ۇلتتىق بانكتىڭ جۇمىسىن جوعارى بىلىكتىلىكپەن جۇرگىزۋ اسا ماڭىزدى - ن. نازاربايەۆ

استانا. قازاقپارات - مەملەكەت باسشىسى نۇرسۇلتان نازاربايەۆ ۇلتتىق بانك ءتوراعاسى قايرات كەلىمبەتوۆتى قابىلدادى، دەپ حابارلادى اقوردانىڭ باسپا ءسوز قىزمەتىنەن.

كەزدەسۋ بارىسىندا ق. كەلىمبەتوۆ ەلدىڭ قارجى سەكتورى مەن بانك جۇيەسىنىڭ احۋالى تۋرالى باياندادى.

نۇرسۇلتان نازاربايەۆ كۇردەلى ەكونوميكالىق جاعدايعا بايلانىستى كوپ نارسە ۇلتتىق بانكتىڭ جۇمىسىنا، سونداي- اق مەملەكەتتىڭ اقشا- نەسيە ساياساتىنا تاۋەلدى ەكەنىن اتاپ ءوتتى.

- بيۋدجەتتىڭ جاعدايىنىڭ ناشارلاۋىنا، بارلىق ەكسپورتتىق تاۋارلارىمىزعا باعانىڭ تومەندەۋىنە بايلانىستى ۇلتتىق بانكتىڭ جۇمىسىن جوعارى بىلىكتىلىكپەن جۇرگىزۋى اسا ماڭىزدى، - دەپ اتاپ ءوتتى قازاقستان پرەزيدەنتى.

ۇلتتىق بانك ءتوراعاسى بيىلعى قاڭتار مەن ماۋسىم ارالىعى كەزەڭىندە ينفلياتسيا 1,4 پايىزعا تەڭ بولعانىن، بۇل رەتتە جىلدىق ينفلياتسيا 3,9 پايىزدى قۇراعانىن ايتتى.

- بۇل وسى ۋاقىتقا دەيىنگى ەڭ تومەن كورسەتكىش، ياعني ءبىز ينفلياتسيانى 3-4 پايىز دەڭگەيىندە ساقتاۋ جونىندەگى تاپسىرمانى ورىندادىق. بۇل ورايدا، ۇلتتىق بانكتىڭ جيىنتىق حالىقارالىق رەزەرۆى 29 ميلليارد دوللار بولدى. سالىمدار ءبىرىنشى جارتىجىلدىقتا 2,3 پايىزعا ۇلعايدى. سونىمەن قاتار، تولەم مەرزىمى 90 كۇننەن اسىپ كەتكەن قارىزدار ۇلەسىن ازايتۋ ماسەلەسى شەشىلدى، بۇرىن ونىڭ كولەمى 33 پايىزعا جەتكەن بولسا، قازىرگى ۋاقىتتا ول 9,98 پايىزعا دەيىن تومەندەدى، - دەدى ق. كەلىمبەتوۆ.

مەملەكەت باسشىسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.