ءبىز تالما اۋرۋىن ەمدەۋدى قولعا الىپ، ۇلكەن جۇمىس جۇرگىزۋدەمىز - سەرىك اقشولاقوۆ

نۇر-سۇلتان. قازاقپارات - ەلباسى حالىققا جولداۋىندا قازاقستاندىقتاردىڭ دەنساۋلىعىن جاقسارتۋ ءۇشىن جاعداي جاساۋ، اۋرۋدىڭ الدىن الۋ جۇمىستارىن ساۋاتتى ۇيىمداستىرۋ قاجەتتىگىن اتاپ وتكەن بولاتىن. ەندەشە، دەنى ساۋ ۇرپاق - بولاشاعىمىزدىڭ جارقىن بولۋىنىڭ كەپىلى.

استاناداعى ۇلتتىق نەيروحيرۋرگيا ورتالىعىندا جىلىنا 2.5 مىڭنان اسا ءارتۇرلى وپەراتسيا جاسالادى. سونىڭ 350 دەيى ميدىڭ ىسىكتەرى ەكەن.

وتاندىق نەيروحيرۋرگيا سالاسىنداعى وسى جانە وزگەدە ماسەلەلەر توڭىرەگىندە، مەديتسينا عىلىمىنىڭ دوكتورى، پروفەسسور، قازاقستاننىڭ ەڭبەك سىڭىرگەن قىزمەتكەرى، استاناداعى ۇلتتىق نەيروحيرۋرگيا ورتالىعىنىڭ باسقارما ءتوراعاسى سەرىك قۋاندىق ۇلى اقشولاقوۆپەن سۇحباتتاسقان ەدىك.

- سەرىك قۋاندىق ۇلى، نەيروحيرۋرگيا - مەديتسيناداعى ەڭ كۇردەلى ءارى كەش دامىعان سالانىڭ ءبىرى دەپ جاتامىز. وسى سالادا قازىرگى ۋاقىتتا سىزدەردىڭ ورتالىقتارىڭىزدان ءجيى شيپا تاباتىن اۋرۋدىڭ ءتۇرى قايسى؟

- نەيروحيرۋرگيا ەڭ كۇردەلى ءارى كەش دامىعان سالانىڭ ءبىرى ەكەنى راس. نەيروحيرۋرگيا - بىرىنشىدەن، نيەۆرولوگيا عىلىمى، حيرۋرگيا عىلىمى، راديولوگيا عىلىمى - ۇشەۋىنىڭ توعىسقان جەرىنەن شىققان. بۇنىڭ نەگىزگى ماقساتى نەرۆ جۇيەسى اۋرۋلارىنا حيرۋرگيالىق كومەك كورسەتۋ. اشىپ ايتساق، بۇل - باستىڭ، ميدىڭ، جۇلىننىڭ ىسىكتەرى؛ ومىرتقانىڭ جاراقاتتانۋى جانە مي قان تامىرلارىنىڭ اۋرۋلارى. سوسىن ىشتەن تۋا بىتكەن نەمەسە كەيىن پايدا بولعان بالالار ميىنىڭ زاقىمدانۋى.

فۋنكتسيونالدىق نەيروحيرۋرگيالىق نەرۆ جۇيەسىنىڭ اۋرۋلارى - ەپيلەپسيا، پاركينسون سياقتى اۋرۋلاردىڭ حيرۋرگيالىق ەمى تابىلعان سوڭ ولار نەيروحيرۋرگيانىڭ قاتارىنا كىردى. اتاپ ايتقاندا، نەيروحيرۋرگيالىق ورتالىقتا التى بولىمشە بار. سونىڭ بەس بولىمشەسى وسى حيرۋرگيالىق ادىستەرمەن ەمدەيدى. بۇلاردىڭ ىشىندەگى كوپ كەزدەسەتىنى ومىرتقانىڭ اراسىنداعى شەمىرشەكتىڭ ورىنىنان قوزعالىپ كەتۋى، وسىنداي اۋرۋمەن ادامدار ءجيى كەلەدى. بىزدەر جىلىنا شامامەن جىلىنا 2.5 مىڭنان اسا ءارتۇرلى وپەراتسيا جاسايمىز. سونىڭ 350 دەيى ميدىڭ ىسىكتەرى.

