داۋىل ءمۇزاراپ ۇلى. بۇگىنىم قىمبات ماعان كەشەگىدەن

None
None
استانا. قازاقپارت - «بۇگىندەرى قىتايدىڭ شىڭگىل اۋدانى تايكەشكەن جاتاقتى مەكتەبىندە ۇستازدىق قىزمەتىن جالعاستىرىپ كەلە جاتقان ۇلاعاتتى ۇستاز ءارى جۇرەگىندە سونبەيتىن جالىنى بار اقىن داۋىل ءمۇزاراپ ۇلى دەگەن اعامىز تۇرادى.

شىنجاڭ ۋنيۆەرسيتەتىنىڭ ادەبيەت فاكۋلتەتىن بىتىرگەن داۋىل ءمۇزاراپ ۇلى اعامىز ايتۋلى جىر دودالارىنا تۇسپەسەدە، بىرنەشە ولەڭى، ەكى ماقالاسى ولكەلىك باسىلىمداردا جارىق كورگەن. ول ەل اراسىندا ءجۇرىپ-اق قارا ولەڭدى جانىنا سەرىك ەتىپ، قالام تەربەپ كەلەدى»، - دەيدى اقىننىڭ ءبىر وقىرمانى.

د. ءمۇزاراپ ۇلىنىڭ وقىرماندارى جولداعان، قولدا بار بىرنەشە ولەڭىن ۇسىنىپ وتىرمىز.

 

قاسىڭدا قالماعانىم

 

ارالاپ الما باعىن،

شىرقادىق ارمان ءانىن.

تاپ بۇگىن جولىقتىرعان،

تاڭىرگە تاڭ قالامىن.

 

سىرىلسا اي قاباعىڭ،

سىرىڭدى اڭعارامىن.

سەن ءۇشىن جىر جازباسام،

باسقاشا بار ما امالىم.

 

باسىلعان ءار قادامىڭ،

اۋدارار جان نازارىن.

تاماشا تالعامىڭ مەن،

ۇنادىڭ اينالايىن.

 

قاسىڭدا قالماعانىم،

ىلەسىپ بارماعانىم،

تۇكپىرىن جۇرەگىمنىڭ،

وزىڭە ارناعانىم.

 

بۇگىنىم قىمبات ماعان كەشەگىدەن

 

 بۇگىنىم قىمبات ماعان كەشەگىدەن،

ساقتا اللا كەرباقپانىڭ كەسەلىنەن.

كەشەگىنىڭ قادىرىن كىم ۇمىتار،

جاڭىلعان جان بولماسا ەسەبىنەن.

 

بۇگىنىم قىمبات ماعان كەشەگىدەن،

ساقتا اللا ءوزىمشىلدىڭ وسەگىنەن.

بولەنىپ التىن ايدىڭ ساۋلەسىنە،

 تاڭعا اسىعام ارماننىڭ جەتەگىمەن.

 

 بۇگىنىم قىمبات ماعان كەشەگىدەن،

ساقتا اللا كوزسىزدەردىڭ كوسەۋىنەن.

مالىنىپ شىققان كۇننىڭ شۋاعىنا،

كوڭىلىم كوك جايلاۋعا كوشەدى ۇنەم.

 

بۇگىنىم قىمبات ماعان كەشەگىدەن،

ساقتا اللا بۇگىننىڭ بوس وتەرىنەن.

بۇگىندەردەن قۇرالعان عۇمىرىمدا،

كىم بىلەدى نەشە وكسىپ ، نەشە كۇلەم...

 

 كوكتەم ءۇنى

قىڭسىلاتقان كۇشىگىن كوك ءبورىنىڭ،

كوك جايلاۋ ءتۇسىپ وتىر ەسكە كۇنىم.

سايراعان بۇلبۇلدايىن بۇلا داۋسىڭ،

قۇلاعىما جەتكىزدى كوكتەم ءۇنىن.

 

ارشىلىپ جۇرەگىمنىڭ مۇز بوكتەرى،

دۇركىرەپ ۇشتى اسپانعا جىر كەپتەرى.

ءومىرى ادامزاتتىڭ بولمايما ۇزاق،

كوڭىلدىڭ كۇندە اشىلسا قىز كوكتەمى.

 

كوكتەم بوپ جىر نوسەرىن سەلدەتكەنىڭ،

بارادى جان قىلىمدى تەربەپ مەنىڭ.

بال جىردىڭ بۇلاعىمەن سارايدى اشتىڭ،

تۇرعاندا تۇگەپ ءتوزىم، شولدەپ سەزىم.

 

كوڭىل تۇلپار كوكسەيدى كوكتەگىنى،

قالاي ايتىپ جەتكىزەم كوپكە مۇنى.

قاباعىما مۇز- قىراۋ قونباس ءسىرا،

قۇلاعىمنان كەتپەسە كوكتەم ءۇنى.

  

قازاقتىڭ اقىن قىزدارى- اي

 (ءان ءسوزى )

 

جانىما سىيلاپ نۇرلى اراي،

جۇرەكتى تەربەپ تۇرعانى- اي.

داۋىسىڭ قانداي ادەمى،

(قازاقتىڭ اقىن قىزدارى- اي) 2.

 

مونشاقتاي ءمولدىر جىرلار- اي،

تۇرا الماس ادام تىڭداماي.

دارىپتەپ جۇرگەن ءداستۇردى،

(قازاقتىڭ اقىن قىزدارى- اي) 2.

 

جۇرەگىم اتتاي تۋلادى- اي،

بۇل قالاي جۇرتىم، بۇل قالاي؟

قايدا جۇرسەڭ امان ءجۇر،

(قازاقتىڭ اقىن قىزدارى- اي) 2.

 

 

سوڭعى جاڭالىقتار