اتاقتى حورلان سۇلۋدىڭ جۇزىگى كىمدە؟

نۇر-سۇلتان. قازاقپارات - «دەسە داعى ەل ءداستۇرى ەرگە سىن، قارتتارعا ەسكەرت - قارسىلاسا كورمەسىن. قورلانىمنىڭ كوزى بولعان جۇزىكتى، وتىنەمىن، وزىممەن ءبىر جەرلەسىن!

سەرت پەن سوزگە ۇمىتشاقتاۋ ولكەدە

عاشىق بولىپ ءولۋ - قانداي مارتەبە!

تىرلىگىمە شابىت بەرگەن بۇل جۇزىك

جارىق بەرىپ جاتسىن ماعان كوردە دە!».

مۇحتار شاحانوۆتىڭ «عاشىقتىق عالاماتى» داستانىن جاتقا ايتىپ وتىرىپ حورلان سۇلۋدىڭ جۇزىگىن كوز الدىنا ەلەستەتپەگەن جان بار ما، ءسىرا! «حورلان بەرگەن جۇزىك شىنىمەن دە اقىن اماناتتاعانداي، وزىمەن بىرگە كومىلدى مە؟ كومىلمەسە، قايدا؟» دەگەن سۇراق اركىمنىڭ كوڭىل تەرەزەسىن قاققان بولار.

جالپى، وسىناۋ قىزىقتى جايتتى انىقتاۋ ءۇشىن ەڭ الدىمەن «بۇل جۇزىك ءوزى اسەم قيالدىڭ جەمىسى مە، بولماسا ەستايدىڭ ساۋساعىندا شىنىمەن دە بولعان با؟» دەگەن سۇراققا جاۋىپ بەرىپ الۋ ماڭىزدى.

«ەستاي جاسى الپىستىڭ جەتەۋىنە كەلگەننىڭ وزىندە «حورلاندى» ايتاردا قولىنا دومبىراسىن الىپ، ءبىراز ۋاقىت ءۇنسىز تۇنجىراپ، تەرەڭ ويعا شومىپ، ءبىر كۇرسىنىپ قويىپ، كوزىنە ىركىلگەن جاستى جىبەك ورامالىمەن ءبىر سيپاپ قويىپ، ءاندى باستاپ كەتەدى ەكەن. باياۋ باستالعان دومبىرانىڭ شەگىنە داۋىسىن قوسقاندا ءبىر ءتۇرلى كۇڭىرەنگەن، كوپ دۇنيەنى كوز الدىڭا ەلەستەتىپ، يسانىڭ «قۇرالاي سۇلۋىنداعى» توقسانعا كەلگەن كەلدەنبايدىڭ ارمانىنداي ۇلكەن، توزبايتىن، كونەرمەيتىن، ولمەيتىن ارمانداي ءۇن شىعادى ەكەن.

ەستايدىڭ دومبىرا قاققان وڭ قولىنان اتى جوق ساۋساعىنداعى التىن جۇزىك «مەن حورلاننىڭ كوزىمىن» دەپ تۇرعانداي جارق-جۇرق ەتىپ، ءاننىڭ ىرعاعىمەن قوزعالعانداي بولادى ەكەن. ءانشىنىڭ ءوزى دە «حورلاننىڭ سوڭىندا ءومىردىڭ «تاليسمانىنداي» جۇزىگىنە قاراپ: «ءيا، شىراقتارىم، مىناۋ سول كۇندەردىڭ كۋاسى، حورلاننىڭ كوزى» دەپ ۇزاق ۋاقىت جاڭا كورگەندەي تەسىلىپ قاراپ ءبىراز وتىرىپ قالادى ەكەن» دەگەن ەكەن احمەت جۇبانوۆ ءوزىنىڭ «زامانا بۇلبۇلدارى» كىتابىندا.

