+7 (701) 759 90 19
7 °С : نۇر-سۇلتان
18 °С : الماتى
USD 425.75 EUR 499.32
RUB 5.85 CNY 65.88
جاڭالىقتار

سىزگە ءسوز سالعان جىگىتكە «بەس سۇراقتى» توتەسىنەن قويىپ كورىڭىزشى، قايتەر ەكەن؟

23 شىلدە 09:55
:ءبولىسۋ
سىزگە ءسوز سالعان جىگىتكە «بەس سۇراقتى» توتەسىنەن قويىپ كورىڭىزشى، قايتەر ەكەن؟

استانا. قازاقپارات - ءيا، سىمباتى تولىسىپ ايجامالىن اي سۇيگەن قۇرمەتتى قىزدار!

ءسىز اسىقپاڭىز، ءبىر- ەكى كەزدەسۋدەن كەيىن بەلىڭىزگە قول جۇگىرتە باستاعان جىگىتكە توتەسىنەن تۋرالاتىپ بەس سۇراقتى قويۋعا ەش ارلانباڭىز.

بىلەمىن، ءسىز ول سۇراقتاردى اۋزىڭىزدان شىعارماي جاتىپ-اق ميىڭىزعا ايىرىلىپ قالسامشە دەگەن سيگنال ساڭق ەتەتىنىن سەزەمىن. الايدا، قورىقپاڭىز!

بۇل بەس سۇراقتى قويماس بۇرىن كوز جەتكىزىڭىز - ول ءسىزدى شىن ۇناتىپ ءجۇر مە؟ شىن ۇناتقانىن سەزىنسەڭىز، دەمەك، كىلت ءسىزدىڭ قولىڭىزدا.

قالاي بۇراساڭىزدا ىڭعايعا كونەدى.

سوندىقتان دا، كەزىككەن كورىكتى جىگىتتەن ايىرىلىپ قالام با دەگەن قورقىنىشتان قۇتىلىڭىز. قورقىنىشتان جاي عانا باز كەشىڭىز. الەمدەگى ەڭ داۋلەتتى دە ىسكەر ادامدار ءوز قالاۋىنا قول جەتكىزۋ ءۇشىن الدەنەدەن باز كەشۋى ءتيىس ەكەنىن تۇيسىنەدى، ال قورىققان ادام الدىعا قارىشتاپ قادام تاستاي المايدى.

ءدال وسى ءپالساپانى كەزدەسۋگە شاقىرعان جىگىتكە دە قولدانۋىڭىز ءتيىس: جوعالتىپ الۋ قاۋپى تۇرسا دا ءوز تالابىڭىزدى قويا بىلسەڭىز - قاۋىپتەن دە ارىلاسىز. مىنە، وسى قاۋىپتەنۋ ۇنەمى ءسىزدىڭ باعىتىڭىزعا كەدەرگىسىن كەلتىرەدى - كەيبىر قىزدار ار- نامىسىن تاپتاتىپ، سەنىمىن پايدالانۋىنا جول بەرەدى، ويتكەنى، ول مەنى تاستاپ كەتىپ قالادى دا، مەن تاعى جالعىز قالامىن دەگەن قورقىنىشتى ويدا بولادى.

ال، بىزشە، ەركەكتەر؟ ءبىز ءسىزدىڭ قورقىنىشىڭىزدى يىسكەپ سەزىپ قويامىز دا وتە ۇتىمدى ساتتە پايدالانىپ كەتەمىز. بىلەسىز بە: بۇل وتە كونەدەن كەلە جاتقان ويىن جانە ول ەشقاشان وزگەرمەيدى. مەنىڭ دە ۇلدارىم وسىلاي ىستەيدى: ويتكەنى، بۇعان جول بەرىپ قاراپ وتىرعان ايەلدەر بار.