- 350 دەيى ميدىڭ ىسىكتەرى بولسا، سوڭعى ۋاقىتتا مي ىسىگى كوبەيىپ كەتكەن بە؟

- سوڭعى ۋاقىتتا اۋرۋدىڭ بۇل تۇرلەرى كوبەيىپ كەتتى دەگەن ءسوز ەمەس. ۇلتتىق نەيروحيرۋرگيالىق ورتالىق اشىلعاننان كەيىن دياگنوستيكالىق جاعداي جاقساردى. بۇكىل وبلىستاردا ماگنيتتىك توموگرافيا، كومپيۋتەرلىك توموگرافيا جانە باسقادا دياگنوستيكالىق اپپاراتتار بار. سولاردىڭ تەز كومەك كورسەتۋىنىڭ ارقاسىندا جىلدام انىقتاۋىمەن ساندارى كوپ بولىپ جاتقان كورىنەدى.

- جالپى مي ىسىگىنىڭ پايدا بولۋىنا نە سەبەپ بولادى؟

- وعان سەبەپتەر كوپ، ونىڭ سترەسس جانە ەكولوگيا تەورياسى دەگەن سياقتى بىرنەشە تەوريالار بار. ونىڭ ءتۇپنۇسقاسىن ايتۋ قيىن. ەگەر كەز كەلگەن اۋرۋدىڭ پايدا بولۋ سەبەبى تابىلسا، وندا ونىڭ سالدارىمەن كۇرەسۋ دە قيىنعا تۇسپەس ەدى. ءبىز وسى ۋاقىتتا سالدارىمەن كۇرەسىپ كەلەمىز.

- ەلىمىزدە پاركينسون اۋرۋىنا شالدىققان 17 مىڭعا جۋىق ناۋقاس بار ەكەن. پاركينسون نەيروحيرۋرگيانىڭ ىشىندەگى كىشكەنتاي عانا ءبىر سالاسى بولعانىمەن، قازاقستاندا نەيروحيرۋرگيانىڭ ىشىندە ول دا ەڭ ءبىر كەنجە قالىپ قويعان. پاركينسونمەن اۋىراتىن ناۋقاستارعا وتا جاساۋدى باستادىڭىزدار، قازىرگى ۋاقىتتاعى ناتيجەلەرى قانداي بولىپ جاتىر؟

- نەيروحيرۋرگيانىڭ ىشىندە فۋنكتسيونالدى نەيروحيرۋرگيا دەگەن بار. پاركينسوندى ەمدەيتىن سول. نەيروحيرۋرگيانىڭ ىشىندەگى كەش دامىعان ءبىر ءتۇرى دەپ ايتۋعا بولادى. ول قازىرگى زاماندا كوپ ەلدە جوق. ءبىزدىڭ العا قويعان ماقساتتارىمىزدىڭ ءبىرى - جاڭا تەحنولوگيالاردى تاجىريبەمىزگە ەنگىزۋ. وسى ماقساتىمىزدىڭ ارقاسىندا پاركينسوندى ەمدەۋدى تاجىريبەمىزگە ەنگىزدىك. ءبىراق، 15-16 مىڭ اۋرۋدىڭ تەك 5 نەمەسە 10 پايىزى عانا حيرۋرگيالىق جولمەن ەمدەۋ ادىسىنە جاتادى. قالعانى كوبىنە ءدارى ءىشۋ كەرەك. اتالمىش اۋرۋدى ەمدەي باستاعانىمىزعا ەكى جىلداي بولدى. قازىرگە دەيىن نەيروحيرۋرگيالىق ورتالىقتا 50 دەي وپەراتسيا جاسالدى. بۇل جاڭا ءتاسىل بولعانىمەن، ايتا كەتۋ كەرەك، باعاسى وتە قىمبات تۇرادى.

- پاركينسون اۋرۋىن حيرۋرگيالىق جولمەن ەمدەگەندە وپەراتسيا تەك ميعا عانا جاسالادى عوي.. .

- ءيا، بۇل تەك ميعا جاسالادى. باس سۇيەكتى اشىپ ميعا ەلەكترود قويامىز. ميدىڭ ءوزى پاركينسون بولماۋ ءۇشىن ونىڭ گورموندارىن شىعارۋ كەرەك. ول تۋرالى ايتا بەرسەك ۇزاق اڭگىمە.

- نەيروحيرۋرگيا سالاسى دۇنيە جۇزىندە قاي ەلدەردە جاقسى دامىعان؟

- وتكەن جىلعى استاناداعى كونگرەسكە 56 ەلدەن دەلەگات كەلدى. اتاپ ايتار بولساق، امەريكا، جاپونيا، فرانسيا، شۆەيتساريا، گەرمانيا، فينليانديا، وڭتۇستىك كورەيا، قىتاي، ءۇندىستان سىندى دۇنيەنىڭ ءتورت بۇرىشىنداعى ەلدەردەن كەلگەن ماماندار بولدى. دەمەك، بۇل نەيروحيرۋرگيا سالاسىنىڭ وزىندە ءارتۇرلى تارامدار بويىنشا العا وزعان ەلدەر بار دەگەن ءسوز.

