شەتەلدەگى قازاقتارعا اتاجۇرتقا كوشۋى ءۇشىن ءۇش جىلعا ۆيزا بەرىلۋى مۇمكىن

None
None
استانا. قازاقپارات - بۇگىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى- قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ماجىلىستەگى جۇمىس توبىنىڭ توعىزىنشى وتىرىسى ءوتتى.

بۇل وتىرىسقا قازاقستان رەسپۋبليكاسى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆانىڭ ءوزى دە كەلىپ قاتىناستى. اتالمىش زاڭ جوباسىن تالقىلاۋ بارىسىندا دەپۋتتاتتار تاراپىنان بولعان كەيبىر سۇراقتارعا جاۋاپ بەردى.

سونىمەن بىرگە، تامارا بوسىمبەك قىزى وسى زاڭ جوباسى اياسىنداعى «حالىقتىڭ كوشى- قونى» تۋرالى زاڭعا دا نازار اۋدارىپ، جاعداي ۇعىستى. ورالمانداردىڭ تۇراقتى تىركەۋگە تۇرارادا تالاپ ەتىلەتىن مەديتسينالىق انىقتامالاردى ەڭ جاقىن تۇرعان ورتالىقتان الۋ تۋرالى ءبىز ۇسىنعان ۇسىنىسقا بايلانىستى، دەنساۋلىق ساقتاۋ سالاسىنىڭ وكىلىنە قانداستارىمىزعا قولايلى ەتىپ شەشۋ تۋرالى تاپسىرما بەردى.

تاعى ءبىر ايتا كەتەتىن جاعداي، وسى مينيسترلىككە جاقىندا عانا ورىنباسار بولىپ كەلگەن ءبىرجان نۇرىمبەتوۆ جۇمىس توبىنىڭ وتىرىسىنا تىنباي قاتىناسىپ كەلەدى. ەڭ قۋانىشتىسى، ەكى تىلدە ەركىن سويلەيتىن، قايماعى بۇزىلماعان قازاقى اۋىلدا وسكەن ءبىرجان بيدايبەك ۇلى كەلگەننەن بەرى ءبىراز ماسەلەنىڭ باسى اشىلىپ، ءتۇيىنى شەشىلگەندەي بولدى.

حالىق قالاۋلىلارى دا سۇراقتارىنا تۇشىمدى، كوكەيگە قونىمدى جاۋاپ الا باستادى. مىسالى، ءبىز ءۇشىن ەڭ قاجەتتى بولىپ تۇرعان جەكە ادام ءوزىنىڭ كەپىلدىگىنە جەرگىلىكتى اتقارۋشى ورگانداردىڭ كەلىسىمىن الۋ ارقىلى شەتەلدە تۇراتىن تۋىسقاندارىن ءبىر جولا قونىستاندىرۋ ءۇشىن شاقىرا الاتىن كەپىلدەمەگە (كوشى- قون شاقىرتۋىنا) زاڭدىق نەگىز بەرۋدى ۇسىنعامىز.

ءبىرجان بيدايبەك ۇلى بۇل ۇسىنىستىڭ ماڭىزىن بىردەن ءتۇسىنىپ، قارسى ەمەس ەكەنىن اشىق ايتتى. اللا قالاسا، بۇل ماسەلە دە كەلەسى وتىرىستا شەشىم تاپقالى تۇر.

قولدانىستاعى وسىناۋ قاتال زاڭنىڭ كەسىرىنەن الىستان كوشىپ كەلگەن اعايىننىڭ تۇراقتى تىركەۋگە تۇرا الماي قينالىپ جاتقانى راس. جاڭا زاڭ جوباسى تەزىرەك قولدانىسقا ەنسە ەكەن دەپ، تىپىرشىپ وتىرعان قاۋىم دا از ەمەس.

قايتا كوشىپ جاتقانداردى ويلاساڭ، ءتۇن ۇيقىڭ ءتورت بولىنەدى. ۆيزا ۇزارتۋعا ۇرىمجىگە بارعاندار بىتپەس كەزەككە تاپ بولۋدا. تۋىلعان بالاعا جورگەكپۇل مەن اناعا جاردەماقى الۋدىڭ قيىندىعى ايتپاسا دا تۇسىنىكتى.