الايدا، وسى ويىننىڭ ەرەجەلەرىن بىلە الاتىن سىزدە قابىلەت بار، سىزبەن ەكىنشى رەت ويناۋعا بولمايتىنىن ەسكەرتىپ، قاتىناسىڭىزدى وزگەرتە الاسىز. ەسكەرتۋ: ساۋالدى قويۋدان ۋاقىت جوعالتىپ قاشقاقتاماڭىز - ەركەكتىڭ ۇناتىپ قالعانىن تۇيسىنگەندە بۇل ساۋالداردى توتەسىنەن قويىڭىز. ونىڭ كوڭىل كۇيى ءتۇسىپ رەنجىپ قالسا، ەشتەڭە ەمەس، ءسىز اقپارات الۋعا حاقىلىسىز. ەگەر جاۋاپ بەرۋدەن باس تارتسا، دەمەك ول ءسىز ءۇشىن جاراتىلماعان جان. ال كەتتىك، مىنە بۇل ساۋالدار. ەسىڭىزدە بولسىن: ەشقانداي قورقىنىش- ۇرەيسىز.

1. الداعى ماقسات - جوسپارلارىڭ قانداي؟

ەر جىگىتپەن قاتىناسىڭىز تەرەڭدەمەي جاتىپ ونىڭ ومىردەگى ۇستانىمىن، «ەركەكتىك» تابيعاتىن تانىپ - قانداي ادام، قانداي ماماندىعى بار جانە تابىسى قانشا ەكەنىن ءبىلۋىڭىز ءتيىس.

ءسىز ونىڭ قازىرگى جوسپارلارى مەن 5-6 جىل ىشىندەگى ويلاستىرعان جوسپارلارى تۋرالى بىلۋگە حاقىلىسىز. ونىڭ جاۋابى ونىڭ ومىرىندەگى «ءسىزدىڭ» ورنىڭىزدى انىقتاپ بەرەدى. ەگەر، تىپتەن جوسپارى جوق بولسا، وندا اباي بولۋىڭىز ءتيىس. ال، ونىڭ سايلاپ قويعان جوسپارلارى بولسا تىپتەن جاقسى.

بۇل ساۋالدى ءسىز ءار نارسەگە باس اۋىرتقىش، ءار زاتقا اسەرلەنگىش ايلالى دەتەكتيۆتەي (نەگىزى سوندايسىزدار) شىنايى بىلگىڭىز كەلگەندەي قويىڭىز. ەركەكتەر وزدەرى تۋرالى اڭگىمەلەگەندى سۇيەدى - ويتكەنى، ءسىزدى تاڭقالدىرا وتىرىپ قاقپانىمىزعا تۇسىرەمىز. سوندىقتان دا، تاڭدانىپ تاڭىرقاۋىڭىز ءۇشىن بىزگە مۇمكىندىك بەرىڭىز. قانشالىقتى قىزىعۋشىلىق تانىتىپ جوسپارلارىنىڭ ءمانىن تۇسىنۋگە باس قاتىرساڭىز - ول دا سونشالىقتى كوسىلە سويلەي بەرەدى.

مىسالى، بىلاي دەڭىز: «سەن سول سالانىڭ مايتالمانى بولامىن دەپ ويلاماعان شىعارسىڭ؟" بولماسا «قىزىق ءيا، سونداي جەڭىسكە قالاي جەتتىڭ؟» دەڭىز. سوسىن زەر سالىپ تىڭداڭىز. ول اڭگىمەلەپ وتىرعاندا باقىلاپ وتىرىڭىز، شىنىمەن ول ماقسات-مۇراتىنا جەتۋ ءۇشىن تىرىسىپ جاتىر ما، الدە وتىرىكتى سۋداي ءسىمىرىپ ارمانشىل جالقاۋلىعىن جاريا ەتىپ وتىر ما؟

سونىمەن قاتار، قىسقا عۇمىرلى جوسپار ىشىنەن ءوزىڭىزدىڭ ورنىڭىزدى كورە الدىڭىز با، سول جوسپارلارعا بەيىمسىز بە، سول ماقساتقا جۇمىلا كىرىسۋگە دايىنسىز با، مۇمكىن، سىزگە وندا ورىن جوق شىعار، وسىنىڭ ءبارىن شەشىپ الۋ قاجەت. مىسالى، ەگەر ول كابەلدى كومپانيادا تەحنيك بولىپ جۇمىس جاسايمىن، ال كەشكىسىن ديپلوم الۋ ءۇشىن كوللەدجدە وقيمىن، سولاي جوعارى قاراي ورلەي تۇسەمىن دەپ ايتسا، دەمەك، بۇل جىگىتتىڭ جوسپارى بار جانە ونى ورىنداۋ ۇستىندە.

