شوقان سۇيگەن سۇلۋلار
مۇرايجاي قىزمەتكەرى بىزگە مۇراجايدى جادىگەرلەرىن كورسەتىپ، ءتۇسىندىرىپ ءجۇر. بۇرىن بايقاماعان ەكەم، مۇراجاي سورەسىندە شوقاننىڭ ءوزى سالعان ۇيعىر ايەلدىڭ سۋرەتى بار ەكەن. وسى سۋرەت ءبىراز وي قازبالاۋعا جەتەلەدى...
شوقان قاشقارياعا بارعان ساپارىندا شىنارگۇل (ءسابيت اتامىز سولاي اتاعان) اتتى قىزعا ۇيلەنگەنىن بىلەمىز. ءسابيت مۇقانوۆ وسى قىزدى شوقاننىڭ قاشقارياعا ساپارى كەزىندە ۇيلەنگەن ايەلى دەپ جازدى. ءتىپتى، مۇقانوۆتىڭ بۇل جايلى «قاشقار قىزى» اتتى پەساسى دا بار.
ءيا، قاشقارعا ءالىمباي ساۋداگەر بولىپ اتتانعان شوقان ۇيلەنۋگە ءماجبۇر بولعان. سەبەبى، ول جاقتىڭ سالتى سونداي. ۋاقىتشا نەكەگە تۇرۋ كەرەك. ءسويتىپ، ۇيعىرلار ون التى جاستاعى شىنارگۇل دەگەن قىزدارىن شوقانعا ۇزاتقان. ەكەۋى دە ءبىر ءبىرىن قاتتى ۇناتىپتى دەيدى. ءبىراق، جول اۋىر بولعاندىقتان، شوقان ەلگە قايتارىندا ول قىزدى وزىمەن بىرگە ەرتىپ اكەلە الماعان. بار بولعانى 5 اي بىرگە تۇردى. ءتىپتى، ولاردان ۇرپاق تا بولماعان. بۇل كەزدە اتامىز 22 جاستا بولاتىن.
ەندى شوقاننىڭ ەكىنشى ايەلى تۋرالى ايتساق. شوقاننىڭ ناعاشىلارى باياناۋىل ولكەسىندەگى اتاقتى شورمانوۆتار ەدى. ناعاشى اۋىلىنا كەلگەن شوقان تەزەك تورەنىڭ قارىنداسى ايسارىعا ۇيلەنەدى. الايدا، كوپ ۇزاماي 29 جاسىندا شوقان باقيلىق بولدى. ومىردەن وتەرىندە شوقان ايسارىنى جالعىز قالدىرماۋدى اماناتتاعان. ءسويتىپ، امەڭگەرلىك سالتىمەن تۋىسى جاقىپعا ۇزاتىلادى. بىلەتىندەردىڭ ايتۋىنشا، سول كەزدە ايسارى جۇكتى بولعان. كەيىن مالىك ەسىمدى ۇل دۇنيەگە كەلگەن. الايدا، ول تۋرالى اقپاراتتى ءالى كۇنگە شەيىن جاسىرىپ كەلەدى.
شوقان تۋرالى ايتقاندا، ليۋبانىڭ دا ەسىمى تىلگە ورالادى. ول 17 جاسىندا كادەت كورپۋسىندا وقىپ جۇرگەندە گۋبەرناتور گۋستاۆ گاسفوردتىڭ ايەلى ليۋباعا عاشىق بولعان. ول جايلى شوقاننىڭ ءوزى دە «ونىڭ اتى دا، زاتى دا ماحابباتقا تۇنىپ تۇر ەدى» دەپ جازادى. ليۋبا بۇل كەزدە اۋىر دەرتكە شالدىققان بولاتىن. ءبىراق، ول دەرتى شوقانعا دەگەن ماحابباتىنان كۇشتى ەمەس ەدى. شوقاننىڭ وسى عاشىقتىعى جايلى ومبىدا «ليۋبينا روشا» اتتى پەسا قويىلدى. ايتپاقشى، «ليۋبينا روشا» دەگەن شوقاننىڭ ءوز ءسوزى ەكەن. دوستارى ودان «قايدا بولدىڭ؟» دەپ سۇراعاندا، وسى تىركەستى ايتىپتى. ءبىر قىزىعى، قازىر ومبىداعى وسى جەر ليۋبينسكي پروسپەكت دەپ اتالادى. ونى قياتىن ءبىر كوشەگە شوقاننىڭ اتى بەرىلىپتى.