سۇرىنگەنىن سەكىرگەندەي كورسەتە بىلەر بار - ا. سۇلەيمەنوۆ
- وت پەن ءتۇتىن، ادام مەن قىلمىس جاتىرلاس.
- قالانىڭ پاسپورتى - تاكسي مەن بازار. مەن ءۇشىن - تاكسي.
- اشۋعا ەرىك بەرگەن ادام بوسانىپ كەتكەن قاباعانمەن بىردەي. ونسىز دا كوپ قاباعاندى بۇگىنگى كۇن قاراقۇرىم قىلدى.
- وتىرىكتى كەشىرۋگە بولادى، تەك اقتاۋعا ەمەس.
- كەي كەتىكتىڭ تاراعى دا كەتىك بوپ كەلەدى.
- تارانباعان ايەلدە ءبىر مەكيەننىڭ، تارانعان ايەلدە ەكى مەكيەننىڭ ميى بار.
- ەكونوميكالىق قاۋىپسىزدىكتىڭ ماسەلەسى، ەڭ الدىمەن، ۇلتتىق قاۋىپسىزدىكتىڭ ماسەلەسى.
- ەڭ تەرەڭ يدەيالار - قيىن يدەيالار.
- بىلمەگەن ءمىن ەمەس، بىلمەستىككە كونگەن ءمىن.
- ءتۇس - كۇندىز بۇققان ويدىڭ ويىنى.
- جەزدەڭ تاز بولسا، تەمىر تاراق سىيلا.
- كىسىلىگىن جوعالتپاسا جاۋىڭنىڭ قايسى ءبىر يتتىگىن كەشىرۋگە دە بولادى.
- شىن رەجيسسۋرا - جۇرەك سياقتى. سوققانى بىلىنبەيدى.
- ۇيالا الماعان ادام - ولىك.
- اجال كەلمەيدى. اجالعا باراسىڭ. بارعان بەتتە اۋديەنسيا بەرەدى.
- ايەل دالەلدەرمەن ەمەس، سەنىممەن تىرشىلىك كەشەدى.
- دوستىق، ەڭ الدىمەن، ەركىندىك.
- ءسوز - قۇلىن دا، وي - جىلقى.
- اشىق ايتۋ - انىق ايتۋ بولعانمەن، اقيقاتتى ايتۋ ەمەس.
- سۇرىنگەنىن سەكىرگەندەي كورسەتە بىلەر بار.
- قازاقتىڭ ەكى «جاۋى» بار. ءبىرى، دوس - جاۋى - اباي. قالعاندارى - قاس جاۋى.
- ءمىنسىز شىعارما جازۋ وڭاي. قيىنى - عۇمىرىڭدى ءمىنسىز شىعارماعا اينالدىرۋ.