ءسىز تىپتەن، وقۋ ۇلگەرىمى ءۇشىن كومەكتەسىپ، ديپلوم الۋ راسىمىنە قاتىسىپ، جۇمىسىندا ءوسىپ- ورلەۋىنە ىقپال ەتە الاسىز. دەمەك، ونىڭ جوسپارلارى بار، دەمەك، ول تولىققاندى ەركەك بولۋعا تىرىسىپ ءجۇر - ول ءسىزدىڭ ويىڭىزداعى مەيىرىمدى دە، سەنىمدى سەرىك بولۋعا لايىقتى. الدا ارمانداعان ويى بار، ءبىراق، قالاي جۇزەگە اسىرۋىن بىلمەيتىن ەر جىگىتتەر بولادى.

مىسالى، ول پروديۋسەر بولعىسى كەلەدى، ءبىراق سول ماقسات ءۇشىن وقىپ-ىزدەنىپ، جۇمىس ىستەپ، تىنباي كينوكومپانيالاردا جۇمىس قاراستىرىپ، سەناري جازىپ، كينووندىرىس سالاسىندا تانىس ارتتىرىپ تىراشتانباسا - دەمەك، ول تىلىمەن سايراپ ساندىراقتاپ وتىرعانى. دەمەك، ونىڭ الدا ماقساتى جوق. قالاي بولماسىن، بۇل جاعدايدا ونىڭ جوسپارىنا جازىلۋعا قۇلقىڭىز بولماۋى ءتيىس. ءوز ماقسات جوسپارىڭىزدان اينىماۋىڭىز ءتيىس. ءوز باسىنىڭ اۋرەسىن شەشىپ الماعان ادام سىزگە بولاشاقتا تا جاقسى جار بولا المايدى دەگەن ءسوز.

2. بولاشاقتاعى جوسپارلارىڭ قانداي؟

ون جىلدان كەيىن ءوز ورنىن قوعامنان ەكشەپ، انىقتاپ العان جىگىت بولاشاقتاعى ماقسات- مۇددەلەرىنىڭ ورىندالۋىنا اپاراتىن بۇگىنگى جوسپارلارىنا قول جەتكىزۋگە تىرىسادى. ەگەر ول جاي عانا: «بۇگىنگى كۇنمەن عۇمىر كەشەمىن» دەپ جاۋاپ قاتسا - ول جىگىتتەن قاشىڭىز.

ونىڭ بولاشاقتاعى ماقساتتارى بۇگىنگى جوسپارلارىنداي بولسا - الاڭداماي كەتىپ قالىڭىز. جىلدام كەتىڭىز. ويتكەنى، بۇل جىگىت الداعى عۇمىرىن جوسپارلاپ، الدىنا ماقسات قويماعان، نە بولماسا جوسپارىنىڭ ىشىنەن سىزگە ورىن جوق، دەمەك، سىزگە ءبارىن ايتىپ نە كەرەك.

ءسىز ءۇشىن ءبىر عانا جوسپار بار، ول - ويىن. سىزگە كەرەگى سول ما؟ الداعى جوسپارىنان ءوزىڭىزدى كورە الاتىن ەر جىگىتتىڭ شاشاۋىن شىعارماي ويلاستىرعان ماقساتتارىنىڭ جۇزەگە اسۋىنا ءبىراز ۋاقىت كەرەك بولادى. ويتكەنى، سەنىڭىزشى: ەركەكتىڭ ميىندا مىندەتتى تۇردە ءپىسىرىپ جۇرگەن جوسپارى بولادى. سەنىمدى سەرىگىڭىزدەن ەكى ساۋالدىڭ جاۋابىن انىقتاپ العاسىن قانداي ەركەكپەن تانىسقانىڭىزدى ۇعىنىپ الاسىز. الدىنا قويعان جوسپارى جوق اداممەن قول ۇستاسىپ تابىسۋدىڭ قاجەتى جوق، ونىڭ ىلگەرى باساتىن جولى جوق، دەمەك، ەرتە مە كەش پە ءسىز اياعىنىڭ استىندا تاپتالىپ قالاسىز.