شىنىن ايتقاندا، قازىر نەيروحيرۋرگيانىڭ دامۋى وعان قارجىنىڭ قالاي بولىنگەنىنە تىكەلەي بايلانىستى. ويتكەنى، مۇنداعى ەڭ باستى ماسەلە - قازىرگى زامانعا ساي جاڭا اپپاراتتار الىپ وتىرۋ، دياگنوستيكالىق ەمدەۋ اپپاراتتارىن يگەرۋ. سودان كەيىن سول اپپاراتتارمەن جۇمىس ىستەيتىن دارىگەرلەردىڭ ءبىلىمىن جەتىلدىرۋدە قارجى جاعىنان كومەك كورسەتىپ وتىرۋ قاجەت.

- سوڭعى ۋاقىتتاردا ۆاكسيناتسيا تۋرالى ادامدار اراسىندا ءتۇرلى پىكىرىلەر تاراپ ءجۇر. كەيبىر اتا- انالار بالالارىنىڭ سال اۋرۋىنا شالدىعۋىن وسى ۆاكسيناتسيامەن بايلانىستى دەپ جاتادى. ءسىزدىڭ پىكىرىڭىزشە، ۆاكسيناتسيا قانشالىقتى كەرەك؟

- ونداي اڭگىمەلەردى بىزدە اقپارات كوزدەرىنەن ەستىپ ءبىلىپ ءجۇرمىز. جالپى ۆاكسينا قانشا ادامعا كومەكتەستى. ستاتيستيكا بويىنشا پايدالى جاعى كوپ بولىپ وتىرعاندىقتان، ول، مەنىڭ ويىمشا، كەرەك.

- رەسپۋبليكامىز بويىشا نەيروحيرۋرگتارىمىزدىڭ ناقتى سانى قانشا؟ وسى سالانىڭ ماماندارى جەتكىلىكتى مە؟

- استاناداعى ۇلتتىق نەيروحيرۋرگيالىق ورتالىقتان وزگە ءاربىر وبلىستارىمىزداعى ەمحانالارىمىزدا بولىمشەلەر بار. بۇگىنگى تاڭدا قازاقستاندا 250 دەي نەيروحيرۋرۋگ قىزمەت ەتىپ جاتىر. ولار وبلىس ورتالىقتارىندا، قالالاردا، سوسىن الماتىدا ءبىر ءبىلىم بەرۋ، جەتىلدىرۋ كافەدراسى قىزمەت جاسايدى. مەديتسينالىق ينيستۋتتاردا كۋرس جانە كافەدرالارى بار.

- نەيروحيرۋرگيا ماماندارى قايدان وقىپ جەتىلەدى؟ شەتەلدەن وقي ما، الدە ەلىمىزدە دايىندالا ما؟

- بۇرىنعى كەڭەس ۇكىمەتى كەزىنەن كەلە جاتقان الماتىداعى دارىگەرلەر ءبىلىمىن جەتىلدىرۋ ينستيتۋتى دەگەن بولعان. سونداعى ارنايى كافەدرادان نەيروحيرۋرگ مامانداردىڭ ءبارىن دايىنداپ كەلدى. قازىر ۇلتتىق نەيروحيرۋرگيالىق ورتالىق اشىلعاننان كەيىن مامانداردى وسىندا دايىنداۋعا تىرىسۋدامىز. جاس تالاپكەر بولاشاقتا نەيروحيرۋرگ بولامىن دەسە مەديتسينالىق ينستيتۋتتى وقىپ بىتىرگەن سوڭ، ينتەرناتۋرادان ءوتۋ كەرەك، سودان كەيىن ءبىزدىڭ ورتالىقتان، ءيا باسقا بولىمشەلەردەن بارىپ رەزيدەنتۋراسىن ءتامامدايدى.

