اقىن- جازۋشىلاردىڭ ايتقىشتىعى

نۇر-سۇلتان. قازاقپارات - اقىن- جازۋشىلاردىڭ سوزگە ۇستالىعى امبەگە ايان. شاقپا ءتىلدى، تاپقىر ويلى تۇلعالار ورايى كەلگەندە وسىپ جىبەرەدى. سودان كەيىن ولاردىڭ ءار ءسوزى «دەگەن ەكەن...» تاقىرىبىمەن حالىق اراسىنا تاراپ كەتەدى.

مەنىڭ قاسقىر ءيتىم بار.. .

جازۋشى زەين شاشكيننىڭ ۇيىندە ءسابيت مۇقانوۆ تاعى ءبىر توپ اقىن، جازۋشىلار قوناق بولىپ وتىرادى. الدارىنا تاباق- تاباق ەت اكەلەدى. ءداستۇر بويىنشا بارىنەن جاسى ۇلكەن سابەڭ ەت اساتۋعا ىڭعايلانادى. ۋىسىنا قازى- قارتانى تولتىرىپ الىپ، جانىندا وتىرعان جۇبان مولداعاليەۆقا ۇسىنا بەرگەندە، جۇبان:

- ويباي، سابە، مەنىڭ گاستريتىم بار، - دەپ ات تونىن الا قاشادى. سوندا، سول جاعىندا وتىرعان سىرباي ماۋلەنوۆ:

- سابە، ماعان اكەلىڭىز، جۇباننىڭ گاستريتى بولسا، مەنىڭ قاسقىر ءيتىم بار، - دەگەن ەكەن.

قولاڭ شاش

جاڭا قالام ۇستاپ جۇرگەن جاس جازۋشىلاردىڭ ءبىرى عابيت مۇسىرەپوۆتەن:

- عابە، قولاڭ شاش دەگەن نە؟ - دەپ سۇراپتى.

سوندا قولاڭ شاشتىڭ نە ەكەنىن بىلمەگەن جازۋشىسىماققا عابەڭ جاقتىرىڭقىراماي ءبىر قاراپتى دا:

- قولاڭ شاش دەپ وسى كۇنى جاپون شامپۋىنىمەن جۋىلعان شاشتى ايتادى، - دەگەن ەكەن.

اقىندا ءمىن بولماۋى كەرەك

ەلۋىنشى جىلدارى اسقار توقماعامبەتوۆتىڭ ەلۋ جىلدىق تويى تويلانىپ، الماتىدان ءابىلدا تاجىبايەۆ، عالي ورمانوۆ، سىرباي ماۋلەنوۆ، زەينوللا قابدولوۆتار قىزىلورداعا بارادى. سىرداريا جاعاسىنا اقشاڭقان كيىز ءۇي تىگىلەدى. قۋانىش ۇستىندە سىرباي:

- اسەكە، ءوز تويىڭىزدا از عانا بولسا دا شاراپ الىپ وتىرمايسىز با؟ - دەيدى.

سوندا اسەكەڭ:

- مەن جاستايىمنان ايتۋلى اقىندارمەن جازبا ايتىسقا ءتۇستىم. ايتىسقا تۇسكەن اقىن باسقالاردىڭ كەمشىلىگىن كورىپ، ءمىنىن تەرە ءبىلۋى كەرەك. مەن ءوزىم ءىشىپ الىپ بۇلعاقتاپ جۇرسەم، ولاردىڭ سول ءمىنىمدى بەتىمە تاڭبا ەتىپ باسۋى ءسوزسىز عوي. سوندىقتان مەن ىشۋدەن اۋلاق بولدىم. جۇرتقا سىن ايتۋ ءۇشىن اۋەلى ءوزىڭ ءمىنسىز بولۋىڭ كەرەك، - دەگەن ەكەن.

ەلىكتەۋ

بەلگىلى جازۋشىلار ساكەن ءجۇنىسوۆ پەن ادام مەكەبايەۆ 1985 -جىلى موسكۆاداعى ادەبي كۋرسقا وقۋعا تۇسەدى. سوندا تاپقىر، ازىلگە جۇيرىك اقىن قادىر مىرزاليەۆ:

- ادام - ساكەن بولامىن دەپ، ساكەن - ادام بولامىن دەپ وقىپ جاتىر، - دەگەن ەكەن.

دۇرىس

بىردە پارتيزان- جازۋشى قاسىم قايسەنوۆ ءسابيت مۇقانوۆقا كەزىگىپ قالادى. ادەتتەگىدەي سابەڭ شۇرقىراپ امانداسادى.

- سابە، ۋكرايناعا بارىپ قايتتىم، - دەيدى قاسىم قايسەنوۆ.

- دۇرىس.

- فيلاتوۆتىڭ اۋرۋحاناسىندا بولىپ قايتتىم.

- دۇرىس ەكەن.

- اۋرۋحانادا كوزىمە وپەراتسيا جاساتىپ قايتتىم.

- دۇرىس بولعان ەكەن.

- سابە- اۋ، مۇنىڭ نەسى دۇرىس، ساۋ كوزبەن بارىپ، شىنى كوزبەن قايتتىم عوي!

- ءا، وندا دۇرىس بولماعان ەكەن! - دەپتى سوندا سابەڭ.

م. نيازبەكوۆتىڭ «دەگەن ەكەن» كىتابىنان
massaget.kz