قىتايدىڭ التاي قالاسىندا ءجۇر

استانا. قازاقپارات - الەمدىك دارەجەدەگى سنوۋبورد جانە قار شاڭعى شەبەرلەرى قىتاي قازاقتارىنىڭ قالاسى التايعا كەلدى.

ولار قالا ماڭىنداعى «گەنەرال قار شاڭعى الاڭىندا» ارنايى تەلە جوبانىڭ تۇسىرىلىمىنە قاتىسپاق. قوناقتاردى قىتايلىق سنوۋبورد ۇزدىگى ۋاڭ لي باستاپ كەلىپتى. ا ق ش، شۆەتسيا، اۆستراليا سەكىلدى ەلدەردەن كەلگەن تاڭداۋلى سپورتشىلار جەرگىلىكتى شاڭعى شەبەرلەرىمەن كەزدەسىپ، تاجىريبەلەرىمەن ءبولىستى.

ەڭ باستىسى، شەتەلدىك ساڭلاقتار ەجەلدەن بەرى قازاقتار قونىستانىپ كەلە جاتقان التاي سەكىلدى قالانىڭ تابيعاتىنا، اسىرەسە، سنوۋبورد سپورتىنا وتە ىڭعايلى تاۋلارىنا قىزىققاندارىن ايتتى.

ال، قازاق حالقىنىڭ 2 مىڭ جىلدىق تاريحى بار قار شاڭعى ونەرىن، تابيعي اعاش پەن جىلقى تەرىسىنەن جاسالعان شاڭعىنى كيىپ كورگەن الەمدىك سنوۋبورد شەبەرلەرى تاڭدانىستارىن جاسىرا المادى.

Baq.kz