3. ءبىزدىڭ قارىم-قاتىناسقا قالاي قارايسىڭ؟

بۇل سۇراق - كوپتاراپتى سۇراق - ءوزىنىڭ تۋىس- باۋىرلارىنان باستاپ قۇدايعا دەگەن كوقاراسىنا دەيىنگى ارا- قاتىناستى بىلدىرەتىن سۇراق. ونىڭ ءاربىر جاۋابى جان دۇنيەسىن اشا تۇسەدى: ءوز مىندەتىن سەزىنە مە، تۋىپ وسكەن وتباسىنا قارىم قاتىناسى قالاي، قانداي اكە، قانداي كۇيەۋ بولعىسى كەلەدى، قۇداي تۋرالى نە بىلەتىنى بار...

مۇنى ءسىز ەر جىگىتتى ءسۇيىپ الۋدان (وبۋدەن) بۇرىن سۇراڭىز، تىپتەن كەزدەسۋگە بارماي جاتىپ-اق - تەلەفون ارقىلى سويلەسۋگە بولادى. بۇل سۇراقتاردى قويۋدان قىسىلماڭىز، اشىلىپ سويلەسۋدەن ارتىق بۇل ەركەكتەن نە كۇتەسىز؟

ەگەر مۇنىڭ بارىنە جاۋاپ بەرۋدەن باس تارتسا، ءسىز دە كەزدەسۋدەن باس تارتىڭىز. ودان اۋلاق ءجۇرىڭىز. اۋەلى ونىڭ وتباسىلىق ومىرگە قالاي قارايتىنىن ءبىلىپ الىڭىز. وتباسىن قۇرعىسى كەلە مە؟ بالالارعا كوزقاراسى قالاي؟ ءسىزدىڭ بالاڭىز بار بولسا - ونى مىندەتتى تۇردە مالىمدەڭىز، ەڭ باستىسى اكە بولۋعا دايىن با - سونى ءبىلىپ الىڭىز. ەگەر بالالى بولۋعا دايىن ەمەسپىن دەپ جاۋابىن ناقتىلاي ايتۋعا باتىلى جەتپەسە، بۇل قاتىناستى توقتاتقانىڭىز ءجون. اسىرەسە، بالالاردى ونشا ۇناتپاسا، ال ءسىزدىڭ بالاڭىز بار بولا تۇرىپ، ول بالانى ۇناتپايمىن دەسە، مۇنداي بايلانىستىڭ اقىرى نە بولماق؟ سوسىن اناسىمەن ارا قاتىناسى تۋرالى سۇراستىرىڭىز.

انا - ۇل بالانىڭ عۇمىرىنداعى العاشقى ايەل، ەگەر، اناسىنا دەگەن سىي قۇرمەتى ەرەكشە بولسا، دەمەك، ول ەركەكپەن جاقسى قارىم قاتىناس ورناتۋ مۇمكىندىگى بار دەگەن ءسوز. مۇنداي ەركەك - ايەلگە دەگەن سەزىم- قۇرمەتىن جەتكىزە بىلەدى، ىرگەسى بەرىك وتباسىنىڭ قاجەتتىلىكتەرىن تولىق ورىنداپ، قورعاي بىلەدى. ومىرىمدە ءوز اناسىن سۇيمەيتىن بىردە ءبىر بالانى كورگەم جوق.

اناشىمىزدان قورعاشتاۋ مەن قامتاماسىز ەتۋدى ۇيرەنەمىز، ايەلگە دەگەن سەزىم مەن ماحابباتتى العاش سودان بىلەمىز. شىن مانىندە، ەگەر ەر جىگىتتىڭ اناسىمەن تۋىندىعان كەلىسپەۋشىلىكتەرى كوپ بولسا، دەمەك، ونداي كەلەڭسىزدىكتەر سىزبەن دە بولادى دەگەن ءسوز. ەگەر دە ونىڭ اۋزىنان: «انام ەكەۋمىز بولەك ادامدار سياقتىمىز. بىزدەر مۇلدەم تۇسىنىسە المايمىز» دەگەن ءسوز ەستيتىن بولساڭىز، دەرەۋ ونىمەن قوش ايتىسىڭىز.

