قازاقستاننىڭ جوعارى وقۋ ورىندارىندا وقيتىن ەتنيكالىق قازاقتارعا ازاماتتىق جەڭىلدەتىلگەن تارتىپپەن بەرىلەدى - گ. سەيتماعانبەتوۆا
بۇل تۋرالى بۇگىن ءماجىلىستىڭ جالپى وتىرىسىندا دەپۋتات گۇلنار سەيتماعانبەتوۆا ءمالىم ەتتى.
ەسكە سالايىق، جالپى وتىرىستا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى- قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا ماقۇلداعان ەدى.
«قۇجاتتى ەكىنشى وقىلىمعا ازىرلەۋ بارىسىندا دەپۋتاتتار تاراپىنان ءبىرقاتار تۇزەتۋلەر ەنگىزىلدى. ماسەلەن، شەتەلدەردەگى دارىندى ەتنيكالىق قازاق جاستارىنىڭ ەلىمىزگە كەلۋىن جانە قازاقستان ازاماتتىعىن الۋىن ىنتالاندىرۋ ماقساتىندا قازاقستانداعى جوعارى وقۋ ورىندارىندا وقيتىن ەتنيكالىق قازاق ستۋدەنتتەرىنە جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋ قۇقىعى ۇسىنىلىپ وتىر. بۇدان بولەك، قازاقستاندا تۇراتىن ورالماندار مەن شەتەلدىكتەرگە ۆيزانى ۇزارتۋ ماسەلەسىن جەڭىلدەتەتىن، ياعني ۆيزانى ىشكى ىستەر ورگاندارى ارقىلى ۇزارتۋعا مۇمكىنشىلىك بەرەتىن نورمالار قابىلداندى. بۇرىن قانداستارىمىز ءوز ۆيزالارىن وزدەرى كەلگەن مەملەكەتتەرىنە قايتا بارىپ قانا ۇزارتاتىن ەدى»، - دەيدى ءماجىلىس دەپۋتاتى گۇلنار سەيتماعانبەتوۆا.
ونىڭ ايتۋىنشا، وتباسىلارىن بىرىكتىرۋ ماقساتىندا شەت ەلدەردە تۇراتىن ەتنيكالىق قازاقتاردىڭ اراسىنداعى تۋىستارىن قازاقستان رەسپۋبليكاسىنا قونىستاندىرۋ ءۇشىن ازاماتتاردىڭ شاقىرتۋلارىن قارايتىن جانە كۋالاندىراتىن قۇزىرەت جەرگىلىكتى اتقارۋشى ورگاندارعا بەرىلەدى. ورالمانداردىڭ قازاقستاندا تۇراقتى تۇرۋعا ارنالعان رۇقساتتى الۋ كەزىندەگى كەيبىر كەدەرگىلەر دە جەڭىلدەتىلگەن.
«اتاپ ايتقاندا، بۇرىن ءبىر رەت قۇقىق بۇزعان جاعدايدا ورالماندارعا رۇقسات بەرىلمەسە، ەندى زاڭ جوباسىمەن بىرنەشە رەت قۇقىق بۇزۋشىلىق بولعان جاعدايدا عانا رۇقسات بەرىلمەيتىندەي نورما ۇسىنىلىپ وتىر. ورالمانداردىڭ قازاقستان ازاماتتىعىن العانعا دەيىن جەكە سايكەستەندىرۋ نومىرلەرىنىڭ (ج س ن) بولماۋىنان بالالارىن مەكتەپكە، بالاباقشا ورنالاستىرۋدا، ەمحانا مەن اۋرۋحانالاردا تىركەلۋگە، زەينەتاقى جارنالارىن جانە الەۋمەتتىك تولەمدەردى اۋدارۋدا قيىندىقتار بولىپ تۇرعان. وسىعان وراي، ەندى ج س ن ورالمان مارتەبەسىن العان كۇننەن باستاپ بەرىلەتىن بولىپ وتىر. ياعني، ورالمان كۋالىگى ج س ن بار قۇجاتتار تىزبەسىنە ەنگىزىلمەكشى. ورالماندارعا قىزمەتتىك نەمەسە جەكە تۇرعىن ءۇيى بولماعان كەزدە ولاردى بەيىمدەۋ جانە ىقپالداستىرۋ ورتالىقتارىندا، ءبىلىم بەرۋ مەكەمەلەرىنىڭ جاتاقحانالارىنا ۋاقىتشا تىركەلۋ قۇقىعى بەرىلەتىن بولدى»، - دەيدى دەپۋتات گۇلنار سەيتماعانبەتوۆا.
اۆتور: قانات مامەتقازى ۇلى