+7 (701) 759 90 19
-9 °С : نۇر-سۇلتان
-2 °С : الماتى
USD 419.54 EUR 509.2
RUB 5.72 CNY 64.81
جاڭالىقتار

ونەردە تولەگەن مەن قىز جىبەك بولعان قۇمان مەن مەرۋەرت ومىردە دە سولاي بولعان

23 قاراشا 18:53
:ءبولىسۋ
ونەردە تولەگەن مەن قىز جىبەك بولعان قۇمان مەن مەرۋەرت ومىردە دە سولاي بولعان

نۇر-سۇلتان. قازاقپارات - ول كينو الەمىنە تالانتىن اق بوز تۇلپار ەتىپ شاۋىپ كىردى.

«قىز جىبەك» فيلمىن تۇسىرۋگە دايىندالىپ جاتقان رەجيسسەر سۇلتان قوجىقوۆ ونەر ينستيتۋتىنىڭ 3-كۋرسىنا وتكەن جاس جىگىتكە تولەگەننىڭ ءرولىن سەنىپ تاپسىرادى.

سول كەزدەگى قازاقتىڭ ماڭدايالدى ارتىستەرى كينودا تولەگەننىڭ بەينەسىن جاساۋعا قۇلشىنعانى انىق. ءبىراق رەجيسسەر قۇماندى تاڭدادى. قىزۋ پىكىرتالاستا ول فيلمنىڭ سەناريىن جازعان عابيت مۇسىرەپوۆكە دە ءوز كوزقاراسىن دالەلدەپ وتىردى.

رەجيسسەر مەن عابەڭ اراسىندا جىبەكتى وينايتىن اكتريسا جونىندە دە قىزۋ پىكىرتالاس تۋادى. عابەڭ جىبەكتى 30 جاستاعى كەلبەتتى دە تاجىريبەلى اكتريسا جاساۋ كەرەك دەسە، سۇلتەكەڭ: «جىبەك پەن تولەگەننىڭ بەينەسىن ورىمدەي جاستار جاساۋى قاجەت»، - دەپ ءوز ۇستانىمىندا تۇرىپ الادى. رەجيسسەر «ولاردىڭ كوركى مەن بويلارىنداعى سۇيىسپەنشىلىك جالىنداپ تۇرۋى كەرەك» دەگەن كوزقاراسىنان تايقىمايدى.

سوندىقتان 1968 - جىلى رەسپۋبليكالىق «لەنينشىل جاس» جانە «لەنينسكايا سمەنا» گازەتتەرىنە «قازاق فيلم» كينوستۋدياسىنىڭ جىبەكتى سومدايتىن اكتريسا ىزدەستىرەتىنى حابارلانادى. ۇزاق تاڭداۋدان سوڭ، بۇل ءرول 10- سىنىپتى جاڭادان بىتىرگەن مەرۋەرت وتەكەشوۆاعا بۇيىرادى.

فيلمدى تاماشالاعان كورەرمەن ونداعى جىبەكتىڭ جىرداعى جىبەكپەن ۇندەسىپ جاتقانىن اڭعارادى. جىردا:

قىز جىبەكتىڭ اقتىعى

ناۋرىزدىڭ اقشا قارىنداي،

اق بەتىنىڭ قىزىلى

اق تاۋىقتىڭ قانىنداي،

ەكى بەتتىڭ اجارى

جازعى تۇسكەن ساعىمداي،

بىلەگىنىڭ شىرايى

ايبالتانىڭ سابىنداي - دەگەن جولدار رەجيسسەردىڭ مەرۋەرت وتەكەشوۆانى دا ءدال تاڭداعانىن كورسەتەدى. مەرۋەرتتىڭ جان دۇنيەسى مەن كوركى، جىرمەن سۋسىنداپ وسكەن كورەرمەنگە جارق ەتكەن سۇلۋلىقتىڭ سيمۆولى بولىپ كورىندى.