- الماتىداعى دارىگەرلەردىڭ ءبىلىمىن جەتىلدىرۋ ينستيتۋتتارىندا كافەدرا بولىپ، سونداي- اق، كلينيكالىق اۋرۋحانالاردىڭ ءبىر ءبولىمى دارەجەسىندە جۇرگەن نەيروحيرۋرگيا سالاسى وسىنداي جەكە ۇلتتىق دەڭگەيدەگى عىلىمي ورتالىق ەتىپ قۇرۋ كىمنىڭ يدەياسى؟ جالپى وسى نەيروحيرۋرگيانى ورتالىق ەتىپ قۇرماي- اق، وزىنشە دامىتۋعا بولماي ما؟

- بۇنداي ورتالىق اشۋ ءبىزدىڭ اۋەلدەن ويىمىزداعى ۇلكەن ارمانىمىز بولعان. وسىدان 15 جىل بۇرىن بەرگەن ءبىر سۇحباتىمدا «مەنىڭ ارمانىم نەيروحيرۋرگيالىق ورتالىق اشىلسا ەكەن» دەپپىن. كەيىن وسى ماقساتىمىزدى ىسكە اسىرۋ ءۇشىن دەنساۋلىق ساقتاۋ مينيسترلىگىنە، ۇكىمەتكە، ەلباسىنا دا حات جازدىق. سودان ءبىزدىڭ دەڭگەيىمىزدىڭ وسكەنىنە كوزى جەتكەننەن كەيىن، ەلباسىنىڭ ءوزى كوڭىل ءبولىپ، ۇلتتىق نەيروحيرۋرگيالىق ورتالىق قۇرىلادى دەگەندە، قۋانىشىمىزدا شەك بولمادى. مىنە سونىڭ ارقاسىندا دۇنيەجۇزىندەگى ەڭ وزىق 40 تان استام جاڭا تەحنولوگيانى ورتالىعىمىزدا قولدانىسقا ەنگىزدىك. سوسىن ەلىمىزدەن جاپپاي شەتەلدەن ەم الاتىن اۋرۋلار بار ەدى. بۇل - قان تامىرلارىنىڭ اۋرۋلارى، ەندوسكوپيالىق وپەراتسيالار، ميدىڭ ىسىكتەرى دەگەندەر. ولاردىڭ 100 پايىزى شەتەلگە كەتىپ جاتاتىن. سونىڭ ءبارىن ءبىز توقتاتتىق. نەيروحيرۋرگيادا وپەراتسيالاردىڭ قاي ءتۇرىن بولماسىن، وسىندا جاساپ جاتىرمىز.

- وتانداستارىمىز شەتەلگە بارىپ ەمدەلەتىن جاعدايدا كۆوتا الۋ ماسەلەسى ىلعيدا ۋاقىتى سوزىلىپ، كۇردەلى بولىپ جاتادى. سىزدەرگە ەمدەلۋگە كەلەتىن ناۋقاستارعا كۆوتانىڭ ءبولىنۋى قالاي؟

- كۆوتا ماسەلەسىنە كەلسەك، قازاقستاننىڭ ىشىندە دە كۆوتا بار. كۆوتا تەك شەتەلدەن ەمدەلۋشىلەرگە عانا قاراتىلماعان. بىزدەن ەل ىشىندەگى ەمدەلۋشىلەر ورتالىعىمىزعا كۆوتامەن كەلەدى. ءبىراق، نەيروحيرۋرگيادا باسقا سالالارعا قاراعاندا كۆوتا الۋ جەڭىلدەۋ. سەبەبى، ءبىز رەسپۋبليكا بويىنشا ءبىر ورتالىقپىز، ايماقتاعى بولىمشەلەردىڭ بارلىعى بىزبەن تىكەلەي بايلانىستا. بۇگىن وبلىستا دياگنوزىن قويىپ، ەرتەڭىندە ۇلتتىق نەيروحيرۋرگيالىق ورتالىققا كەلە الادى.

- نەيروحيرۋرگيا بويىنشا شەتەلدەن بىزگە كەلىپ ەمدەلەتىندەر بار دەپ ەستيمىز...

- وتكەن جىلى 80 گە جۋىق شەتەل ازاماتى كەلىپ ەمدەلىپ كەتتى. ولار نەگىزىنەن وزبەكستان، قىرعىزستان، تاجىكستان ازاماتتارى. اراسىندا ەۋروپالىق ەلدەردەن كەلگەندەر دە بار. ولار قازاقستاندا تۇرىپ، قىزمەت ەتىپ جۇرگەن، بىزدەگى مەديتسينا سالاسىنىڭ جەتىستىكتەرىمەن ەتەنە تانىس، ياعني، ءبىزدىڭ مەديتسيناعا دەگەن سەنىمى بار ازاماتتار. ال، گرۋزيا مەن تاجىكستان ەلدەرىنەن ارنايى كەلىپ ەمدەلۋدە.