جالپى، ەستاي بەركىمباي ۇلىنىڭ ومىردەرەگىنە شولۋ جاسار بولساق، ول قازىرگى ەكىباستۇز وڭىرىنە قاراستى اقكول-جايىلمادا كەدەي شارۋا وتباسىندا دۇنيەگە كەلگەن. جاستايىنان ساۋىق كەشتەرىنىڭ كوركى بولعان ەستايدىڭ يسانىڭ قابىشىمەن جولداس بولۋى ونىڭ انشىلىك ونەرىنىڭ ورىستەۋىنە سەپتىگىن تيگىزەدى. يسا باسەنتيىننىڭ قابىرعالى قازانعاپ اۋلەتىنەن. قازانعاپ باياناۋىلداعى شورمان، شوڭ بيلەرگە دەڭگەيلەس ءارى داۋلەتتى، بەدەلدى ادام بولعان. يسانىڭ ءوزى كەرەكۋ توڭىرەگىنە اتى ءمالىم، قادىرلى ادام بولسا، وقىعان، كوزى اشىق بالاسى قابىش تا اقىندىق ونەردەن قۇرالاقان ەمەس ەكەن.

سول قابىش مارالدى دەگەن جەردەگى ءبىر باي ادامنىڭ قىزىنا ۇيلەنبەكشى بولادى. يسا بالاسىنىڭ جانىنا كۇيەۋ جولداس بوپ بارار جىگىت ىزدەيدى. تالاي ونەرپازدىڭ ىشىنەن ەستايدى تاڭداپ، اكەسى دە، قابىش تا وعان قولقا سالادى. ءسويتىپ، ەستاي كۇيەۋ جولداس بولىپ مارالدى-ۇرىق جاققا بارادى. ويىن-ساۋىققا سول قۇدا تۇسكەن ءۇيدىڭ اتالاس تۋىسى سولتانبەكتىڭ حۇسني-حورلان دەگەن سۇلۋ قىزدارى كەلەدى. ەستاي ءوزىنىڭ انىمەن تويداعى كوپشىلىكتى اۋزىنا قاراتادى.

جۇرتتىڭ قولقالاۋىمەن ارقانىڭ تالاي ءانىن تامىلجىتادى. حورلاننىڭ دا بار ىقىلاسى ءانشى جىگىتكە اۋسا كەرەك. بۇل جايىندا ءانشى-اقىن ەستاي: «كوز كوڭىلدىڭ سىرىن شەرتەدى» دەگەندەي، حورلانمەن مەنىڭ بازارىم كۇن ساناپ قىزا ءتۇستى. حورلان جوق جەردە مەنىڭ دومبىرامنىڭ قۇلاق كۇيى كەلمەي، ءانى دە قاناتتانباي، بەرەكەم بولمايتىن كۇيگە ۇشىرادىم. حورلان دا سونداي كۇيدە» دەپ جان سىرىن اشقان.

ەستاي جايلى دەرەكتەردىڭ بارىندە ەكى عاشىقتىڭ ءبىر-بىرىنە ىنتىزار بولىپ، سەرت بەرىسكەنى تۋرالى ايتىلادى. الايدا حورلان سۇلۋ ول كەزدە ايتتىرىلىپ قويعان بولاتىن. عاشىق ساعىنىشى، سۇيگەن جاننىڭ سەرتى ەستايدى مارالدىعا جەتەلەيدى. «ارادا ءبىراز ۋاقىت وتكەننەن كەيىن، - دەگەن ەكەن ەستاي ءوز ەستەلىكتەرىندە، - مارالدى ەلىنىڭ شەتىنە جەتتىك. ءبىز كەلەردەن ءبىر كۇن بۇرىن حورلاندى اتاستىرىپ قويعان ادامى الىپ كەتىپتى. مەندە ەس قالمادى. اقىرى سۇيىكتى دومبىرامدى قولعا الىپ، باياۋلاتىپ شەرتىپ باسىلدىم».