سونىمەن بىرگە قاي بەينەگە قاراساڭ دا حاس شەبەردى كورەسىڭ! سىرلىباي، بەكەجان، شەگە، قارشىعا، بازارباي، قامقا، ايكوز، كەربەز بەينەلەرىندەگى اكتەرلەر مەن اكتريسالار فيلمنىڭ مازمۇنىن بايىتىپ، وبرازداردى ءساتتى اشقان. كىرپياز عابەڭ بايقاۋ كەزىندەگى اسانالى ءاشىموۆتىڭ ويىنىن كورىپ: «مىناۋ داپ- دايىن بەكەجان عوي!»، - دەپتى ريزا بولىپ. سوندىقتان بولار كەيبىر سىنشىلار «تولەگەن بەكەجاننىڭ كولەڭكەسىندە قالىپ قويادى» دەگەن پىكىردى دە ايتتى. سوندىقتان قۇمانعا ەپيزودتان ەپيزودقا تولەگەننىڭ باتىرلىعىن، ادامگەرشىلىگىن ياعني تۇلعالىق قاسيەتتەرىن اشۋ ءۇشىن ىزدەنۋ قاجەت ەدى. اعالارى اسانالى ءاشىموۆ، ءانۋار مولدابەكوۆ، ىدىرىس نوعايبايەۆ قۇماندى باۋىرلارىنا تارتىپ، كامەرا الدىندا ءابىرجىپ قالماۋى ءۇشىن كەڭەس بەرىپ، قولداپ وتىردى.

فيلمدە بەكەجاننىڭ جاۋدى جەڭىپ ورالعان ساتىنە تولەگەن مەن شەگەنىڭ ءدوپ كەلەتىنى بار. ەكەۋى سىرلىباي مەن قالىڭ كوپشىلىككە سالەم بەرەدى. سوندا سىرلىباي قارشىعادان «جاعالبايلىنىڭ اسكەرى قايدا؟» - دەپ سۇرايدى. قارشىعا جاعالبايلىنىڭ كەلمەگەنىن ايتادى. سول كەزدە بەكەجان قىزبالانىپ: «جاعالبايلىعا مەنى اتتاندىرىڭدار. ەركەكتەرىن الدىما سالىپ، ايداپ اكەلەمىن!» - دەيدى. سىرلىباي ونى باسىپ، كەلگەندەرگە «قاي رۋدان بولاسىڭدار؟» - دەپ سۇرايدى. «بەسىكتى دالا توسىندە سىزدەرمەن تەڭ بولىسكەن رۋدانبىز»، - دەپ جاۋاپ قاتادى شەگە.

ول وزدەرىنىڭ جاعالبايلى ەلىنەن ەكەنىن، الدارىنداعى جىگىتتىڭ بازاربايدىڭ ۇلى تولەگەن ەكەنىن ايتادى. وسى كەزدە كورەرمەن تولەگەننىڭ دە تۇلعالىق قاسيەتىنىڭ اشىلا باستاعانىن بايقايدى. فيلمدە قارسى جاقتىڭ ويراندالعانى، جەڭىمپازداردان دا شىعىن بولعانى ايتىلادى. سول كەزدە تولەگەن سىرلىبايعا: «الديار! ءبارى قارا جامىلسا، بۇل قانداي جەڭىس؟ كۇندە قانتوگىس. سوندا بىزگە جەتپەيتىنى نە؟! جاعالبايلى كەلمەسە، ونىڭ ءوز سەبەبى بار شىعار؟ ماعان حابار جەتكەندە كەلەتىن ەدىم. كەلىپ، «رۋ ارازدىق جانجالدى توقتاتىڭدار!» دەپ ايتار ەدىم. ءبىز ءبىر- بىرىمىزبەن قىرقىسقانىمىزبەن سىرتقى جاۋدىڭ وڭاي ولجاسىنا اينالامىز»، - دەيدى. تولەگەن قازاقتاردىڭ ءبىر-بىرىمەن ارازداسپاي، سىرتقى جاۋعا بىرلەسىپ قارسى تۇرۋ كەرەكتىگىن ۇندەيدى. تولەگەننىڭ ايتقان اشى شىندىعىنا سىرلىباي توقتاپ، بۇعاۋداعى اقساقالدار بوساتىلىپ، ولارعا قوشەمەت كورسەتىلەدى.