2014 - جىلعى استاناداعى كونگرەسس كەزىندە بىرنەشە ەلدىڭ دارىگەرلەرىمەن ورتاق مەموراندۋمعا قول قويدىق. ولار ءبىر- بىرىنە ناۋقاستارىن جىبەرىپ، ەمدەتە الاتىن بولىپ كەلىستى. اراسىندا، ارينە، ءبىزدىڭ ورتالىق تا بار. ويتكەنى، وزگە ەلدەر وكىلدەرى ءبىزدىڭ ناۋقاستارعا قانداي كومەك كورسەتە الاتىنىمىزدى ءبىلدى.

الداعى ۋاقىتتا شەت ەلدەردەن كەلىپ، ءبىزدىڭ ورتالىقتا ەمدەلەتىن ازاماتتاردىڭ سانى ارتا ءتۇسۋى مۇمكىن. جالپى، ونى مەديتسينالىق تۋريزم دەپ اتايدى. ۇلكەن مەديتسينالىق تۋريزمگە ءالى ەرتەرەك دەپ ويلايمىن. سەبەبى، قازىرگى ۋاقىتتا العا قويعان ماقساتىمىز - وتانداستارىمىزدى شەتەلگە جىبەرمەي، وسىندا ەمدەۋ. سودان كەيىن بۇرىنعى ت م د ەلدەرىنىڭ كەيبىرىندەگى اپپاراتتار بىزگە قاراعاندا دەڭگەيى تومەندەۋ، سولارعا قول ۇشىن سوزۋ. سولاردىڭ ىشىندە شەتەلدە تۇراتىن قانداس باۋىرلارىمىز دا بار. بۇنىڭ ءبارىن الداعى ۋاقىت كورسەتەدى دەپ ويلايمىن.

- عىلىم تىلىندە ەپيلەپسيا اتالاتىن اۋرۋدى قازاقتار «تالما»، «ۇستامالى دەرت» دەپ ءتۇرلى نۇسقادا اتايدى. رەسمي دەرەكتەر بويىنشا، ەلىمىزدە 50 مىڭنان اسا ادام وسى دەرتكە شالدىققان بولسا، ونىڭ 60 پايىزىعا جۋىعى بالالار ەكەن. ال، كەز كەلگەن نيەۆرولوگ مامانمەن سويلەسسەك بۇل ساننىڭ ودان كوپ بولۋى مۇمكىن ەكەنىن العا تارتادى. سوڭعى جىلدارى ەپيلەپسياعا جاسالىپ جاتقان وتالار مەن ەمدەردىڭ ناتيجەسى قانداي؟

- ەپيلەپسيا، شىنىندا دا، كۇردەلى اۋرۋلاردىڭ ءبىرى. قازىرگى ۋاقىتتا اتالمىش اۋرۋدىڭ تۇرلەرى كوپ. ونىڭ حيرۋرگيالىق تاسىلدەرمەن جانە دارىمەن ەمدەيتىنى بار.

ناۋقاس باستاپقى بەلگىلەرى بىلىنە باستاعاندا- اق ەم قابىلدايتىن بولسا، تەز ناتيجە بەرەدى. كەي ادامداردا جاسىراتىن جاعدايلار كەزدەسىپ جاتادى.

ءبىز وسى ورتالىقتا بالالار ەپيلەپسياسىن حيرۋرگيالىق تاسىلمەن ەمدەۋدى دامىتۋعا تىرىستىق. ولاردى اكە- شەشەسى ەرتەرەك اكەلگەن جاعدايدا، دياگنوزىن جىلدام تاۋىپ، ەمىن دە ناتيجەلى جاساۋعا بولادى. كەز كەلگەن اۋرۋدى اسقىنباي ەمدەگەندىكتەن ناتيجەسى كورنەكتى بولادى ەمەس پە؟ وسى جەردەن 100 گە جۋىق ادامدى تەكسەردىك. سولاردىڭ ءبىرازىنا وپەراتسيا جاسادىق. بۇل كۇندە ءبىز ەپيلەپسيانى(تالمانى) ەمدەۋ ءىسىن دامىتۋدى دا قولعا الىپ ۇلكەن جۇمىس جۇرگىزۋدەمىز.

- ترانسپلانتولوگياعا بايلانىستى كوپتەگەن ناۋقاستار شەتەل اسۋعا ءماجبۇر بولىپ جاتادى.. .

