استانادا شەتەلدەن كەلگەن قازاق بالالارىن تەستىلەۋگە جانە مەكتەپكە دايىندايتىن ورتالىق قۇرىلدى
بۇل كۇندە شەت ەلدەردەن كەلىپ جوعارى وقۋ ورىندارىنا تۇسكىسى كەلەتىن قازاق جاستارىنىڭ باساتىن كۇدىر جولى كوپ. ءار ەلدىڭ وقۋ جۇيەسىنىڭ ءار الۋاندىلىعىن ايتپاعاندا، ءبىر قازاقتىڭ ۇقساماعان ءالىپبيدى قولدانۋى دا ولاردى كوپ قيىندىقتارعا جولىقتىرادى. ال، سوڭعى كەزدەرى قانداستارىمىز تۇراتىن ەلدەردەگى قازاق مەكتەپتەرىنىڭ جابىلۋى ەلگە ورالعان جاستار جاعدايىن ءتىپتى دە قيىنداتۋدا.
وسىنداي كەدەرگىلەردى جويۋ ماقساتىندا جۇمىسىن باستاعان ورتالىقتىڭ ديرەكتورى، استانا قالاسى دارىندى بالالارعا ارنالعان «زەردە» مەكتەبىنىڭ ماتەماتيكا ءپانى ءمۇعالىمى ىرىسبەك ءماۋىت: «ءوزىمىز دە شەتتەن كەلگەندە جازۋ مەن ءتىل ماسەلەسىنىڭ قيىندىعىنا تاپ بولعانبىز. ارينە، بىردەن ۇيرەنىپ كەتۋ وڭاي ەمەس. ال، بۇگىن دە وتانعا ورالىپ جاتقان باۋىرلارعا بۇل وتە اۋرىتپاشىلىق اكەلۋدە. كەزىندە ارنايى بەيىمدەۋ ورتالىقتارى جۇمىس ىستەگەنىن بىلەمىز. ءبىراق ولار ءبىلىم بەرۋ ەمەس، كوبىنەسە ورتاعا بەيىمدەۋ باعىتىندا بولدى. قازىر شەتتەن كەلىپ ءبىلىمىن وسىندا جالعاستىرىپ جاتقان بالالاردىڭ جازۋدان، تەرميندەردەن قاتتى قينالىپ جۇرگەنىن ەستيمىز. ولاردى ءوزىمىز جۇمىس جاسايتىن وسى وقۋ ورنىنان دا كوپ كورەمىز. ونىڭ سىرتىندا، دايىندىق كۋرسىنا تۇسۋگە ۇلگەرە الماي قالعان بالالار دا كەشەندى تەستكە قاتىسىپ باق سىناعىسى كەلەدى، ءبىراق، ارنايى باعدارلاما مەن دايىندالماعان سوڭ وقۋعا تۇسە الماي جاتادى» ، - دەگەن ويىن ايتا كەلىپ، باستاما تۋرالى دا بايان ەتتى.
ونىڭ ايتۋىنشا، جۇمىسىن جاڭا عانا باستاعان ورتالىق شەتتەن كەلگەن قانداستاردىڭ بالالارىن مەكتەپكە جانە كەشەندى تەستىلەۋگە دايىندايتىن ارنايى باعدارلاما جاساپتى. «بىزدەگى مۇعالىمدەردىڭ ءبىرسىپراسى قىتايدان، موڭعۇليادان كەلگەن بىلىكتى ماماندار. ولار وزدەرى سول ەلدىڭ تىلدەرىن، وقۋ- اعارتۋىنىڭ جۇيەسىن بىلەتىندىكتەن جۇمىس جۇرگىزۋ اسا قيىن بولمادى. ەندى سول باعدارلاماعا ساي باعىتتا ۇزدىكسىز جۇمىس ىستەمەكپىز» ، - دەيدى ءبىلىم بەرۋ سالاسىندا 15 جىلدان اسا ۋاقىت ەڭبەك ەتكەن ۇستاز ى. ءماۋىت.
ورتالىقتىڭ مەنەدجەرى، استانا قالاسى دارىندى بالالارعا ارنالعان «زەردە» مەكتەبىنىڭ حيميا ءپانى ءمۇعالىمى اياتجان احمەتجاننىڭ ايتۋىنشا وزگە ەلدەن كەلگەن قازاق بالالارى جاراتىلىستانۋ ءپانىن وتە جاقسى مەڭگەرىپتى.
«ءبىز قاجەتتىلىككە قاراي از عانا ۋاقىتتىڭ ىشىندە حيميا، ماتەماتيكا، فيزيكا سىندى ءۇش ءپان بويىنشا قىتايشا- قازاقشا تەرميندىك سوزدىك قۇراستىردىق. ويتكەنى، قىتاي ەلىنەن كەلىپ جاتقان بالالار وتە كوپ جانە ولاردىڭ بارلىعى دەرلىك قازاق ءتىلىن جەتىك مەڭگەرمەگەن، قىتاي سىنىپتارىندا ءبىلىم العاندار. ءبىراق، ولاردىڭ ءبىر ارتىقشىلىعى - جاراتىلىستانۋ پاندەرىنە وتە مىقتى. قازاقستان تاريحى ءپانىن مۇلدە كورمەگەن وقۋشىلار ءۇشىن دە سول پاننەن بىردەن جوعارى بالل جيناۋ مۇمكىن ەمەس. ۇقساماعان الفاۆيتتەردىڭ قولدانىسى دا قازاق ءتىلى ءپانىن يگەرۋگە كەدەرگى تۋدىرادى. سونىڭ بارلىعىن ەسكەرە وتىرىپ الىستان كەلگەن اعايىننىڭ بالاسىنا جان- جاقتىلى ءبىلىم بەرۋگە كۇش سالۋدامىز. وسىلايشا بارلىق پاندەر بويىنشا كەشەندى تەستىلەۋگە دايىنداۋدى 18 - شىلدەگە دەيىن تۇراقتى جۇرگىزىپ وتىرامىز. ال، ءار جىلدىڭ قىركۇيەگىنە دەيىنگى ۋاقىتتى وقۋشىلاردى مەكتەپتەرگە دايىنداۋعا ارناماقپىز» ، - دەيدى ول.
ايتا كەتەيىك، «زەردەلى» اقىل- وي دامىتۋ ورتالىعى وتكەن جىلدىڭ قىركۇيەك ايىنان بەرى جۇمىس جاساپ كەلەدى. وندا ءۇش عىلىم دوكتورى، وننان استام عىلىم ماگيسترى جۇمىس جاسايدى. تەك استانا قالاسىنىڭ جوعارى ساناتتى تاڭداۋلى مۇعالىمدەرىنەن قۇرالعان ۇزدىك ۇجىم بۇل كۇندە ۇزاق جىل وليمپيادالار مەن ۇ ب ت- دا جيناقتاعان تاجىريبەلەرىنەن پايدالانىپ، كوپتەگەن قازاق ءتىلدى وقۋ قۇرالدارىن دايىنۋدا.