ءنومىرى مەن كەلتە حاتتارىن الاڭسىز ءوشىرىپ تاستاڭىز. كەلەسى سۇراعىڭىز اكەسى جايىندا بولسىن. اكەسىمەن قارىم قاتىناسى قانداي؟ ەگەر اكەسىمەن بايلانىسى جاقسى بولسا، دەمەك، ول ەركەك وتباسىلىق قۇندىلىقتاردى تىكتەي الادى دەگەن ءسوز. قازىرگى ۋاقىتتا اكەسىز وسكەن ۇل كوپ، الايدا، بۇلاي بولعان جاعدايدا دا، ەركەكتىڭ ومىرىندە ۇلگى تۇتار ءبىر ەركەكتىڭ بولاتىنى ءسوزسىز، ال كەيبىر ەر جىگىتتەر اكەسىز وسكەسىن بالاسىنا ءوزى كورمەي سەزىنبەي وتكەن مول مەيىرىم شۋاعىن توگە الادى.

دەمەك، اكەسىنە دەگەن كوزقاراسى ونىڭ دا بولاشاقتا قانداي اكە بولعىسى كەلەتىنىن انىقتاپ بەرەدى. سونىمەن قاتار، ونىڭ قۇدايعا دەگەن تۇسىنىگى مەن تانىمىن دا سۇراستىرعان ءجون.

تىكەلەي ايتايىن: ەگەر ول ەركەكتىڭ قۇداي تۋرالى تانىم- تۇسىنىگى، قىزىعۋشىلىعى جوق بولسا، مەشىتكە بارىپ ءتاۋ ەتۋدى ويىنا دا الماعان بولسا، ءتىپتى ومىرىندە رۋحاني كۇش الاتىن سەنىم تۇسىنىگى جوق بولسا - دەمەك، ول ادامنىڭ باسىنا تۋاتىن كۇننىڭ اۋىرتپاشىلىعى كوپ دەگەن ءسوز. ىشكى جان دۇنيەسىندەگى ءتارتىپ پەن تاربيەنىڭ ءتۇبى قۇدايعا باستاماعاندا قايدا الىپ بارادى؟ ونداي ادام سىزبەن دە ادال قاتىناس ورناتا الا ما؟

ءسىز بەن بالالارى الدىنداعى ار- ۇياتىن ساقتاۋىنا كىم كەپىل؟ ونىڭ تولىققاندى ادامدىق قالپىن ساقتاۋىنا نە كومەكتەسەدى؟ مەن مۇلدەم مەشىت باسىپ اتتاماعان ادامعا جولاما دەمەيمىن، تەك، سىزبەن كوزقاراسى سايكەس كەلمەيتىن اداممەن كەلەشەكتە ءبارىبىر سوقتىعىسىپ قالارىڭىز ءسوزسىز دەمەكپىن. ال، كەلەسى ساۋالداردى ەر جىگىتىڭىزبەن جاقىنداسا تۇسكەنىڭىزدە قويعانىڭىز ابزال. مۇمكىندىگىنشە، توسەك قاتىناسىنا بارماي جاتىپ قويعانىڭىز دۇرىس. تىپتەن، بولارى بولىپ بوياۋى سىڭسە دە، بۇل ساۋالداردى تىكەلەي قويۋىڭىز كەرەك. بۇل ساۋالدار جىگىتتىڭ نازىك جەرىنە ءتيۋى مۇمكىن، دەگەنمەن، سىزگە اقپارات كەرەك.

