كىسى قانشالىقتى تاقۋا بولىپ كورىنسەدە ول ءبارىبىر پەرىشتە ەمەس، پەندە ەكەنىن ۇمىتپايىق

الماتى. قازاقپارات - وسىدان ءۇش جىل بۇرىن بولعان جاعداي. ەسىمە تۇسكەن سايىن ءوز- وزىمە رەنجيمىن. وقيعا بىلاي بولدى، كەشكە ۇيگە قوناق شاقىرىپ قويعان ەدىم.

ۇيدەگى ىشكى ىستەر ءمينيسترى بازاردان ورىك- مەيىز الا كەلۋدى ماعان قۇنىتتاپ تاپسىرعان بولاتىن.

قاربالاس جۇمىستىڭ اراسىندا ءجۇرىپ كوكبازارعا ابدەن تاياعاندا ءبىراق باردىم. ادەتتەگىدەي كوكبازاردىڭ الدى قايناپ جاتىر. كولىگىمدى قويارعا بوس ورىننىڭ ىڭعايى كەلمەي تۇر. كەنەت ءبىر ورىندى كوزىم شالدى.

وزىمشە: «شلاگباۋمنىڭ جانىنداعى مىنا جەر بوس تۇر عوي، كىرىپ- شىعاتىن كولىك ەمىن- ەركىن وتە الادى» - دەدىم دە كولىگىمدى سول جەرگە تاقاپ قويا سالدىم. ەسىكتى جاپقانىم سول ەدى، كۇزەتشى بالا جۇگىرىپ كەلىپ: «اعاسى، بۇل جەرگە كولىك قويۋعا بولمايدى، شلاگباۋمنان كىرىپ- شىعاتىندارعا كەدەرگى كەلتىرەدى» - دەدى. باۋىرىم نەگە بولمايدى؟

«مىنا جەردە بوس ورىن تۇر عوي. ەشكىمگە كەدەرگى كەلتىرمەيدى، تۇك تە ەتپەيدى» - دەدىم.

كۇزەتشى بالا: «بولمايدى» - دەدى. مەن «بولعاندا قانداي، بولادى» - دەيمىن دە ەشتەڭكەگە قاراماي كولىكتى قۇلتتاپ، كۇزەتشىگە باعىنباي الدىعا ءبىر قادام اتتاي بەرگەنىم سول ەدى، الگى جىگىت: «اعا ەندى تانىدىم. ءسىز قايرات جولدىباي ۇلى ەمەسسىز بە؟ مەن ءسىزدىڭ كىتاپتارىڭىزدى ىزدەپ ءجۇرىپ وقيمىن عوي» - دەپ اعىنان جارىلىپ، استى- ۇستىمە ءتۇسىپ ەشكىمگە اشپايتىن شلاگباۋمدى اشىپ جاتىر.

ال مەنىڭ بەتىم دۋ ەتە قالدى. ۇياتتان ورتەنىپ بارام. قانشا اسىعىس بولسام دا، مەنىكى پەندەشىلىك ەدى. ۋاعىزىڭدى ۇيىپ تىڭداپ، كىتابىڭدى وقىپ جۇرگەن مىنا جىگىتتىڭ الدىندا ۇرلىق ۇستىندە ۇستالىپ قالعان بالا قۇساپ، نە دەرىمدى بىلمەي ساستىم دا قالدىم. قازاقتا «قويدىڭ قۇلاعانى بايقالمايدى، تۇيەنىڭ سۇرىنگەنى كورىنىپ تۇرادى» دەگەن ماقال بار. ەل الدىندا ءدىن اتىنان سويلەپ جۇرگەن بىزدەرگە پەندەشىلىكتىڭ مۇندايى دا «حارام»! قانداي جاعداي بولسا دا، قانشالىقتى اسىعىس بولساق تا جاقسى مىنەزدەن جاڭىلماۋ قاجەت. كوركەم مىنەز تابيعاتىمىزعا اينالۋى ءتيىس. ءبىزدىڭ قانداي دا ءبىر قاتەلىگىمىزدىڭ، ۇساق پەندەشىلىگىمىزدىڭ ءوزى قايسى ءبىر ادامداردىڭ دىنگە دەگەن سەنىمىنە سەلكەۋ ءتۇسىرۋى ابدەن مۇمكىن. ەندەشە اباي بولعان ءجون.

بۇگىندە ساقال قويعان جانداردى ءجيى كەزدەستىرەمىز. ساقال - سۇننەت. قايسى ءبىر عالىمدار بويىنشا ءۋاجىپ. اركىمنىڭ ءوز تاڭداۋى. ساقال قويعان سوڭ بەت پىشىنىڭە ىڭعايلاپ رەتتەپ، كۇتىپ ۇستاۋ كەرەك. بۇل - ءبىر.

ەكىنشىدەن، قوعامدا ساقال قويعان جانعا ناماز وقيتىن ءدىندار ادام رەتىندە قارايدى. ال توسىنە جەتەتىندەي ساقال قويىپ العان كەيبىر جانداردىڭ باستارىنا كەپكا، بۇتتارىنا تىرىسقان شورتيك كيىپ، شايناڭ- شايناڭ ەتىپ ساعىز شايناپ، نە بولسا، سونى اڭگىمە قىلىپ ايتىپ تۇرعانىن كورگەندە ىشتەي قىنجىلاسىڭ. ساقال قويعان سوڭ سوعان ساي تاقۋالىعىڭدى دا قوسا الىپ ءجۇرۋ كەرەك.

قىسقاسى ساقالدىڭ قادىرىن كەتىرمەۋ ءلازىم. ايتپەسە، دىنىڭە كىر كەلتىرەسىڭ. ورامال تاققان قىز، كەلىنشەكتەر دە سولاي اباي بولعانى ءجون. ال جالپى جۇرتقا ايتارىم، كىسى قانشا ساقال قويىپ، ايەل زاتى ۇزىن ەتەك كيىپ، ورامال تاقسا دا ول ءبارىبىر پەرىشتە ەمەس، پەندە ەكەنىن ۇمىتپايىق. ەندەشە، ولاردىڭ قاتەلىكتەرى ءۇشىن اسىل ءدىنىمىزدى جازعىرۋعا اقىمىز دا جوق.

قايرات جولدىباي ۇلى

islam.kz