تولەگەندى سومداعاندا قۇماننىڭ الدىندا تۇرعان باستى مىندەتتەردىڭ ءبىرى - ەكراندا تولەگەننىڭ ءبىتىم-بولمىسىن شىنايى كورسەتۋ بولدى. كورسەتىپ قانا قويماي، بەكەجان سەكىلدى حاس باتىرمەن باسەكەدە اسقاقتىعىن اشۋ قاجەت ەدى. ءاسانالى ءاشىموۆ سەكىلدى دارابوز اكتەردىڭ سومداۋىنداعى بەكەجان حالىققا سۇم ادام ەمەس، ول دا ءوز ەلىن، جەرىن قورعاۋشى رەتىندە تانىلدى. راس، ول قىزبا. كەيدە ۇر دا جىق مىنەزى بار. دەگەنمەن جىبەك ءۇشىن تالاستا بەكەجان ءوزىنىڭ قارا نيەتتى ەكەنىن كورسەتەدى.


ال، تولەگەننىڭ بەكەجاننان بيىك تۇرعانىن مىنا ءبىر ەپيزودتان بايقاۋعا بولادى. ەكەۋىنىڭ جەكپە- جەككە شىعار كەزىندە، تولەگەن ساۋىتىن شەشىپ تاستايدى. تولەگەننىڭ مۇنىسىنا ءبىر ءسات ءمۇدىرىپ قاراپ قالعان بەكەجان دا ەرىكسىز ساۋىتىن شەشەدى. وسى ءبىر قاس- قاعىم ءساتتى كامەرا جاقسى ۇستاپ، كەيىپكەرلەر پسيحولوگياسىن ءدال بەرە بىلگەن. ەكى باتىردىڭ جەكپە- جەگى كورەرمەندى بەي- جاي قالدىرمايدى. ال ەكەۋىن توقتاتۋ ءۇشىن ورتالارىنا جىبەك كەلىپ تۇرا قالعاندا، تولەگەنىڭ ءبىرىنشى بولىپ سىرىققا جەبەسىن قاداۋى، جىبەكتىڭ وتاۋىندا ورتاعا تاستالعان بەلبەۋدەن اتتاماۋى ونىڭ ارلى، ءوز سەزىمىن ايالايتىن ادام ەكەنىن دالەلدەيدى. ەلىنە بارىپ، اكەسى بازاربايدىڭ ريزاشىلىعىن الا الماي كەلە جاتقاندا بەكەجانعا كەزدەسىپ، ودان ءارى قالماقتارمەن سوعىسۋى تولەگەننىڭ باتىرلىق بولمىسىن اشا تۇسەدى.

1970 -جىلى فيلمدى ءتۇسىرۋ اياقتالىپ، كوركەمدىك كەڭەستە ونى كورگەن عابەڭ: «جارايسىڭ، سۇلتان! سەنىڭ ايتقانىڭ دا، جاساعانىڭ دا كەرەمەت دۇنيە بولىپ شىققان»، - دەپ العىسىن ءبىلدىرىپ، قۇشاقتايدى. بۇل رەتتە قانشاما ايتىس- تارتىس بولسا دا، جاقسى مەن جايساڭداردىڭ ءبىر- بىرىنە وكپە ارتپاعانى، تەك ورتاق مۇددە ءۇشىن كۇرەسكەنى انىق.

