ءومىردىڭ ءوزى شىعارما: ساقتىقتا قورلىق تا بار

نۇر- سۇلتان. قازاقپارات. انا جىلى قالانىڭ شەتىندە ءۇي جالداپ تۇرعان ەدىم. جۇمىستان كەش قايتامىن. دۋالدىڭ ەسىگىن كورشىلەر ىشىنەن بەكىتىپ قويادى. بىردە ەشكىمدى مازالاعىم كەلمەي دۋالدى اسىپ سەكىرىپ كىرە سالماق بولدىم.

ىشكى قالتامداعى جار دەگەندە جالعىز سۇيىكتى قالامىمدى سىندىرىپ الماۋ ءۇشىن الىپ، اۋزىما تىستەدىم. دۋالدىڭ باسىنا شىعىپ تومەن سەكىرە بەرگەندە بىردەمەگە ءىلىندىم دە قالدىم. ەكى قولىم دۋالدىڭ ۇستىندە، قاتتى تىستەنگەندىكتەن اۋزىما سيانىڭ قىشقىل ءدامى كەلدى. قاپ، اتتەگەن- اي! قالتامدا تۇرا بەرسە، سىنار ما، سىنباس پا ەدى؟!.. .

بۇل جەردە مەن ەكى نارسەنى ويعا ءتۇيدىم. ادام بىردەمەگە ءىلىنىپ، ەكى قولىن بيىككە سوزعاندا بارلىق بۇلشىق ەتتەر قاتايادى، سەن تىستەنەسىڭ. سونداي- اق، اسىرە ساقتىقتىڭ دا قورلىعى بولاتىن كورىنەدى.

كەكشىل مىسىق

ءبىر لامانىڭ ايتقان اڭگىمەسى:

- ءبىزدىڭ ۇيگە اياق استىنان ءبىر بۇرالقى مىسىق پايدا بولدى. ونشا سۋحانىم سۇيمەسە دە، ونى قۋىپ شىقپادىم. ونى- مۇنى بەرىپ، تاماقتاندىرىپ ءجۇردىم. سالت باس، ساباۋ قامشى دەگەندەي جالعىز ءوزىم عانا بولعاندىقتان تاماققا قوساتىن ەتتى از مولشەردە كۇندەلىكتى بەلگىلى ءبىر ولشەممەن عانا قولدانامىن. ەگەر قۇدايى قوناق كەلىپ قالسا، ەكى ەسەگە ارتتىراتىنىم بار. ءبىر كۇنى تاماق ىستەيىن دەسەم، ەتتىڭ ءبارىن الگى مىسىق جەپ قويىپتى. جونگە سالايىن دەپ تاياقتىڭ استىنان الدىم. ول قاشىپ كەتتى دە، ءىزىم- عايىم جوعالدى. دۇرىس بولدى دەپ ويلادىم. بىرنەشە كۇننەن كەيىن مىسىق تاعى كەلىپ تۇر. تاماق بەرىپ ەدىم، جەمەدى.

تۇندە توسەككە جاتىپ الىپ قاراپ جاتسام، الگى مىسىق پەشتىڭ قاسىنا وتىرىپ الىپ، الدىڭعى ەكى اياعىنىڭ تابانىن الما- كەزەك جالاپ وتىر. بۇرىن وندايى جوق ەدى. مەن كۇدىكتەنىپ ۇيىقتامادىم. شامدى دا سوندىرمەدىم. كورپەمەن باسىمدى جاپتىم دا بولماشى ساڭىلاۋ شىعارىپ مىسىقتى باقىلادىم. وتىرىك ۇيىقتاعان بولىپ، قورىلداي باستادىم. الگى مىسىق ابدەن سۋلانعان الدىڭعى اياعىمەن پەشتىڭ اۋزىن اشتى دا، جالما جان قىپ- قىزىل شوقتى باس سالىپ مەنىڭ كورپەمنىڭ ۇستىنە قاراي لاقتىرا سالدى. ءوزى كوز ىلەسپەس جىلدامدىقپەن سەكىرىپ تىسقا اتىپ شىقتى.