4. مەن تۋرالى نە ويلايسىڭ؟

بۇل ساۋالدى ءبىراز ۋاقىت وتكەسىن قويىڭىز - ول ءسىز تۋرالى ءبىرشاما ءبىلۋى ءتيىس. ونىڭ جاۋابى ونىڭ ومىرىندەگى ورنىڭىزدى بەلگىلەپ بەرەدى. ءسىز مۇنى بىلۋگە حاقىلىسىز. سەنىڭىزشى، ول ءسىزدى العاش كورگەن كۇنى- اق ءسىز تۋرالى ءبىر پىكىرگە بەكىگەن، بۇل انىق. وعان ءسىزدىڭ قانداي دا جاعىمدى كەيپىڭىز ۇناعان - كوزىڭىز، شاشىڭىز، اياعىڭىز، كيىمىڭىز - ءبىر سوزبەن ول جاي عانا جاقىنداعان جوق.

ءبىراق، سىزبەن ارى قاراي قانداي جوسپار قۇرىپ جۇرگەنىن ءبىلىپ الۋىڭىز ءتيىس. ونى مۇقيا تىڭداڭىز. ول سىزگە مىناداي جاۋاپ بەرەتىنىنىنە سەنىمدىمىن: «سەن وتە كورىكتىسىڭ، وتە جاقسى انا بولاتىنىڭا سەنەمىن، سەن وتە قىزىقتى، مەيىرىمدى، وتە كورىكتىسىڭ، مەنى وزىڭە باۋرادىڭ، ەڭبەكقور، اقىلدى، دوستىققا جۇرەگى كەڭ ادامسىڭ.. . قاسىمدا جۇرگەنىڭدى قالايمىن» دەپ قايىرا سالۋى مۇمكىن. بۇل سوزدەر سىزگە ۇنايتىنىن بىلەمىز. ءبىراق، سىزگە مۇنداي كوپ ءسوزدىڭ قاجەتى جوق.

سىزگە ناقتى دا انىق ءبىر ءسوز كەرەك. «سەن مەنى جۇرەگى جۇمساق ادام دەپ ويلايسىڭ با؟ ولاي ويلاۋىڭا نە سەبەپ، نە تۇرتكى؟ « دەپ توتەسىنەن سۇراق قويىڭىز. ول ناقتى نەگە سولاي ويلايتىنى تۋرالى ءبىر مىسال كەلتىرگەنىن كۇتىڭىز. «ەسىڭدە مە، سەن مەنىڭ انامنىڭ تۋىلعان كۇنىندە قوڭىراۋ شالدىڭ دا، قانداي سىيلىق تاڭداۋىما بولاتىنىن ايتتىڭ؟» دەپ مىسال كەلتىرسىن. ال، ءسىزدى نەگە جاقسى انا بولاتىنىن ايتسا، نەگە ولاي ويلايتىنىن دا سۇراڭىز.

سوسىن سولاي سۇراي بەرىڭىز. سىزگە تاققان جاقسى قۇلىق- مىنەزدەردى شىنايى كوڭىلمەن ايتتى ما، الدە، سىزگە نەمقۇرايدىلىقپەن ايتىپ وتىر ما، وسىنى انىقتاپ الىڭىز. ءاربىر سۇراققا بەرىلگەن جاۋابىنان بولاشاقتاعى وتباسى ومىرىڭىزدەگى ءوز ورنىڭىزدى انىقتاي الاسىز.

