قازاقستاندىق گيتاراشى جىگىت داۋلەتكەرەيدىڭ كۇيىن جاڭا فورماتتا ورىنداپ شىقتى - كەسكىن

None
None
الماتى. قازاقپارات - قازاقستاندىق گيتاراشى جىگىت رۋسلان مەرعاليەۆ (ساحنالىق لاقاپ اتى Ru-Me) قازاقتىڭ ۇلى كۇيشىلەرىنىڭ ءبىرى - داۋلەتكەرەي شىعاي ۇلىنىڭ «قوسالقا» كۇيىن جاڭا فورماتتا ورىندادى.

مۋزىكانتتىڭ ماقساتى - قازىرگى زامانعى اۋەندەردى قولدانۋ ارقىلى جاستاردىڭ حالىق شىعارماشىلىعىنا دەگەن قىزىعۋشىلىعىن وياتۋ. قازىر ونىڭ رەپەرتۋارى ءبىرقاتار تۋىندىلارمەن تولىعىپتى.

«مەنەن دوس- جاراندارىم: «قازاقشا تۋىندىڭ بار ما؟ جوق بولسا، نەگە جوق؟ قاشان بولادى؟ قازاقتىڭ حالىق اۋەندەرىن گيتارامەن ورىنداۋ قىزىق قوي»، دەپ ءجيى سۇرايدى. مەن سودان ويعا قالدىم. ءسويتىپ، وسى تاقىرىپ بويىنشا كليپ ءتۇسىردىم»، - دەدى Ru-Me.

بەينەكليپ سەلفي تۇرىندە تۇسىرىلگەن. تەك مونوپودتىڭ ورنىنا گيتارا قولدانىلعان. كليپتە مۋزىكانتتىڭ الماتى قالاسىندا ءار ءتۇرلى ادامدارمەن جولىعىپ، كوڭىلدى اڭگىمەلەسكەن ساتتەرى كورسەتىلگەن. كليپكە قازاقستاننىڭ ەسترادا جۇلدىزدارى دا قاتىسقان.

Ru-Me-دىڭ ايتۋىنشا، قازىرگى قازاقستاندىق ەسترادا ساپالى اسپاپتى مۋزىكاعا وتە مۇقتاج. سوندىقتان باستى ماقسات - اسپاپتى مۋزىكانى دامىتۋ.

«اسپاپتى مۋزىكا - بۇل ءوز الدىنا بولەك باعىت. سوندىقتان، ونىڭ اۋقىمى كەڭ. شەت ەلدىكتەر قازاقتىڭ اسپاپتى مۋزىكاسىنا قىزىعۋشىلىقپەن قارايدى. بۇعان قىدىرالى بولمانوۆ باسقاراتىن «ۇلى تاۋ» توبىنىڭ جەتىستىكتەرى كۋا بولا الادى» - دەدى مۋزىكانت.


سوڭعى جاڭالىقتار