بۇل حيكايانى سيپاتتاپ جازعان جازۋشى تولەۋتاي اقشولاقوۆ ءوز ەڭبەگىندە اڭىزعا اينالعان جۇزىك تۋرالى بىلاي دەپتى: «...ءبىراق ول حورلانىن ءومىر بويى ۇمىتقان ەمەس، جۇرەگىنىڭ التىن ساندىعىندا ماڭگىلىك ساقتاعان. قولىنداعى قارا الا كۇمىس ساقينا حورلاننىڭ ءوز كوزىندەي، ونىڭ ەسكەرتكىشىندەي، ويتكەنى ونى حورلانى سىيلاعان ەدى. اقىن ەش ۋاقىت سول ساقينانى قولىنان العان ەمەس. ءان سالاردا ول ارۋاق شاقىرعانداي، ساقيناسىنا ءبىر قاراپ الاتىن ەدى».

ەستايدىڭ تۋعان اعاسى نۇرماعامبەتتىڭ بالاسى كارىباي نۇرماعامبەتوۆ ءوزىنىڭ 1970-جىلى جازعان ەستەلىگىندە «1946-جىلى اقىندار ايتىسىنا شاقىرىلعان ەستاي اتامىز «ولەڭتى» سوۆحوزىنىڭ «قاراجار» ۋچاستوگىنەن اۋدان ورتالىعىنا كەلەدى. وسى ساپارىندا قاتتى ناۋقاستانعان ول كراسنوكۋتسك سەلوسىندا جاتادى. ماعان حابار ءۇش كۇننەن كەيىن جەتتى. ول كىسىنى قولما-قول چكالوۆ اتىنداعى سوۆحوزداعى ءوز ۇيىمە الىپ كەلدىك. ارادا جەتى كۇن وتكەننەن كەيىن تاڭەرتەڭ ول اۋىلداعى زامانداسى اپەش ءتاشوۆتى شاقىرتىپ الدى. شاي جاساتىپ، سەميا مۇشەلەرىن داستارحان باسىنا شاقىردى. ءوزى دە دامنەن ازداپ اۋىز ءتيدى. وسيەتىن ايتتى. سونان سوڭ توسەگىنە جاتتى. بىرەر مينۋتتان كەيىن ول ماڭگىلىك كوز جۇمدى. ەستاي اتامىزدى ءوزىنىڭ وسيەتى بويىنشا چكالوۆ اتىنداعى سوۆحوزدىڭ ءبىرىنشى بولىمشەسىندە جەرلەدىك» دەگەن.

وسى تۇستا ايتا كەتەرلىك جايت، ەستاي اتامىزدىڭ حورلاننان كەيىنگى سۇيگەنى - جارى زاعيشانى بوزتاي جاقىپبايەۆ ەستاي قايتىس بولعان كۇننىڭ ەرتەڭىندە كوز جۇمعان دەپ جازسا، ەستايدىڭ نەمەرە ءىنىسى قىزداربەك امىرەنوۆ: «اۋىرىپ جاتىپ ەستاي: زاعيشا دا كوپ جۇرە قويماس. بىردەمە بولىپ كەتسەم سۇيەگىمدى ەلگە سۇيرەمەي، وسىندا قويىڭدار»، - دەپ اماناتىن ايتادى. ءبىراق زاعيشا جەڭگەم ەستاي اعادان ءبىر كۇن بۇرىن اۋىرىپ قايتىس بولعان ەدى. اعايىندار اقىنعا اۋىرتپالىق تۇسىرمەيىن دەپ ەستىرتپەگەن» دەپ ەستەلىك شەرتەدى.