5. سەن ماعان قالاي قارايسىڭ؟

«ويلاۋ» مەن «قاراۋ» - ەكى بولەك نارسە. مۇنى شاتاستىرماڭىز. ءبىر ايدان كەيىنگى كەزدەسۋلەردەن كەيىن سىزگە قالاي قارايتىنىن ايتا الماعان ەركەكتىڭ - سىزگە قاتىستى كوزقاراسى جوق دەگەن ءسوز - سىزبەن بايلانىستى ەشقانداي بولاشاق كورىپ تۇرعان جوق. ەگەر ماعان قالاي قارايسىڭ دەگەن ساۋالعا كۇمىلجىپ اشۋلانا «ساعان الدىندا ايتتىم عوي، سەن تۋرالى نە ويلايتىنىمدى...» دەپ ءسوز باستاسا، ءدال وسى جەردە ونى كەسە كولدەنەڭ توقتاتىپ «جو- جوق، ماعان قالاي قارايتىنىڭدى سۇراپ تۇرمىن» دەپ شەگەلەيسىز. ول وتىرعان ورىندىعىن شيقىرلاتىپ قوزعالىپ، كومەكەيىن قاسىپ، تەمەكى تارتىپ، ايتەۋىر، جاۋاپتان باس الىپ قاشۋ ماقساتىندا ارنارسەنى سىلتاۋراتىپ، نەمەسە ءسىز قاناعاتتاناتىن وتىرىكتى ءسوزدى ازىرلەي باستايدى. بۇعان اسا ءمان بەرىپ اشۋلانباڭىز، ول ءوزى سۇيمەيتىن تەرەڭ دۇنيەگە (سەزىمىنە) سۇڭگۋىنە تۋرا كەلەدى. سەزىمىن ءتۇسىندىرۋ ەركەك ءۇشىن ۇلكەن ماسەلە. ەركەك بارلىق سۇراققا جاۋاپ تابۋى مۇمكىن: قۇداي تۋرالى، بالا تۋرالى، ءبىراق، ءوزىنىڭ جان دۇنيەسىنە باس سۇعۋ قيىن اسۋ بولىپ كورىنەدى. ويتكەنى، ەركەكتە سەزىمىن تىلمەن ايتىپ توگۋ قاسيەتى مۇلدەم جوق.

ءبىراق، بۇل دەگەنىمىز ءسىزدىڭ سۇراعىڭىزدان باس تارتۋ كەرەك دەگەن ەمەس. ءسىز مىناداي سياقتى ءسوزدى ەستۋىڭىز ءتيىس: «سەنى كورمەي قالسام بولدى، الدەكىم جانىما جەتپەي تۇرعانداي بولام، سەنىڭ نەمەن اينالىسىپ جۇرگەنىڭ ماعان ءاردايىم قىزىق، سەنى كورگەنىمدە جانىم جاي تابادى، سەن مەنىڭ ومىردەن ىزدەگەنىمسىڭ».

باسقاشا ايتقاندا، ونىڭ جاۋابى سىزگە ەرەكشە كوڭىل كۇي سىيلاۋى ءتيىس. ول ءسىزدى تولىق سۇيمەۋى دە مۇمكىن، تەك ۇناتىپ قالۋى دا مۇمكىن، دەگەنمەن، ويىندا سىزگە قاتىستى ۇزاق مەرزىمدى قارىم- قاتىناس ورناتقىسى كەلەتىن تىلەگى بار بولۋى مۇمكىن نەمەسە، عۇمىربويى قورعاشتاپ، قامتاماسىز ەتە الاتىن جۇبىنىڭ رولىندە ەلەستەتىپ ءجۇرۋى مۇمكىن.

«سەن وتە عاجاپسىڭ» دەگەن سياقتى جاۋاپقا جول جوق. ونىڭ سەزىمدەرىنىڭ شىنايىلىعىن سەزىنبەسەڭىز، وي ساناسى سىزدەن اۋلاق جۇرگەنىن بايقاساڭىز - قاشىڭىز. بۇل ساۋالداردى كەيىننەن دە قويامىن دەپ كەشىكتىرمەڭىز، مۇنى دەرەۋ ءبىلىپ العان ءجون. ءتىپتى، بولارى بولىپ بوياۋى سىڭگەسىن «ونىڭ مەن جايلى كوزقاراسىن دا بىلمەيمىن» دەپ وكىنگەننەن پايدا جوق. ءبىر جاعىنان، مۇنداي ساۋالداردى تاپقىرلىقپەن قويىپ وتىرعان قىزعا (ايەلگە) دەگەن كوزقاراسىمىز دا وزگەرە تۇسەدى. ءبىز دە وسى ساۋالدار توڭىرەگىندە ىشتەي ويلانامىز، ءبىراق، سىزدەردەي اشىق سۇراپ جاتپايمىز.

ستيۆ حارۆيدىڭ «دۋماي كاك مۋجچينا، پوستۋپاي كاك جەنشينا» كىتابىنان اۋدارىلدى.

jaisan.kz



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات