سەن ءوزىمسىڭ عوي- قىڭىر سوزدەر
ال كەيبىر ادامداردىڭ سول ءسوزدىڭ استارىن ۇعىنا الماي، جاڭىلىپ جاتاتىندارى راس.
قاكەڭ بىردە اباي اتامىزدىڭ ەسكەرتكىشى جانىندا الدەكىمدى كۇتىپ تۇرسا، تەلەفونى شىر ەتە قالادى. كوتەرسە، ءىسساپارعا كەتكەن قايرات دەگەن دوسى ەكەن. «وۋ، قاي جەردە ءجۇرسىڭ؟» - دەسە، اناۋ:
- مەن اقتاۋدامىن، كاسپيدىڭ سۋىنا اياعىمدى مالىپ قويىپ، دەمالىپ وتىرمىن، - دەپ نىعىزدانادى.
- ءوزىڭ قايداسىڭ؟!
- مەن ءبىر شارۋامەن كوشەگە شىعىپ ەدىم، اباي ەكەۋىمىز زەرىگىپ اكىمياتتىڭ الدىندا تۇرمىز...
- قاي اباي؟ - دەپ ەلەڭ ەتە قالادى قايرات.
- كۇرشىمدىكى مە؟
- جوق، - دەپ اڭگىمەنى سوزا تۇسەدى قادىلبەك.
- جيدەبايدىكى.
- بىزبەن بىرگە ىستەپ پە ەدى، ميليتسيادا؟ - دەپ تاقىمدايدى اناۋ.
- جو- جوق، ول كىسى ميليتسيادا ىستەگەن جوق.
- فاميلياسى كىم؟
- اپىر-اۋ، سەن ابايدى بىلمەيسىڭ بە؟ - دەيدى قادىلبەك، - فاميلياسى قۇنانبايەۆ!
- وي، جىندى، باعانادان بەرى سولاي دەمەيسىڭ بە؟ - دەپ سوندا دوسى قارقىلداپ كۇلىپ جىبەرگەن ەكەن.
سەن ءوزىمسىڭ عوي
قازىرگى كەزدە استانادا تۇراتىن بەلگىلى سەمەيلىك جازۋشى تالعات كەڭەسبايەۆتىڭ دا كەي ۋاقىتتا ويعا سىيا بەرمەيتىن شايقىلىقتارى جەتەرلىك. ول تۋرالى تاكەڭدى جاقسى بىلەتىن ادامدار تاڭدى تاڭعا جالعاپ اڭگىمەلەۋگە دايار.
- بىردە سەمەيدە كەرەمەتتەي نوسەر جاۋىپ، كوشەلەرگە جايىلعان سۋ تۇپ- تۋرا قىزىلاسىقتان كەلدى، - دەپ ەسكە الادى جازۋشىنىڭ زايىبى گۇلميرا.
- تالعات ەكەۋىمىز شالشىقتى شالپىلداتىپ، ايالداماعا تاقاي بەرگەنبىز. جولداعى ءسال بيىكتەۋ جەردە ءبىر قىز ادەمى تۋفليىمەن سۋ كەشۋگە ءداتى بارماي، داعدارىپ تۇر ەكەن. تاكەڭ كەنەت الگى قىزدى كوتەرىپ الدى دا، دەدەكتەگەن كۇيى اۋدەم جەردەگى ايالدامانىڭ قۇرعاق جەرىنە اپارىپ دىك ەتكىزدى. مەن توبىقتان سۋ كەشكەن كۇيى ارەڭ ىلەسىپ كەلەمىن. الگى قىز قاتتى ريزا بولىپ، جۇرتتىڭ كوزىنشە «اعاسىنا» العىسىن جاۋدىرىپ جاتىر.
- مىنا قىز كىم؟ - دەپ سۇرادىم ءسال ۇزاعان سوڭ.
- مەن ونى تانىمايمىن، - دەيدى تالعاتىم جاپ- جاي.
- ەندەشە نەگە الاقانىڭا سالىپ الا جونەلدىڭ؟
- سۋدان وتە الماي تۇرعانىنا جانىم اشىپ كەتتى.
- ال مەن شە؟ - دەيمىن داۋسىم تارعىلداۋ شىعىپ، - مەن دە كەشىپ كەلەمىن عوي سول سۋدى...
- ءاي، سەنى قويشى، - دەپ تاكەڭ قولىن ءبىر-اق سەرمەدى. - سەن ءوزىمسىڭ عوي!
تۇگەلدەي ۇشىپ كەتەدى
مارقالىق ايتۋلى ءانشى اعامىز انۋاربەك وتاربايەۆ نەمەرەسى ءدىلناز تۋرالى مىنا ءبىر اڭگىمەنى كۇلە وتىرىپ بايانداعان ەدى.
مەكتەپكە جاڭادان بارىپ جۇرگەن بۇلدىرشىنگە مۇعالىمى ساۋال قويىپتى.
- ءدىلناز، ايتا قويشى، انە، سىمنىڭ ۇستىندە ون تورعاي وتىر. سولاردىڭ تورتەۋىن مىسىق ۇستاپ جەپ قويدى. سوندا سىمدا نەشە تورعاي قالادى؟
- بىرەۋ دە قالمايدى، - دەپ جاۋاپ بەرەدى ءدىلناز ءبىراز ويلانىپ الىپ.
- نەگە؟
- شەتىنەن مىسىق ۇستاپ جەپ جاتقاندا قالعاندارى قاراپ تۇرا ما؟ تۇگەلدەي ۇشىپ كەتپەي مە؟!
جيناستىرعان - حاسەن زاكاريا. كۇرشىم اۋدانى.
didar-gazeti.kz