بالاسىن جارىتپايتىن جاس انالارعا ارنالعان جىر
باياعى انالارىمىزعا قاراعاندا وسى كۇنگىلەردىڭ اكە كوكەلەگەن الپەشى كوپ بولعانىمەن بالا جانى راحات تابار باسقا بىردەڭەلەرى كەم سەكىلدى سەزىلۋشى ەدى...
جاقىندا سونىڭ سەبەبىن ۇققانداي بولدىم. جىر جازعاندا قازاقى بولمىستىڭ قالپىن بۇزباي، قان- ءسولىن سورعالاتىپ تۇرىپ وزەگىڭە قۇيىپ- قۇيىپ جىبەرەتىن جاركەن بودەش ۇلى دەگەن قۋاتتى اقىن بار قازاقتا. سول كىسىنىڭ «ەمەندەر تۇندە بۇرلەيدى» دەگەن جىر جيناعىن وقىپ وتىرىپ، «ءتۇن ورتاسى اۋعاندا» دەپ اتالاتىن ولەڭىنە تاپ بولدىم. شىنايى سەزىنىپ وقىعان ادامنىڭ جانارىنا جاس ۇيىرەردەي وسى ولەڭ، اقيقاتىندا انا بولۋدىڭ بالا تابۋدان باسقا دا تولىپ جاتقان سيپاتتارى بار ەكەندىگىن، بالانى تابۋمەن قۇر جاقسى كورۋدىڭ، مىڭ ويىنشىق، ءجۇز الپەنشەكتىڭ انا بويىنداعى ول سيپاتتاردىڭ ورنىن باسا المايتىندىعىن تەرەڭ سەزىندىرەدى. ولەڭ ەگىلىپ تۇر، توگىلىپ تۇر.
جاركەن بودەش ۇلى. ءتۇن ورتاسى اۋعاندا...
الدە قاشان ءتۇن اۋعان،
ايدىڭ ءجۇزى قۋارعان.
اق ومىراۋ اسپاننىڭ -
جۇلدىزدارى سۋالعان.
شىرىلدايدى بال - بوبەك،
بالداي ۋىز بار ما دەپ.
جارىتپايدى اناسى -
وعان قانداي بار كومەك؟
بالا - مەشكەي،
انا - جاس،
كوكىرەگى جالاڭاش:
ومىراۋىنىڭ ءسۇتى جوق،
ۇيقىسىنا شالا ماس.
ءيسىنۋدى ول بىلمەيدى،
تاس ەمشەگى يىمەيدى.
ۋاتپاق بوپ ءسابيىن،
ىرشىپ، شورشىپ بيلەيدى.
ءبي دەيتۇعىن ءبيى جوق،
كوپ شورشۋعا كۇيى جوق.
بەسىك جىرىن ايتپاسا،
جۇرەك قالاي يىمەك...
قامالعانداي قۇز، جارعا،
انا جانى مۇزداۋدا،
تەبىرەنبەسە ەت جۇرەك -
اق ومىراۋ سىزدار ما.
تالانعانداي ماساعا،
ابىرجيدى جاس انا.
بەرەكەسى قاشقانداي،
قۇلازيدى بوساعا.
الدە نەنى قيالداپ،
قۇلازيدى قيان باق.
بۇرىشىندا تاس ءۇيدىڭ،
اش مىسىقتار مياۋلاپ.
اش كۇشىكتەر قىڭسىلار،
مەشكەي بالا شىرقىرار.
كوڭىل كۇيى انانىڭ،
قاشان عانا تىنشىعار...
قايران ءبىزدىڭ شەشەلەر،
قۇتقا تولى كەسەلەر.
بالا ەمەس، بار عالامعا،
مەيىرىمىن ەسەلەر.
ۋاتاردا بوپەسىن -
بەسىك جىرىن ەسەلەر.
«ءالدي- ءالدي، ءالدي- اي،
اق بوبەگىم اۋزى ماي،
اق ومىراۋ بەرەيىن،
اي استىندا قالعىماي.
قۇيتتاي عانا بويى بار،
اق لاعىڭ تويىنار.
ءالدي- ءالدي بوپەشىم،
ۋىزىڭا تويىپ ال» .
ومىراۋ ءيىپ سول ماڭدا،
سارى ۋىزعا تولعاندا
ەكى ەزۋى كوپىرىپ،
ءسابي ونى سورعاندا،
كومەيى سۇتكە تولعاندا،
ءالى كەلمەي تولعاۋعا.
ەكى بەتى بالبىراپ،
ۇيقتاماسقا جول بار ما!
اناسى يىسكەپ ايمالاپ،
كوڭىل كۇيىن جايلاماق.
بىرگە قالعىپ كەتەتىن،
شاڭىراقتان اي قاراپ.
ءبورى ۇلىماي جونداعى،
تىنىشتالماق جول ماڭى.
قورا اينالعان ساق توبەت،
مىزعىپ كەتەر ول- داعى.
ىرىس كەلىپ قونعانداي،
ءۇيدىڭ ءىشى بولعان جاي.
بوبەك ءيسى، ءسۇت ءيسى،
ءتاتتى ەدى ول قانداي.
جان يەسىن جاسىتپاي،
ءتۇن جىلجيتىن اسىقپاي.
شاشىلاتىن اسپاننان،
جۇلدىز كۇمىس اسىقتاي.
قايران، ساباز شەشەلەر،
ۋىز تولى كەسەلەر.
بەسىك جىرىن ۇمىتقان،
قىزدارىڭدى كەشە گور.
جۇك اۋىرىن كوتەرەر،
ءبىزدىڭ نارداي شەشەلەر.
تۋماي جاتىپ سۋالعان،
كەلىنىڭدى كەشە گور.
namys.kz