انيماتسيالىق «قازاق ەلى» فيلمىندە اندەردى نۇرلان ابدۋللين، ساكەن مايعازيەۆ ورىندادى - كەسكىن
«قازىر پروكاتتىڭ الدىندا ورىس تىلىندە دىبىستاۋ شارالارى جۇرگىزىلۋدە. نەگىزى قازاق تىلىندەگى نۇسقاسى تولىق دايىن» ، - دەدى باس پروديۋسسەر.
ونىڭ سوزىنە قاراعاندا، جالپى دىبىستاۋ جۇمىستارىنا عابيت مۇسىرەپوۆ اتىنداعى بالالار جانە جاسوسپىرىمدەر تەاترىنىڭ اكتەرلەرى اتسالىستى. «ىشىندە اندەردى ورىنداۋعا نۇرلان ابدۋللين، ساكەن مايعازيەۆ سياقتى انشىلەر تارتىلدى» ، - دەدى ءسابيت ءابدىقالىقوۆ.
انيماتسيالىق فيلمنىڭ ەلىمىزدىڭ كينوتەاترلارىنداعى رەسمي پروكاتى ناۋرىز ايىنا جوسپارلانعان. «ساق» كينوستۋدياسى فيلمنىڭ حرونومەتراجى 75 مينۋتتىق تولىقمەتراجدى نۇسقاسىن دايىندادى. ايتا كەتەيىك، قازاقستان انيماتورلارى ساپالى انيماتسيالىق لەنتانى شەتەل مۋلتفيلمدەرىنە قاراعاندا 60 ەسە ارزان بيۋدجەتپەن جاساپ شىعاردى. فيلمنىڭ ديرەكتورى نۋريددين پاتتەيەۆتىڭ ايتۋىنشا، كارتينانىڭ بيۋدجەتى 375 ميلليون تەڭگەنى قۇرادى.
فيلمنىڭ تاريحي كەڭەسشىسى - تاريح عالىمدارىنىڭ دوكتورى، پروفەسسور جامبىل ارتىقباي. فيلمنىڭ ادەبي كەڭەسشى - دۋلات يسابەكوۆ، رەجيسسەرى - باتىرحان داۋرەنبەكوۆ، ستسەناريسى - ساعادىلدا ۇسىباليەۆ، باقىتجان قۇلجاباي، كومپوزيتورى - رۋسلان شىنىقۇلوۆ، قويۋشى سۋرەتشىسى - ازامات ەرنازاروۆ، فيلمنىڭ ديرەكتورى - نۋريددين پاتتەيەۆ، باس پروديۋسسەرى - ءسابيت ءابدىقالىقوۆ.
فيلمدەگى وقيعا جەلىسى كەرەي مەن جانىبەكتىڭ بالا كەزدەرىنەن باستاپ ەسەيىپ، ەرجەتىپ، ەل باسقارىپ، قازاق حاندىعىن قۇرعانعا دەيىنگى ارالىقتى قامتيدى. فيلمنىڭ ماقساتى بالالاردىڭ ءوز تاريحىن تۇسىنۋىنە، كەرەي مەن جانىبەكتەي باتىرلاردىڭ قازاق حاندىعىن قالاي قۇرعانىن ءبىلىپ، سولارعا ەلىكتەۋگە، ءوز ەلىنىڭ پاتريوتى بولىپ وسۋلەرىنە جول اشۋ بولىپ تابىلادى.