«قىز جىبەك» فيلمىن ەكرانعا شىعارۋدا سۇلتان قوجىقوۆ، اسحات اشراپوۆ، عابيت مۇسىرەپوۆ، نۇرعيسا تىلەنديەۆ، ولجاس جانە اسقار سۇلەيمەنوۆتەر، گۇلفايرۋس يسمايلوۆا، كامال سمايلوۆ، ءىلياس وماروۆ، تاعى باسقالاردىڭ ەڭبەگى ەرەكشە.

سوندىقتان «قىز جىبەك» قازاق كينوسىنىڭ ءىنجۋ-مارجانىنا اينالدى. «ەكراننان عاجايىپ ءبىر ەپيكالىق ءۇن، لەپ ەسىپ تۇردى. باتىرلىق پەن ەرلىكتىڭ، نامىس پەن جىگەردىڭ اسقاق الەمى سالتانات قۇردى»، - دەپ جازدى كورنەكتى تەاتر سىنشىسى اشىربەك سىعاي فيلم تۋرالى.

ال «قىز جىبەك» فيلمىن كورگەن ورىستىڭ ايگىلى كينورەجيسسەرى ۆ. شۋكشين سۇلتان قوجىقوۆتىڭ قولىن قىسىپ تۇرىپ: «سۇلتان، سەن سونداي كوركەم تۋىندى جاسادىڭ. سەنىڭ ۇلتىڭ وسىنداي ادەمى ەكەن عوي»، - دەپ ىقىلاسىن تانىتقان ەكەن.

«قىز جىبەك» ەلىمىزدىڭ كينوتەاترلارىندا ۇلكەن انشلاگپەن ءجۇردى. ارادا از ۋاقىت وتكەندە قۇمان مەن مەرۋەرت وتباسىن قۇرىپ، شاڭىراق كوتەرەدى. فيلمدەگى ماحابباتتىڭ شىنايى ومىردە سالتانات قۇرعانىنا جۇرەگى جارىلا قۋانعان كورەرمەن، يگى تىلەگىن جولداپ جاتتى.

تەاتردا ەڭبەك ەتە ءجۇرىپ، قۇمان تاستانبەكوۆ 30 عا جۋىق فيلمگە ءتۇستى. سولاردىڭ ىشىندە تاعى ءبىر ەرەكشە اتالاتىنى «ماحاببات جاڭعىرىعى» («ەحو ليۋبۆي» ) كينوتۋىندىسى. ونى 1974 - جىلى رەجيسسەر بولوت شامشيەۆ زاڭعار جازۋشى شىڭعىس ايتماتوۆتىڭ «بايدامتال وزەنىندە» اتتى شىعارماسىنىڭ نەگىزىندە تەلەفيلم ەتىپ ءتۇسىردى.

«مەنىڭ پارتنەرىم قىرعىزستاننىڭ وتە تالانتتى اكتريسالارىنىڭ ءبىرى - ءتاتتىبۇبى تۇرسىنبايەۆا بولدى. مەن جاس عالىم، اسپيرانت نۇربەكتى، ءتاتتىبۇبى مەتەوستانسيا قىزمەتكەرى ءاسيانى سومدادى. نۇربەك «تاجىريبە جاسايمىن» دەپ القاپتاعى كومبايندى اۋدارىپ، استىقتى ورتەپ الادى. ونى وشىرۋگە قانشاما جانتالاسسا دا تۇك شىعارا المايدى. اقىرى ول جەردەن قاشىپ كەتەدى. ابدەن قالجىراپ، ەسىنەن تانىپ قالعان ونى مەتەوستانسيا ادامدارى تاۋىپ الادى»، - دەدى قۇمان اعامىز بىزبەن اڭگىمەسىندە.

مەتەوستانسيادا ادام كوپ ەمەس. وسى ادامدار ءبىر- بىرىمەن باۋىرلارداي ارالاس- قۇرالاس بولىپ كەتكەن. جارالى نۇربەكتى ءاسيا ءوز بولمەسىنە كىرگىزىپ، كۇتەدى. ول اينالاداعىلاردىڭ نە ايتىپ جاتقانىنا دا قۇلاق اسپايدى. كورەرمەن ءاسيانىڭ جىگىتكە بەي-جاي قارامايتىنىن اڭعارا باستايدى. ەسىن جيىپ، ءوز- وزىنە كەلگەن نۇربەك: «ءاسيانىڭ، مۇنداعى ادامداردىڭ قۇراق ۇشىپ، ەمدەپ- كۇتكەنىنە لايىقتى ەمەسپىن»، - دەپ ويلايدى.