- ترانسپلانتولوگيا كوبىنەسە بۇيرەك، جۇرەك، باۋىر، وكپە سياقتى ىشكى اعزالارعا بايلانىستى بولىپ جاتادى عوي. سوندىقتان ترانسپلانتولوگيانىڭ نەيروحيرۋرگياعا قاتىسى جوق، ول جاعىن ءوزىڭىز دە بىلەرسىز. وتاندىق ترانسپلانتولوگيا جونىنەن ايتار بولساق، مەديتسينادا شەكارا جوق، دۇنيەجۇزىنەن ءبولىنىپ كەتە المايمىز. الەمدە بولىپ جاتقان جەتىستىكتەردى پايدالانا ءبىلۋىمىز كەرەك.

ترانسپلانتولوگيا دەگەن ادام ءومىرىن ساقتاپ قالۋ ءۇشىن جاسالادى. بۇگىنگە دەيىن شەتەلگە ەمدەلۋگە جىبەرەتىن ناۋقاستاردىڭ دەنى وسى ترانسپلانتولوگيا ءۇشىن كەتەدى. بۇل ءومىرى قىل ۇستىندە تۇرعان ناۋقاس ءۇشىن اۋىر بولۋى مۇمكىن. جانە دە، وعان مەملەكەت قازىناسىنان كوپ قارجى كەتەدى. سوندىقتان، وسى سالانى كوتەرەمىز، ترانسپلانتولوگيانى ەلىمىزدە وركەندەتەمىز دەپ، تەر توگىپ جۇرگەن دارىگەرلەر كوپ.

الەمدە كۇندەلىكتى وزگەرىستەر بولىپ جاتىر. جاھاندىق مەديتسينادا دياگنوزدى انىقتاۋ مەن اۋرۋدى ەمدەۋدىڭ نەشە ءتۇرلى جاڭا تاسىلدەرى جارىققا شىعۋدا. ءبىراق ولاردىڭ بارىنە باس ۇرىپ، جاقسى ەكەن دەي بەرۋگە بولمايدى. جاڭا شىققانداردىڭ قانداي ەكەنىن ۋاقىت ءوزى ەكشەپ كورسەتەدى. ال ەندى نەيروحيرۋرگيادا راديوحيرۋرگيا دەگەن ءتاسىل بار. ونىمەن ميعا وتا جاساماي- اق، كىشكەنتاي ىسىكتى الىپ تاستاۋعا بولادى. راديوحيرۋرگيا قازىرگى ۋاقىتتا كەرەك بولعانىمەن، قازاقستانعا ءالى ەنگىزىلگەن جوق. سونىڭ اسپابىن الساق پا دەپ وتىرمىز. بۇل جوسپارىمىز، ارمانىمىز كەلەسى جىلى ورىندالادى دەپ ۇمىتتەنەمىن.

- ۇلتتىق نەيروحيرۋرگيا ورتالىعىنىڭ اقىلى بولىمىنەن كىمدەر ەمدەلەدى؟

- اقىلى ەمدەلەتىندەر، كوبىنەسە، دەنساۋلىعى ساقتاندىرىلعان ازاماتتار. ونىڭ اقشاسىن ءارتۇرلى ساقتاندىرۋ كومپانيالارى تولەيدى. كەي جاعدايدا جۇمىس جاعىنان تولەنۋى مۇمكىن. وسىندا جاتىپ ەمدەلگىسى كەلەتىن ادامدار بار. ءبىز ونداي تولەۋلەرگە قارسى ەمەسپىز. ءبىراق، ءبىز وتە اۋىر، باعاسى قىمباتقا تۇسەتىن، جاڭا تەحنولوگيامەن ەمدەلەتىن ناۋقاستاردى تەگىن ەمدەۋگە تىرىسامىز.

- ۇلتتىق نەيروحيرۋرگيالىق ورتالىق سوڭعى ۇلگىدەگى وزىق اسپاپتاردى قاي ەلدەردەن الادى؟

- امەريكادا كوپ شىعارىلادى. ءبىزدىڭ ۇلتتىق نەيروحيرۋرگيالىق ورتالىقتا شۆەتسيادان، جاپونيادان، گەرمانيادان، تۇركيادان شىققان اسپاپتار بار. جالپى، ەۋروپانىڭ ءار ەلىنەن اكەلىنەدى.

- ۋاقىت ءبولىپ سۇحبات بەرگەنىڭىزگە راحمەت!

سۇحباتتاسقان: بەيسەن سۇلتان ۇلى

2015 -جىلى