ەستايدىڭ كوزىن كورگەن، ارالاس-قۇرالاس بولعان، تۋىس ادامدار ايتتى دەگەن وسىنداي دەرەكتەردى زەردەلەسەك، ەستاي اقىننىڭ اڭىز-جۇزىكتى تاعىپ جۇرگەنى جانە ونى حورلاننىڭ كوزى ەكەنىن تىلگە تيەك ەتىپ وتىرعانى اقيقات. ال مۇحتار شاحانوۆ اعامىزدىڭ «عاشىقتىق عالاماتى» داستانىندا ايتىلعانداي، ەستايدىڭ ءدال كوز جۇمار شاعىندا دوسى نۇرلىبەكتىڭ باقۇلداسۋعا كەلگەنى تۋرالى دەرەك ءوزىم قاراستىرعان مالىمەتتەردەن كەزدەسپەدى.

ەستاي اقىننىڭ اۋلىنا ءبىرجان كەلگەندە ونىڭ الدىندا ءان سالعانى، باسقا دا ونەر كورسەتكەن كەزەڭدەرى جازبا دەرەكتەردە سيپاتتالعانىمەن، نۇرلىبەك اتتى دوسىمەن قارىم-قاتىناسى جايلى كوپ ايتىلا بەرمەگەن. الايدا قيماديدەن نىعمان ۇلىنىڭ «ەستاي» اتتى داستانىندا جانە رامازان توقتاروۆ جازبالارىندا ەستايدىڭ سول قازا بولاتىن ساپارىندا نۇرلىبەك اتتى اقىنمەن ايتىسقا بارا جاتقانى اۋىزعا الىنادى. بۇل - اقىننىڭ ماي اۋدانىندا تۇرعان زامانداسى نۇرلىبەك بايمۇراتوۆ اتتى اقىن.

جۋرناليست ايتجان بادەلحانوۆ قۇراستىرعان «ەستاي» اتتى كىتاپتا مىناداي دەرەك بار: «اقىن قايتقان كەزىندە ىشىندە بولعان سول اۋىلدىڭ تۇرعىن قارتتارى 82 جاستاعى ءالقۇلوۆا قاۋا، نۇرعاليەۆ مامىرقان، قابانعاليەۆ كارىم قارتتاردان 1989-جىلى ءمان-جايدى سۇراستىرعانىمىزدا: «ەستاي قىزۋى كوتەرىلىپ، ەس-ءتۇسىن بىلمەي قاتتى اۋىرىپ كەلدى. ءبىر جۇمادان كەيىن دۇنيەدەن ءوتتى. سوعىستان كەيىنگى تارشىلىق ۋاقىت. كوكتەمگى الاساپىران كەز. اقكولگە حابار بەرۋ مۇمكىن بولمادى. ءبىز ول كەزدە جاس بولعاندىقتان جابدىققا ونشا ارالاسا قويماعانىمىزبەن، «ولەڭ شىعاردى»، «نۇرلىبەك اقىن كەلدى» دەگەندى ەستىگەن جوقپىز. ونداي وقيعا بولسا ەستىلەر ەدى عوي. تەگى بەرتىن شىققان ءسوز بولار دەستى».

جالپى، اقىل تارازىسىنا سالساق، قاتتى اۋىرىپ جاتقان ادامنىڭ ءوز باسىمەن قايعى بولاتىنى بەلگىلى. ونىڭ ۇستىنە، ەستاي قايتىس بولعان كەز - سوعىستان كەيىنگى تارشىلىق ۋاقىت، بايلانىس، قارىم-قاتىناستىڭ قات شاعى. باسقا اۋداننان نۇرلىبەكتى شاقىرتىپ الدىرۋدىڭ مۇمكىندىگى دە از. دەمەك، ەستايدىڭ كوز جۇمارىندا حورلان بەرگەن جۇزىكتى وزىمەن بىرگە كومۋدى اماناتتاپ تاپسىرىپ كەتتى دەگەن حالىقتىڭ قيالىنان تۋىنداعان ءساتتى اڭىز بولسا كەرەك. ءبىراق جۇزىكتىڭ ءوزىنىڭ نەگىزى ەستايدا بولعانى راس. ولاي بولسا، ول قايدا كەتكەن؟

