بۇگىنگى قازاق ۇرپاعى تاۋەلسىزدىك جولىندا جان الىپ، جان بەرىسپەگەن ۇرپاق - امانگەلدى ايتالى

None
None
نۇر- سۇلتان. قازاقپارات - قازاق ۇلتىنىڭ بۇگىنگى تىنىسى كۇردەلى. ۇلتقا ءتونىپ تۇرعان قاۋىپ - ۇلتسىزدىق.

بۇل اسقىنىپ كەتكەن دەرت، ونىڭ ميكروبتارى ۇلتتىق ورگانيزمدى كەڭىنەن جايلاعان. الدىن السا ۇلتسىزدىقتان، ورىسشىلدىقتان بارا-بارا ايىعۋىمىز دا مۇمكىن، ال، بۇل ماسەلەدەگى نەمقۇرايلىلىق، سامارقاۋلىق، ۇلتتىڭ تۇگەلدەي اسسيميلياتسياعا ۇشىراۋىنا اكەلەدى.

... ۇلتسىزدىقتىڭ ءبىر كوزى قازاق ينتەلليگەنسياسىنىڭ ۇلتتىق قۇندىلىقتان گورى جىلى ورىندى جوعارى باعالايتىن كورسوقىرلىعىندا جاتىر. عاسىردان عاسىرعا، اتادان بالاعا كوشىپ وتىرعان ءزاۋزاتتىق تانىمنان ۇلتتىق ورىستانا باستاعان بولىگى اجىراپ قالدى.

... بۇگىنگى قازاق ۇرپاعى تاۋەلسىزدىك جولىنداعى كۇرەستە ومىرگە كەلگەن ۇرپاق ەمەس. ۇلتتىق رۋحانيلىقتى، ءتىلدى ويداعىداي قولداي الماي وتىرعانى دا وسىدان. جان الىپ، جان بەرىسپەگەن ۇرپاق. شىنىن ايتقاندا، ۇلتقا ۇلگى بولاتىن جانقيار ەرلەرىمىز دە، پارتيامىز دا، سەركەمىز دە جوق.

تاۋەلسىزدىك العان حالىقتار ءۇشىن ەڭ ماڭىزدى ماسەلە رۋحاني وتارشىلدىقتىڭ زاردابىنان ارىلۋ. سەبەبى، وتارشىلدار ءوزىنىڭ تاريحىن، مادەنيەتىن، ءتىلىن، ءومىر سالتىن وتارلانعان حالىققا اياماي ءسىڭىرىپ كەتەدى. سونىڭ ناتيجەسىندە، ءبۇتىن حالىقتىڭ رۋحاني بولمىسى لاستانادى... وسىنى اڭگىمە ەتە قالساڭىز، قۇلدىق ساناداعى قاۋىم: بىزدەگى جاعداي باسقاشا عوي، قازاقستان كوپ ۇلتتى ۇلتتى ەل عوي، دەپ شىعا كەلەمىز. ءسوز جوق، ەلدىڭ بىرلىگى مەن تاتۋلىعى قاجەت. ءبىراق قانداي يدەيا نەگىزىندە بىرىگىپ، تاتۋلاسامىز. ماسەلە وسىندا. وسىنداي جاسقانشاقتىقتىڭ سالدارىنان قازاقشا سويلەۋدى قويدىق، ءالى ۇلتسىزدانۋ دەرتىنەن ايىعار ەمەسپىز.

ۇلتسىزدىقتان ارىلۋ جولدارى:

قوعام ومىرىنە قازاقى ورتا قالىپتاستىرۋ؛

تاريحي سانانى تەرەڭدەتۋ؛

مۇسىلمانشىلىقتى، داستۇرلىكتى جاڭعىرتۋ؛

قازاقستانداعى ورىستاردى تاريحي شىندىققا كوزىن جەتكىزۋ، مەنمەندىكتەن ارىلتۋ؛

ۇلتسىزدانعان قازاقتاردىڭ توپ- دەڭگەيىن انىقتاپ، ءارتۇرلى توبىنا ارنالعان ۇلتتىق- اعارتۋ باعدارلاما جاساۋ؛

ب ا ق جۇمىسىن تۇبەگەيلى ۇلتتىق رۋحاني ماقساتقا بەيىمدەۋ.

(ۇلت تانۋ «ارىس» باسپاسى، الماتى - 2000. 185-ب)


سوڭعى جاڭالىقتار