اقىرى جىگىت ءوزىنىڭ كىم ەكەنىن، وسىنداي جاعدايعا قالاي تاپ بولعانىن جازىپ، حات قالدىرىپ كەتەدى. فيلمنىڭ سوڭىندا ءاسيا نۇربەكسىز تىرشىلىك ەتە المايتىنىن تۇسىنەدى. سوعان كوزى جەتكەن ول جىگىتتىڭ سوڭىنان كەتەدى.

«قۇمان تاستانبەكوۆ زيالى اكتەر. سول قاسيەتى فيلمنىڭ ءون-بويىندا سەزىلىپ تۇردى. ول وزىنە تاپسىرىلعان ءرولدى وتە جاقسى ورىنداپ شىقتى»، - دەدى بىزبەن اڭگىمەسىندە فيلم رەجيسسەرى بولوت شامشيەۆ. ال، قىرعىزدىڭ تۇڭعىش كاسىبي كينوتانۋشىسى كاارمان اشيموۆ: «ماحاببات جاڭعىرىعى» فيلمىندەگى كەيىپكەرلەر كورەرمەنگە جاقىن. ولاردىڭ بەينەسى ايقىن ءارى شىنشىل»، - دەپ جازدى «قىرعىز كينوسى» اتتى زەرتتەۋ ەڭبەگىندە.

ءتاتتىبۇبى تۇرسىنبايەۆا قىرعىز كينوسىنداعى ەرەكشە قۇبىلىس ەدى. ول ت. وكەيەۆتىڭ «وتقا تابىن»، « قىزىل الما»، م. ۋبۋكەيەۆتىڭ «اق- مەەر» فيلمدەرىندە جارقىراپ كورىندى. وكىنىشكە قاراي، تالانتتى اكتريسا 1981 - جىلى ومىردەن ەرتە وزدى.

«ماحاببات جاڭعىرىعى» فيلمى بولوت شامشيەۆتىڭ «اق كەمە» كينوتۋىندىسىن تۇسىرۋگە دايىندىق جۇمىسى بولدى.


1972 - جىلى «قازاق فيلم» كينوستۋدياسىندا رەجيسسەر ابدوللا قارساقبايەۆ «ءبىزدىڭ عاني» فيلمىن ءتۇسىردى. مۇندا قۇمان تاستانبەكوۆ XX عاسىردىڭ باسىنداعى قازاقستان جاستارىنىڭ جالىندى جەتەكشىسى عاني مۇراتبايەۆتىڭ بەينەسىن سومدادى. ونەر تاقىرىبىنا قالام تارتاتىن س. لوسكۋتوۆا «رومانتيكانىڭ قاتال شىندىعى» ماقالاسىندا: «ءبىزدىڭ عاني» فيلمىندە اكتەر قۇمان تاستانبەكوۆ رەجيسسەرمەن شىعارماشىلىق تۇرعىدا وداقتاسا وتىرىپ، عاني مۇراتبايەۆتىڭ تۇلعالىق بەينەسىن جاساعان. عانيدىڭ قىسقا، ءبىراق ءىرى وقيعالارمەن كەستەلەنگەن ءومىرى، ن. ك. كرۋپسكايامەن، دوستارىمەن كەزدەسۋى، ماسكەۋدەگى قىزمەتى، جاۋلارىمەن كۇرەسى شىنايى بەرىلگەن. قازاق حالقىنىڭ جالىندى ۇلىنىڭ تۇلعاسىن قارساقبايەۆ كينو تىلىمەن جارقىراتىپ اشىپ كورسەتكەن»، - دەپ باعا بەردى.