كەك العان ءتۇرىن كورمەيسىڭ بە؟

قول ساعات

جۇرتقا ەلىكتەپ مەن دە ەلەكتروندىق قول ساعات الىپ تاقتىم. ساعات، مينۋتىڭدى قول استىڭداعى ساربازشا ءوزى بايانداپ ايتىپ تۇرادى، قاراپ تا اۋرە بولمايسىڭ. ءبىراق، كەيىن بىردەمە جەتپەگەندەي بولا بەردى. «ءيتتىڭ ىشىنە سارى ماي جاقپايدى» دەگەننىڭ كەرى كەلگەن شىعار. دايىن اقپاراتپەن «تاماقتانىپ» ۇيرەنبەگەن مەنىڭ ميىم ونى يتەرە بەرەتىن سەكىلدى. ونىڭ ناقتى سەبەبىن ونشا تۇسىنە الماسام دا كوزىم مەن كوڭىلىمدە ءبىر مازاسىزدىق بار. اقىرى، ءوزىمنىڭ جامان مەحانيكالىق ەسكى ساعاتىمدى تاعىپ ەدىم، كوڭىلىم جايلانا كەڭەيىپ، كوزىمنىڭ شىرايى اشىلعانداي بولدى.

ون ەكى ساننان تۇراتىن دوڭگەلەك ساعاتىمنىڭ بەتى دۇنيە- الەمنىڭ ناق ءوزى ەكەن عوي. مۇندا قازىرگى ۋاقىتتى كورسەتىپ تۇرعان ءۇش ءتىلىنىڭ سىرتىندا وتكەن مەن كەلەشەك تە اينا- قاتەسىز كورىنىپ تۇراتىن سەكىلدى سەزىلەدى.

ءاي، شىركىن- اي! ادام بالاسى ەسكە الۋ مەن ارمانداۋسىز ءومىر سۇرە المايدى ەكەن عوي.

جەرلەۋ

ادام بالاسىنىڭ ومىردەن ءوتۋى مۇحيت ارقىلى الىس ساپارعا شىققان جولاۋشىنى شىعارىپ سالعانمەن تىم ۇقساس كورىنە بەرەدى. كەيبىرى الىپ كەمە ساپارعا اتتانعانى سەكىلدى قارا قۇرىم جۇرت جينالىپ، ازا مۋزىكاسى وينالىپ، ۋ- شۋمەن كەتەدى. ەندى ءبىرى بالىق اۋلاۋعا شىققان شاعىن قايىق سەكىلدى. ەسكەك اعاشى سۋدى سىلدىر- سىلدىر ەتكىزگەن قايىق ىسپەتتى. ازعانا ادام لەزدە ءۇن- ءتۇنسىز الا جونەلگەندە ونى كوپ ادام اڭعارماي دا قالادى. ءبىراق، ەكەۋىنىڭ دە باراتىن ورنى بىرەۋ - قارا جەردىڭ قوينى.

جاگدالىن لحاگۆا

1942- جىلى موڭعوليانىڭ دورنوگوۆ ايماعىنىڭ حوۆسگول ەلدى مەكەنىندە تۋعان. 1966 - جىلى كيەۆتە پوليتەحنيكا ينستيتۋتىن، 1987 - جىلى ماسكەۋدە ادەبيەت ينستيتۋتىن بىتىرگەن. 1960 - جىلدان ادەبيەتپەن اينالىستى. 1991 - جىلى موڭعوليا جازۋشىلار وداعىنىڭ سىيلىعىن الدى. ورتالىق گازەتتەردە ادەبيەت، ونەر بولىمدەرىن باسقاردى. ورىس جانە يسپان تىلدەرىنەن اۋدارعان بىرنەشە كىتابى جارىققا شىققان. ونىڭ ىشىندە قازاق اقىنى ولجاس سۇيلەيمەنوۆتىڭ ولەڭدەرى بولدى. كوپتەگەن كينو تۋىندىلاردىڭ، تەلەكينو جانە تەلەپەسالاردىڭ اۆتورى.

موڭعول تىلىنەن اۋدارعان: قۋاندىق شاماحاي ۇلى