بەكتاۋ اتا، اۋليە شوقى اتاۋى تۋرالى اڭىز
بۇل جوبا اياسىندا «بابالار ءسوزى»، «قازاق حاندارى»، «ەجەلگى قالالار تاريحى»، «حالىق قازىناسى» قاتارلى جاڭا ايدارلار اشىلدى.
«بابالار ءسوزى» ايدارى نەگىزىنە «مادەني مۇرا» باعدارلاماسى اياسىندا شىققان 100 تومدىق اۋىز ادەبيەتىنىڭ جىر-تولعاۋلارى، قيسسا-داستاندار، ءسوز ۇستاعان شەشەندەر مەن بيلەرىمىزدەن قالعان ناقىلدار، تاريحي جادىگەرلەر الىندى.
«قازاق حاندارى» ايدارىندا تاريحىمىزدا ەلىنە قورعان بولعان حانداردىڭ ءومىرى تۋرالى دەرەكتەر بەرىلەدى. ال «ەجەلگى قالالار تاريحى» ايدارىنا قازاق دالاسىنداعى وركەنيەتتىڭ ورداسى بولعان كونە قالالاردىڭ تاريحى تۋرالى جازبالار جاريالانادى.
«حالىق قازىناسى» ايدارى بويىنشا، قازاقستانداعى تاريحي، مادەني ەسكەرتكىشتەر، قازاق حالقىنىڭ سالت-داستۇرلەرى، قولونەر، قارۋ-جاراقتارى تۋرالى ماعلۇماتتار بەرىلمەك. جوبا ماتەريالدارى قازاق تىلىندە (قازاقشا جانە توتە جازۋمەن) اگەنتتىك سايتىندا جاريالانادى.
***
«جەرۇيىقتى» ىزدەپ، جاھاندى كەزگەن اسان قايعى ارقا جەرىنىڭ ءبىر تاۋىنىڭ ماڭىنا كەلىپ، جەلماياسىن شوگەرىپ، سول جەرگە قونىپ شىعادى. تاڭ الاڭ-قۇلاڭ اتىپ كەلە جاتقاندا شىرت ۇيقىدان ويانعان ەكەن. كوزىن اشىپ قاراسا، جۇمباق ەكى بايتەرەك ءوسىپ تۇر ەكەن. سول ەكى جۇمباق بايتەرەك ءوسىپ تۇرعان تاۋدى «بەكتاۋ اتا» دەپ اتاپتى.
الگى تاۋدان شىعىپ، ءتۇس اۋا كەلەسى ءبىر تاۋ شەتىنە كەلىپ تۇسەدى. اسان قايعى تاۋ توبەسىنە شىعىپ، جان-جاعىنا قاراسا، اينالانىڭ ءبارىن ءبىر اۋليە قولمەن الىپ كەلگەندەي بولىپ، انىق كورىنگەن ەكەن. بۇل تاۋ اسان قايعىعا اۋليە سياقتى ەلەس قالدىرادى. سوندىقتان بۇل تاۋدى «اۋليە شوقى» دەپ اتاعان ەكەن.