بايماعامبەت سۇلتان بايبىشەسىن توركىنىنە نەگە قۋدى
سۇلتاننىڭ ءوزى ۇيدە بولماعاندىقتان «ۇرانشى كەلدى» دەپ قىزمەتشىلەر بايەك بولىستى. ال بايبىشەسى ۇرانشىنى كۇتىپ الۋدىڭ ورىنىنا «اۋىرىپ جاتىرمىن»، - دەپ ءتور الدىندا ءتورت قاباتتان كورپە توسەتىپ، كوسىلە جامباستاپ، جاتقان ورنىنان تۇرمايدى.
بايبىشە «سەگىزكوزىم قاقساپ تۇرا الماي جاتىرمىن»، - دەپ قىزارا ءبورتىپ قىمىز ءىشىپ، تۇرۋعا ىڭعاي دا تانىتپايدى. ال قىزمەتشىلەر بولسا بايبىشەنىڭ قاباعىنان يمەنە ۇرانشىعا بارىنشا ىقىلاس كورسەتەدى.
داستارحان جينالىپ، اقىن دامگە ىرزالىعىن ءبىلدىرىپ، اس قايىرىپ باتا بەرەدى. وسىلايشا ماحامبەت ورنىنان تۇرىپ ەسىككە بەتتەگەندە ەسىن ءبىر-اق جيناعان بايبىشە:
- ۋا، ازۋلى قايىنىم، ايىپقا بۇيىرما! اۋىرىپ قالدىم. ۇزاي شىعىپ، الدىڭنان جولىققاندارعا مەن تۋرالى نە دەپ ايتاسىڭ؟ - دەپ قۋلانا سۇرايدى.
سوندا ماحامبەت كەرى بۇرىلماستان قىرىن قاراپ تۇرىپ:
- ءتورت قابات كورپەگە ورانىپ،
توردە جاتقان جەڭگەنى كوردىم.
ءۇي يەسى جوق كەزدە،
اس يەسى دومالاپ جاتىپ،
قوناعى وتىرىپ جەگەندى كوردىم.
جاقسى جەڭگە ورانىپ جاتسا ۇل تۋار!
جامان جەڭگە ورانىپ جاتسا،
ازعىن بولار قۇل تۋار! ەندى بۇل ءۇيدى جەلكەمنىڭ شۇقىرى كورسىن، - دەپ قايىرىلماستان شىعىپ كەتەدى. ۋاقىت وتە ماحامبەتتىڭ دە ايبىنى اسقاقتاپ ەلگە سىيى ارتا تۇسەدى. الايدا، ول بايماعامبەت سۇلتاننىڭ تابالدىرىعىنان قايتىپ اتتاماعان ەكەن.
بايماعامبەت سۇلتان وزىنە ءىنى ساناپ جۇرگەن ماحامبەتتىڭ جەڭگەسىنە ايتقان ءسوزىن ارادا ءبىر جىل وتكەندە وزگە ءبىر ەلدە ءجۇرىپ ەستيدى. الگى ەلدە قونىپ جاتۋعا ءداتى شىداماي نامىستانعان سۇلتان، نوكەرلەرىن ەرتىپ، اۋىلىنا ورالادى. اسىعىس ءجۇرىپ ۇيىنە جەتكەن سۇلتان ەشتەڭەگە قاراماستان بايبىشەسىن ورىن-توسەگىمەن، ءتورت تۇيە جۇگىمەن قوسا توركىنىنە قۋىپ جىبەرگەن ەكەن.