وسىعان بايلانىستى، جۇمىس توبىنىڭ جۇمىسى مۇمكىندىگىنشە ءوز دەڭگەيىندە ءجۇرىپ جاتقانىن دا ايتقىم كەلەدى. حالىق قالاۋلىلارى ءبىز ۇسىنعان ۇسىنىستىڭ بىردە-بىرەۋىن كۇن تارتىبىنەن تۇسىرمەي تالقىعا سالۋدا، قابىلداۋدا.

تەك، «وقۋ ماقساتىمەن كوشىپ كەلەتىن ەتنيكالىق قازاق جاستارىنا ۆيزا اشتىرۋدا باسىمدىق بەرىلسە» دەگەن ۇسىنىس قانا س ءى م-نىڭ وكىلدەرى كەلىسىم بەرمەگەندىكتەن، بۇگىنگى وتىرىستا تالقىلاۋدان الىنىپ تاستالدى. وتىرىستا سىرتقى ىستەر ءمينيسترى ەرلان ىدىرىسوۆتىڭ كەڭەسشىسى كەرىم قوجامبەرديەۆ ۆيزا بەرۋ ءتارتىبىنىڭ قايتا قارالعالى جاتقانىن، سوندا ەتنيكالىق قازاقتارعا ءبىر جولدا بىردەن ءۇش جىلدىق ۆيزا بەرۋدى كوزدەپ وتىرعانىن ايتتى. سوندا ۆيزا كەزەگى بولمايدى دەپ سەندىردى...

ءتارتىپ بويىنشا ۇسىنىس بەرگەن سوڭ، سول ۇسىنىستىڭ ماڭىزى، ءرولى جونىندە ۇسىنىس بەرۋشى تۇسىنىك جاساۋى كەرەك. سوسىن وعان قاتىستى قۇزىرەتتى ورىندار ونىڭ زاڭنامالىق نەگىزىن تەكسەرەدى، تەكستىن دۇرىستايدى. وبالى نە، دەپۋتاتتاردىڭ قاي-قايسىسى بولماسىن، باسىن ايتساڭ بولدى، بىردەن ءتۇسىنىپ، تالقىعا ۇسىنادى جانە قورعاپ شىعادى.

ول جاعىنان حالىق قالاۋلىلارىنا دا، جۇمىس توبىنىڭ جەتەكشىسى گۇلنار سەيىتماعامبەتوۆاعا دا ريزامىز. سول ۇسىنىستى پىسىقتاۋعا كەلگەندە قۇزىرەتتى ورىنداردىڭ وكىلدەرى جايباسارلىق تانىتىپ كەلەدى. جوعارىدا ايتىلعان مەديتسينالىق انىقتاما مەن ەتنيكالىق قازاق ستۋدەنتتەردىڭ ج و و- نىڭ جاتاقحاناسىنا تۇراقتى تىركەۋگە تۇرۋىنا قاجەتتى كەلىسىمحاتتىڭ پىسىقتالعانىنا، مىنە، كەمىندە بەس وتىرىس بولدى. ءالى كۇنگە تەكستى تۇزەلمەي-اق قويدى. ال، ونى سول مەكەمەلەردى ارالاپ ءجۇرىپ، تۇسىندىرۋگە ۋاقىت جاعىنان ءبىزدىڭ دە مۇمكىندىگىمىز شەكتەۋلى بولىپ تۇر. تەك جۇمىس توبىنىڭ وتىرىسىنا عانا قالماي قاتىسىپ كەلەمىز.

 دەگەنمەن، كوبى ءبىتىپ، ازى قالدى. ەڭ باستىسى، تۇراقتى تىركەۋگە تۇرۋ مەن ازاماتتىق الۋدا تۇساۋ بولىپ كەلە جاتقان كەدەرگىلەردىڭ الىنعانى قۋانتادى. زاڭ جوباسى كۇزگە قالماي، قولدانىسقا ەنسە ەكەن دەيمىز.

ۇستاعان ورازالارىڭىز قابىل بولسىن، اعايىن!

اۋىت مۇقيبەك

"قامشى" سىلتەيدى

استانا

سوڭعى جاڭالىقتار