عابيدەن مۇستافين. ...دەگەن ەكەن

نۇر- سۇلتان. قازاقپارات. عابيت مۇسىرەپوۆتىڭ ەكىنشى ۇيلەنگەن جاس ايەلى قىز تاۋىپ، شىلدەحاناسىنا عابيدەن كەلەدى.

وتىرىستا عابيت:

- ءاي، عابيدەن، مەن ءالى جاس ءيىس ءسۇيىپ وتىرمىن، سەن بولساڭ تاياققا سۇيەنىپ قالىپسىڭ عوي! - دەپ ازىلدەيدى. سوندا عابيدەن:

- ءاي، عابيت سەنىڭ مىنا جاس ايەلىڭنىڭ ەتەگىن جەل ۇرلەسە ەكى قابات بولايىن دەپ تۇرعان جوق پا. نەسىنە ماقتاناسىڭ، شىنىمەن ماقتانعىڭ كەلسە مەنىڭ مىنا بايبىشەمدى ەكىقابات ەتىپ بەرشى! - دەپ جەتپىسكە كەلىپ قالعان كەمپىرىن كورسەتىپتى.

***

ءبىر جيىندا عابيت مۇسىرەپوۆ عابيدەن مۇستافينگە ءسوز بەرەدى:

- بار ءبىلىمى ءۇش كلاستىق، قازاق سوۆەت جازۋشىسى عابيدەن مۇستافينگە ءسوز بەرىلەدى! - دەپتى.

سوندا عابيدەن مىنبەگە شىعىپ:

- ءاي، عابيت-اي، سەن مەنى ماقتاپ، كوپشىك قويا سويلەۋدى قويماي قويدىڭ -اۋ! مەنىڭ بىتىرگەنىم ەكى-اق كلاس قوي، ءۇش كلاس بىتىرگەندە سەنىڭ سورىڭدى قايناتاتىن ەدىم عوي! - دەگەن ەكەن.

***

ءبىر جيىندا عابيت مۇسىرەپوۆ: «ءبىر جەرگە تەلەفون شالۋشى ەدىم» - دەپ شىعىپ بارا جاتادى. سوندا عابيدەن وتىرىپ:

- قاتتى-اق تەلەفون شالارسىڭ، وناندا قۋىعىمنىڭ مايى قاشىپ، مىناۋ ۇزاق جيىنعا شىداي الماي بارامىن دەسەڭشى، - دەگەن ەكەن.

عابەڭ مىرس ەتىپ كۇلىپ، شىعا بەرىپتى.

***

عابيت مۇسىرەپوۆ پەن عابيدەن مۇستافين ازىلدەرى جاراسا ويناپ وتكەن ادامدار. بىردە عابيت ءوزىنىڭ عابيدەن باستاعان دوستارىن قوناققا شاقىرادى.

عابيدەن ادەتتەگىدەي قۇرداسىنا ىلىك ارتپاقشى بولىپ، قايىسىپ تۇرعان داستارحاننان جوق تاماقتى ىزدەيدى عوي. ول كەز عابيتتىڭ رايامەن وتاسقان شاعى بولسا كەرەك. رايا ويىندا ەشتەڭە جوق:

- اعا نە ىزدەدىڭىز؟ - دەيدى.

- ليموناد.

- ليموناد ويدا بولماپ ەدى! - دەپ، رايا ساسىپ قالادى.

سوندا عابيدەن:

- بۇل ءيتتىڭ ۇيىندە ليموناد تا بولمايدى! - دەگەن ەكەن.

***

«قازاق ادەبيەتى» ءازىل انكەتا تاراتىپ، وندا «قۇمار ماشىعىڭىز قانداي» دەگەن سۇراق جازىلسا كەرەك.

بۇل سۇراققا عابيدەن مۇستافين: «تەك جاقسىنى كورۋ. بىرەر جامان ماشىعىم دا بار، ونى ايتۋعا ۇيالامىن» دەپ جاۋاپ بەرگەن ەكەن.

ەل اۋزىنان جيناعان: اقسەلەۋ سەيدىمبەك
adebiportal.kz