1980 - جىلى «قىرعىز فيلم» كينوستۋدياسىندا رەجيسسەر مەليس ۋبۋكەيەۆ «پروۆينتسيالنىي رومان» فيلمىن تۇسىرەدى. مۇندا قۇمان تاستانبەكوۆ ەركيننىڭ، مەرۋەرت وتەكەشيەۆا توكوننىڭ بەينەلەرىن جاسايدى. كينوتۋىندىدا وتباسى، ادامدار اراسىنداعى قارىم-قاتىناس، دوستىق، ماحاببات، ساتقىندىق ماسەلەلەرى قوزعالادى. فيلمگە تالعات جانە ۆەنەرا نيگماتۋليندەر، سوۆەتبەك دجۋمادىلوۆ، ناتاليا ورىنباساروۆا ت. ب. تارتىلدى. ال «ورنەك» فيلمىندە قۇمان مەن مەرۋەرت ەرلى-زايىپتى ادامدار بەينەسىن سومدادى. فيلمگە ولاردىڭ بالالارى دا ءتۇستى.

قۇمان تاستانبەكوۆ مۇحتار اۋەزوۆ اتىنداعى اكادەميالىق دراما تەاترىنىڭ شاڭىراعىن كوتەرگەن العاشقى تولقىن وكىلدەرىنىڭ شاپاعاتىن كوردى. سەركە قوجامقۇلوۆپەن ساحناعا بىرگە شىقسا، ەلۋباي ومىرزاقوۆپەن كينوعا بىرگە ءتۇستى. قۇرمانبەك جانداربەكوۆتىڭ عيبراتتى اڭگىمەلەرىن تىڭدادى.

وسى تەاتردا ورالحان بوكەيەۆتىڭ «قۇلىنىم مەنىڭ» دراماسىنداعى جان بەينەسىن سومداعان اكتەر كورەرمەننىڭ ىستىق ءىلتيپاتىنا بولەنەدى. وسى ءرولى ءۇشىن قۇمان تاستانبەكوۆ قازاقستان لەنين كومسومولى سىيلىعىن الادى.

سارابدال سىنشى اشىربەك سىعاي «ساحنا ساڭلاقتارى» اتتى كىتابىندا: «...بارىن قاناعات تۇتقان بيازى ونەرپاز جوعىن ىزدەپ ورەكپۋدە وركوكىرەكتىك تانىتىپ الماۋدى وزىنە ماقسات ەتكەندەي. جالپى جەتپىسىنشى جىلدارى قۇمان قاتارلى تەاترعا كەلگەن جاس ارتيستەردىڭ رەجيسسۋرا جونىندەگى كورگەن قامقورلىقتارى پالەندەي سۇبەلى ەمەس. ءازىربايجان مامبەتوۆ كوبىنشە اعا، ورتا بۋىن ارتيستەرىمەن «الىسىپ» ءجۇرىپ، بۇلاردىڭ بۋىنىنا اناۋ ايتقانداي كوڭىل بولە المادى. ولار كەزدەيسوق اۋىسۋ، الماسۋ پروتسەستەرىن باستان كەشە ءجۇرىپ، ىلگەرىلەدى، ىزدەندى»، - دەپ جازدى.

اكتەر ومىرلىك سەرىگى مەرۋەرت وتەكەشوۆامەن 45 جىلدان استام ۋاقىت تەاتردا بىرگە ەڭبەك ەتىپ كەلەدى. ول جۇزدەن استام سپەكتاكلدە ساحناعا شىقتى. «قۇمان ەكەۋمىز كوپتەگەن رولدەر وينادىق. مۇحتار اۋەزوۆتىڭ «قاراكوزىندە» - ول ارشا، مەن قاراكوز، شىڭعىس ايتماتوۆتىڭ «انا - جەر اناسىندا» ول قاسىم، مەن ءاليمان بولىپ شىقتىق ساحناعا. بۇدان بولەك «جوعالعان دوس» دەگەن جاقسى سپەكتاكل بولعان. ءبىز ءبىر- بىرىمىزگە كومەكتەسكەنىمىزگە، ءبىر ساحنادا ءرول ويناعانىمىزعا ريزامىز.

