وسپانحان اۋباكىروۆ. ...دەگەن ەكەن
وسى وقۋ ورىنىن بىتىرەردە ديپلومدىق سپەكتاكل «قوزى كورپەش - بايان سۇلۋ» بولادى دا، وسپانحانعا جانتىق ءرولى تاپسىرىلادى.
وسپانحان جانتىق ءرولىن وزىنشە ويناعانى سونشا ەكىۇداي پىكىر دۋ ەتە قالادى. ءبىر جاعى - «وسپانحاننان ارتيست شىقپايدى» دەسە، ەكىنشىلەر - «وزىندىك وي- ورنەگى بار» دەسەدى. داۋ ءورشي كەلە الدىمەن فاكۋلتەتتىك، سونسوڭ كافەدرا، دەكانات قاتىستىرىلعان جالپى جينالىستا قارالادى. ونان دا ءپاتۋالى پىكىرگە توقتاي الماعان داۋشىلار رەكتورات پەن مەملەكەتتىك كوميسسياعا تىرەلەدى. سوڭعى سىناق وسپانحانعا «بەس» دەگەن باعا بەرەدى.
سوندا وسپانحان:
- وينايمىز دەپ جانتىقتى،
قالمادى عوي جان ءتىپتى،
وسپان ارتيست بولماس دەپ،
كەيبىرەۋلەر تانىتىپتى، - دەگەن ەكەن.
***
وسپانحان اۋباكىروۆ كوشەدە دەم الىپ، سەرۋەندەپ جۇرسە، ءبىر ميليتسيا كەلىپ، دورەكىلەۋ شىرايمەن:
- ءاي، نەعىپ ءجۇرسىڭ؟ - دەيدى. سوندا وسپانحان:
- ادام بولعان سوڭ جۇرەدى، ءيت بولعان سوڭ ۇرەدى دە! - دەگەن ەكەن.
***
وسپانحان ءبىر دۇكەنگە كىرسە اپىر-ءشۇپىر ءيىن تىرەسكەن ادامداردى كورەدى. بۇل نە ەكەن دەپ، مويىن سوزىپ قاراسا: كيلوسى جەتى سومنان سيىردىڭ ءتىلى ساتىلىپ جاتسا كەرەك.
سوندا وسپانحان باسىن شايقاپ: «ويپىرماي، باياعىدا ءبىزدىڭ قاسكەلەڭدە وسى سيىرلار ءتىلىن قايدا قويارىن بىلمەي، ەكى تاناۋىنا كەزەك تىعىپ تۇرۋشى ەدى!» - دەگەن ەكەن.
***
جازۋشى دۋلات يسابەكوۆ تۇڭعىش رەت ماشينا ساتىپ الىپ، ونى تۇڭعىش رەت جازۋشىلار وداعىنا ءمىنىپ كەلىپتى. دۋلاتتىڭ ارىپتەستەرى جاڭا كولىكتى اپىر-ءشۇپىر قورشاپ، جاقسى تىلەكتەرىن ايتىپ جاتادى.
سول كۇنى الماتىنىڭ شىجىعان شىلىڭگىر ىستىعى بولسا كەرەك. ءبىر مەزگىلدە تۋ سىرتىنان: «ۋاي، نەعىپ شۇپىرلەپ تۇرسىڭدار، جەم تەرگەن تاۋىقتاي!» دەگەن داۋىس ەستىلەدى.
دۋلاتتىڭ جانىنداعىلار وشارىلا قاراسا بەلگىلى ساتيريك وسپانحان اۋباكىروۆ دەيدى. قولىنا كۇن ىستىق بولعان سوڭ ءشول باسۋعا وداقتىڭ بۋفەتىنەن العان ەكى شيشا سىراسى بولسا كەرەك.
-جاي، مىنا دۋلات جاڭا تاي مىنگەن ەكەن، سونى كورىپ تۇرمىز، - دەيدى تۇرعانداردىڭ ءبىرى.
سول كەزدە وسپانحان: «وۋ، بۇل جاقسىلىق قوي... سوندا تاي مىنگەن بالانى وسىلاي ءۇن-ءتۇنسىز قىزىقتاپ تۇرۋعا بولا ما ەكەن!» - دەپ جاقىنداي تۇسەدى. سونان سوڭ «اپىراي، نە ىستەۋ كەرەك!» - دەپ ءبىر ءسات قينالعانداي شىراي تانىتىپ تۇرادى دا، دەرەۋ قولىنداعى ەكى شيشا سىرانىڭ قاقپاعىن تىسىمەن وپىرا اشىپ جىبەرىپ، دۋلاتتىڭ ماشيناسىنىڭ دوڭگەلەگىنە لاقىلداتىپ قۇيا باستايدى. قۇيىپ تۇرىپ: «قارايعانعا قاعىلماي، سورايعانعا سوعىلماي ءجۇرسىن!» - دەگەن ەكەن.
***
ايگىلى سىقاقشى، ءسوز شەبەرى وسپانحان اۋباكىروۆتەن ءبىر جاس اقىن:
- وس- اعا، ءسىز ىشىمدىك اتاۋلىنى قويىپ كەتكەن دەيدى... سول راس پا؟ - دەپ سۇرايدى. سوندا وسپانحان ويلانباستان:
- بۇل جاڭالىقتى ءوزىم ەستىگەم جوق! - دەپ جاۋاپ بەرىپتى.
ەل اۋزىنان جيناعان: اقسەلەۋ سەيدىمبەك