قابجان ىبىرايەۆ اتتى جەرلەسى 1970-جىلى جازعان «ەستايدىڭ ساقيناسى» اتتى ەستەلىگىندە «1946-جىل بولاتىن. ەستاي اۋىر ناۋقاستان كەيىن ءبىزدىڭ اۋىلدا دۇنيە سالدى. ەسكى سالت بويىنشا ەستاي مارقۇمنىڭ كيىم-كەشەگىن زامانداستارىنا تاراتتى. ال ونىڭ جۇزىگىن «ەستايدىڭ عۇمىرىن بەرسىن، ءبىر شاڭىراقتىڭ جالعىزى عوي» دەپ ماعان ۇيعاردى. تالاي ويىن-تويلاردا، شىلدەحانادا قىز-بوزبالالار مەنەن ونى قيىلىپ سۇراپ ءجۇردى»، - دەيدى. ال كەڭەس توكەنوۆ اتتى ازامات 2002-جىلى «حورلاننىڭ ساقيناسى تۋرالى وسى كۇندە ءارتۇرلى ءسوز بولىپ ءجۇر عوي. چكالوۆتا 1990-جىلى بولعان ەستاي تويىندا اپەشيەۆ قاراشا قانشاما ادامداردىڭ كوزىنشە «ەستايدىڭ ساقيناسى مەندە» دەپ جار سالدى عوي. كىم ءبىلسىن ونىڭ قولىنا قالاي تۇسكەنىن. ەستاي قايتقاننان كەيىن سۇيەگىنە بەس ادام ءتۇستى. ولار - اپەش، دۇيسەنبەك، بيعوجا، ىبىراي، بەسىنشىسىن ۇمىتتىم. ساقينانى وسىلاردىڭ بىرەۋى الۋى مۇمكىن، ارينە. ول كەزدە سۇيەككە تۇسكەندەرگە كيىم بەرىلەتىن ەدى عوي. ال سول ساقينانى قابجاننىڭ قولىنان ءوز كوزىممەن كوردىم» دەپ اڭگىمە اعىتقان.

ەستايدىڭ ءومىرى مەن شىعارماشىلىعىن زەرتتەپ، ول جايلى ەستەلىكتەردى «ەستاي» كىتابىنا شوعىرلاندىرعان زەرتتەۋشى ايتجان بەدەلحاننىڭ دا حورلاننىڭ جۇزىگى جايلى اقيقاتقا جەتكىسى كەلگەن. «ءانشى تۋرالى جازا وتىرىپ كەيبىر اۆتورلاردىڭ ليريكالىق سەزىم ىرعاعىنا قۇلاي بەرىلىپ كەتەتىنى سونشالىق، كەيدە كوپشىلىككە ءمالىم اقيقات جايتتاردىڭ ءوزىن قۇرىققا سىرىق جالعاپ، ءوڭىن اينالدىرىپ جىبەرەدى. مىسالى، ولاردىڭ بىرەۋى حورلان ەستايعا كۇمىس ساقينا بەرىپ ەدى دەسە، ەكىنشىسى ونى جۇزىك، ءۇشىنشىسى التىن ساقينا، ءتورتىنشىسى ول ادەمى كوك جاۋھارى بار التىن جۇزىك ەدى دەپ جازادى.

وسى سىيلىقتىڭ سوڭعى تاعدىرى دا اڭىزداي بۇلاڭداپ، شىرعالاڭى مول سونارداي بولىپ، ۇستاتپاي كەتەدى. ءبىر جازۋشى ءانشى جۇزىگىن يەسىنىڭ وسيەتى بويىنشا وزىمەن بىرگە كومىپ ەدى دەپ جازدى. مۇنىڭ بارىنەن انشىگە دەگەن ۇزدىك ءىلتيپاتتى سەزىنەسىڭ. اركىم دە انشىدەن ىرىم الىپ قالعانداردىڭ قاتارىندا بولعىسى كەلەدى عوي، تەگى»، - دەپ ءتۇيىن جاسايدى ايتجان اعا.

كەي دەرەكتەردەگى تۇجىرىمدار «ەستاي حورلانعا جۇزىكتى جاس كەزىندە ەمەس، بەرتىن، ەگدە تارتقان شاعىندا بەرگەن» دەگەنگە دە سايادى. حورلاننىڭ ءوز ۇرپاقتارىنىڭ دا وسى پىكىردى ۇستاناتىنىن ەسكەرسەك، بۇل دا جاراسىمدى كورىنەدى.

حورلاننىڭ جۇزىگىن «ىزدەۋشىلەردىڭ» ءبىرى - ايگەرىم سماتۋللايەۆا اتتى جۋرناليستىڭ جازباسى تىم وعاش ءارى ورىنسىز، ويتكەنى اۆتور التى الاشتى «حور قىزىنداي تامساندىرعان» حورلان اپامىزدىڭ بەينەسىن تومەندەتىپ جىبەرگەن.

«ەستايدىڭ ناعاشى جۇرتى - قوزعان ەلى قورلان ۇزاتىلىپ بارعان اۋىلمەن كورشىلەس ەكەن. قورلانىن ساعىنعان ەستاي سۇيىكتىسى ۇزاتىلعاننان كەيىن التى جىل وتكەندە ناعاشىسىنا بارعان بولىپ، قورلاننىڭ ۇيىنە تۇسەدى. ەكى كۇندەي قوناق بولىپ، وتكەن- كەتكەننەن نەبىر شەر بولىپ قالعان سىرلاردى ايتىسىپ، كوڭىلىن باسادى. كۇيەۋى مومىن ادام ەكەن، ال قورلان بولسا، سول ءۇيدىڭ ءبيى، ەش نارسەدەن جاسقانبايدى. 1931-جىلى ەستاي قورلان اۋىلىنا تاعى بارىپ، سۇيگەنىمەن ءجۇز كورىسىپ قايتادى. بۇل قورلاندى اقىرعى رەت كورۋى بولادى دا، ودان كەيىن جولىعا المايدى. وسى ەكى كەزدەسۋدىڭ بىرىندە (كوبىنە العاشقىسىندا دەلىنەدى) قورلان ەستايىنا ماحابباتىنىڭ نىشانى رەتىندە ساقينانى سىيعا بەرگەن ەكەن».

وكىنىشتىسى، ايگەرىم بۇل دەرەكتى كىمنەن العانىن ناقتى كورسەتپەگەن جانە حورلاننىڭ انامىزدىڭ بەينەسىنە كۇيە جاعىپ، جەڭىلتەك ايەل رەتىندە كورسەتىپ، ۇلكەن قاتەلىك جاساعان. شىن مانىندە حورلان ءوزىنىڭ قوساعىمەن سىيلاستىقتا عۇمىر كەشكەن. ونىڭ جۇبايى نۇرماعامبەتتىڭ جانە بالالارىنىڭ ساياسي قۋعىنعا ۇشىراپ، كوپ قيىندىق كورگەنىن ەسكەرسەك، حورلاننىڭ ەستايمەن شۇيىركەلەسىپ سىر ايتىساتىنداي كوڭىلدە بولۋى مۇمكىن دە ەمەس. بۇل سوزدەرىمىزدىڭ دالەلى رەتىندە رامازان توقتاروۆتىڭ مىنا جازباسىن كەلتىرەلىك:

«ەستاي حورلاننىڭ قولىنان دا ۇستاماعان. كوزبەن ۇعىسىپ، جۇرەكپەن عانا تابىسقان. حورلاننىڭ تولىق اتى - حورلىعايىن. اعا-جەڭگەلەرى ەركەلەتىپ قورىش اتاندىرىپ جىبەرگەن. ەستاي ونىمەن قالجىڭ-ناز توڭىرەگىندە اۋىزشا عانا تىلگە كەلگەن. «سەنىڭ قورىش اتىڭ كەلىسىمسىز عوي. قورلاۋ بولىپ ەستىلەدى. ونان دا «حورلان» بولسىن دەگەن. قازاقتا بۇرىن-سوڭدى ونداي ەسىم كەزدەسپەگەن. حورلان ونى ەستىگەندە جاي عانا جىميىپ قويا سالعان».

وسىدان بىرەر جىل بۇرىن ەلىمىزدەن 200 ادامعا جۋىق دەلەگاتسيا بارىپ، رەسەيدىڭ التاي ولكەسىندەگى ءبورلى اۋدانى قاراناي اۋىلىنداعى حورلاننىڭ ماڭگىلىك مەكەنىنە ءتاۋ ەتىپ، بەلگىتاس ورناتىپ قايتتى. وندا «مۇندا قازاقتىڭ حاس سۇلۋى قورلىعايىن ايىپكەلىنى جاتىر» دەگەن جازۋ بار. سول ساپارعا بارعاندار حورلان ءومىرى جايلى دەرەكتەرگە قانىعىپ قايتتى.

حورلان كەلىن بوپ تۇسكەن قۇلىندى دالاسىنىڭ ءبىر پۇشپاعىن جايلاعان ءايىپتىڭ (حورلاننىڭ قايىن اتاسى) اكەسى قۋات تا داۋلەتتى كىسى ەكەن. سول بايلىعىنىڭ ارقاسىندا ورىستار اۋىستىرامىز دەپ كەلگەندە قىرۋار مالىن شاشىپ، اۋىلىنىڭ اتىن ساقتاپ قالادى. سول اۋىل كۇنى بۇگىنگە دەيىن «سەلو كۋاتوۆكا» دەپ اتالاتىن كورىنەدى. ۇرپاقتارىنىڭ ايتۋىنشا، حورلاننىڭ كۇيەۋى نۇرماعامبەت اتا ەستايدىڭ ءوز ايەلىنە ىڭكارلىگى تۋرالى ءسوزدى ونشا ۇناتپاعان. سول سەبەپتى ولاردان تاراعان بالالار دا بۇل اڭگىمەنى اسپەتتەۋگە قۇشتار ەمەس.

حورلان اپامىز عابدۋلجاپپار، عابدۋلماجيت، زەينەلعابيدەن، نازىمبەك، ناسىپوللا اتتى بەس ۇل تابادى. ەڭ كەنجەسى جاستاي شەتىنەيدى. نۇرماعامبەت بولسا باي تۇقىمى رەتىندە قۋدالانىپ، قيىر شىعىسقا، اندا-مۇندا باس ساۋعالاپ قاشۋدان كوز اشپاعان. اقىرى بالاسى زەينەلعابيدەننىڭ ەرلىگىنەن كەيىن اقتالادى. ال حورلان انا وتىز جەتىدە ەلۋ توعىز جاسىندا دۇنيەدەن قايتىپتى.

ايتا كەتەرلىك جايت، ەگەر مۇحتار شاحانوۆ حورلان مەن ەستاي ماحابباتىنا «عاشىقتىق عالاماتىمەن» ماڭگى توزباس ەسكەرتكىش تۇرعىزباعاندا، ءبىز وسى جۇزىكتى وسىنشاما ىزدەر مە ەدىك؟ ءيا، مۇحتار اعامىزدىڭ جىرىمەن عاشىق جۇرەكتەرگە كومىلگەن حورلاننىڭ ءارقايسىمىز ساف قالپىندا ساقتاپ جۇرە بەرەلىك...

اۆتور: جانارگۇل قادىروۆا، پاۆلودار وبلىسى

massaget.kz