نەگە دەسەڭىز، مەن ونىڭ ويناعان بارلىق رولدەرىن جاقسى بىلەم. كەي-كەيدە ول «قالاي وينادىم؟» دەپ سۇرايدى. مەن وعان جاقسى ويناعانىن ايتىپ، قولداپ وتىرامىن. سەبەبى مەن ونىڭ بارلىق ءرولىن بىرنەشە قايتالاپ كورگەن شىعارمىن. جاتتاپ الدىم دەسەم دە بولادى. بارلىق بەينەسى كوز الدىمدا تۇرادى. ونىڭ سىنشىسى، قاداعالاۋشىسى مەنمىن... قۇمان ەكەۋمىزدىڭ ساحناداعى، ونەردەگى ومىرىمىزگە ارناپ كىتاپ جازعىم كەلەدى»، - دەگەن بولاتىن مەرۋەرت وتەكەشوۆا ءبىر سۇحباتىندا.

كوپتەگەن مەملەكەتتەردە كينو، كىتاپ، اۋىز ادەبيەتىنىڭ كەيىپكەرلەرىنە ارناپ ەسكەرتكىش تۇرعىزۋ ءداستۇرى بار. سونداي ءبىر ەسكەرتكىش جىبەك پەن تولەگەنگە ارنالىپ تاراز قالاسىندا ورناتىلعان. جۇرتشىلىق قۇماندى - تولەگەن، مەرۋەرتتى - جىبەك دەپ قابىلدايدى. «قىز جىبەك» فيلمى جاستاردىڭ ماحاببات سەزىمىن ايالاۋعا كومەكتەسكەنى، ومىرگە، ونەرگە دەگەن قۇشتارلىقتارىن ارتتىرعانى انىق. بىزبەن كورشىلەس مەملەكەتتەردە اعا اكتەرلەر كينوعا ءجيى تارتىلادى. ولارعا ارنايى سەناريلەر دە جازىلادى. بىزدە دە ونەر شەبەرلەرىنىڭ تاجىريبەسى قاسيەتتى ونەردى دامىتۋعا پايدالانىلسا دەيسىڭ. اعا بۋىن وكىلدەرىنىڭ شەبەرلىگى، كاسىبيلىگى، ونەرگە دەگەن ادالدىعى جاستارعا قۇندىلىق بولارى داۋسىز.

اكتەرمەن اڭگىمەلەسكەندە ونىڭ سۇلتان قوجىقوۆ، اسانالى ءاشىموۆ، ءانۋار مولدابەكوۆ، بولوت شامشيەۆ، ءتاتتىبۇبى تۇرسىنبايەۆا، تالعات نيگماتۋللين، جالپى قاسيەتتى ونەرگە قىزمەت ەتۋشىلەر تۋرالى پىكىرىن ەرەكشە سۇيىنىشپەن جەتكىزەتىنىن اڭعاراسىڭ. ولار ونەر الەمىندە جۇلدىزدارىن جاققان تۇلعالار. سول شوعىردىڭ ىشىندە قۇمان تاستانبەكوۆتىڭ دە جۇلدىزى جارقىراپ تۇر. ونىڭ ەكرانداعى بەينەلەرى مۇحيت پەن تاۋ اسىپ، بۇكىل الەمگە قازاق حالقىنىڭ، قازاق جىگىتىنىڭ تۇلعاسىن، ىزگى قاسيەتىن، سەزىمى مەن باتىرلىعىن پاش ەتتى.

نۇرلان ەسەنوۆ، تاريح عىلىمدارىنىڭ كانديداتى

«تۇركىستان» (2015 - جىل)



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات