بالمۇزداق قىز، بۇگىن سەنىڭ پاك كۇيىڭ
وسى ورايدا جوعارعى وقۋ ورنىنا ءتۇسىپ، ۇلكەن ومىرگە قادام باسقان قىزدارعا ارنالعان ولەڭ-جىرلاردى توپتاستىرۋدى ءجون كوردىك. ەندەشە، ولەڭدەر سويلەسىن...
بالمۇزداق قىز
بالمۇزداق قىز، بۇگىن سەنىڭ پاك كۇيىڭ،
جاتاقحانا جانعا جايلى ءساتتى ءۇيىڭ.
قۇشاعىڭدا مامىق، ۇرپەك ويىنشىق -
ءدال وزىڭدەي ءسۇپ-سۇيكىمدى اق ءتيىن.
ساعىندىرسا اۋىل-ايماق، بەلەس، كوك،
مىناۋ قالا مەن كۇتكەندەي ەمەس دەپ،
وتىراسىڭ البومىڭمەن سىرلاسىپ
وتكەن كۇننەن ەستەلىكتەر ەلەستەپ.
ساعان تاڭسىق تۇنگى قالا، بي كەشى.
ساۋىق قۇرىپ قايتقىڭ كەلەد كەيدە وسى.
ءبىراق بوگەت ۇستاز بەرگەن تاپسىرما،
ودان قالسا كارىس، تۇرىك كينوسى.
ۇيدەن قوڭىراۋ شالسا جىلاپ الاسىڭ،
نە ەتسەڭ دە ساعان ءبارى جاراسىم.
ءاربىر كوزدەن، ءاربىر سوزدەن ساباق اپ،
كۇننەن كۇنگە سەن بويجەتىپ باراسىڭ!
ساعان كەيدە وسى ءومىرىڭ بال-داعى.
ال بۇدان دا ءتاتتى كۇندەر الدا ءالى.
قۇربىلارمەن قىدىرتادى ءبىر ءۇمىت،
قالاشىقتىڭ جاعىلعاندا شامدارى.
تاكاپپارلاۋ وتە شىقساڭ پاڭ كۇلىپ،
ەلەڭدەيدى سەرى جىگىت، سال جىگىت.
بۇل شاعىڭنىڭ ءار ساتىندە سىيلىق بار،
ونى كەشتەۋ باعالارىڭ زاڭدىلىق.
مۇنى ساعان ايتقانداعى مازمۇن نە؟
ونى ءوزىڭ-اق سەزىنەسىڭ از كۇندە.
سەنى قۇلاي سۇيەتۇعىن ءبىر جان بار،
ءال- فارابي اتىنداعى كازگۋ- دە!
اسحات قىلىشبەك
*** *** ***
اۋىلدان الماتىعا كەشە كەلگەن،
ىزەتتى قىز ەكەنسىڭ شەشە كورگەن.
...ەركىندىكتىڭ ەسىگىن ەرتە اشىپسىڭ،
سۇرىنەدى ەكەنسىڭ نەشە جەردەن؟
اڭقىلداعان كوڭىلىڭنەن اينالايىن،
بۇلىنەدى ەكەنسىڭ نەشە جەردەن؟
كەشىر، قالقام، مەن ەمەس سۇر مەرگەنىڭ.
اشۋلانبا، بۇلدانبا، سىر بەرمەگىن.
ورمەك توقىپ وتىرعان مىستان- قالا
باياعىدا-اق ساپ قويعان سۇرلەۋلەرىن،
دايىنداپ سۋىق قولدى سۇر مەرگەنىن.
سوندا دا جۇماق بولسىن جۇرگەن جەرىڭ.
ءاپ-ادەمى، اياۋلى، ارلى كوزىڭ
جاسىرماي تۇرادى ەكەن بار مىنەزىن.
بۇل قالانىڭ تولقىنى كەيدە، ءتىپتى،
جارعا يتەرە سالادى ناردىڭ ءوزىن...
الماتىعا اۋىلدان كەشە كەلگەن،
ىزەتتى قىز ەكەنسىڭ شەشە كورگەن.
سۇرىنبەيمىن دەسەڭ دە نەشە جەردەن،
بۇلىنبەيمىن دەسەڭ دە نەشە جەردەن،
قالا دەگەن سونداي عوي،
جەتەگىنە اپ،
جولمەن ەمەس، جۇرگىزەر كوشەلەرمەن.
مەن ءبىر جۇرگەن اعاڭمىن اق جول تىلەر
ال، قالعانىن كورەرسىڭ پەشەنەڭنەن!..
باقىت بەدەلحان
پەرۆاش قىزعا
بولمەڭدە وتىرسىڭ با، جالعىز-جارىم،
ەشقاشان كوڭىلىڭە قونعىزبا مۇڭ.
سەن قازىر ەرىگىشسىڭ، سۋىقتاۋسىڭ،
ءبىراق تا، ءتاپ-ءتاتتىسىڭ بالمۇزداعىم.
ءبىر ۇستازدىڭ جۇزىنەن شۋاق الدىڭ،
كوزىنە ءتۇستىڭ، بالكىم، ءبىر ادامنىڭ.
اۋلاقتاعى اناڭدى ساعىندىڭ دا،
اكەڭدى ويلاپ تاعى دا جىلاپ الدىڭ.
وسىلاي ارمانىڭنان ءارى اساسىڭ،
ساباققا تاڭمەن تۇرىپ تالاساسىڭ.
ءدارىسىڭ بولاتىن جەر تاپپاي قالىپ،
الماتىدا سەن تالاي اداساسىڭ.
بالمۇزداق كوڭىلىڭنىڭ سيقى قاشتى-اۋ،
بويىڭدى ءبىر اي بولدى كۇيكى باستى-اۋ.
كۋرس سايىن بولارسىڭ ەرىنشىكتەۋ،
كۋرس سايىن بولارسىڭ ۇيقىباستاۋ.
ءسويتىپ سەن كۋرسقا ءوتىپ، جاي تابارسىڭ،
جەل تەربەگەن تەرەكتەي شايقالارسىڭ.
وزىڭە بىرەۋ ايتقان وسى ءسوزدى،
وزىڭنەن كەيىنگىگە قايتارارسىڭ.
ولجاس قاسىم
كۇزەتشى
جاتاقحانادا ءومىر تۇندە باستالادى- اۋ...
سەنىڭ سوزىڭنەن
شىرايىڭدا الاۋلاپ گۇلدەگى اراي،
وقۋ زالىن دۋ قىلدىق بىرگە تالاي...
كۇن جارىقتا مۇلگيتىن جاتاقحانا،
وياناتىن سىلكىنە تۇنگە قاراي.
دالا ۇيقىدا، ۋ-شۋى تىنىشتالعان،
جاتاقتا - ءومىر قۇرالعان دىبىستاردان.
قوزعالىسقا اۋەن بوپ ۇندەسەدى،
ءتاتتى سىبىس ەستىلىپ بۇرىشتاردان.
كوزدەرىڭنەن ءبىر كەمەل ويدى اڭعارىپ،
قايتا-قايتا قارايمىن قايران قالىپ.
«بالمۇزداقتار» وڭاشا قالدىراتىن،
ءبىزدى كورىپ وتىرعان جايراڭ قاعىپ.
بارا-بارا ايرىلىپ كۇدىك كۇشتەن،
جەلىك ءبىتىپ قىلعاندا ءۇمىتتى ۇستەم.
سەزىمدەردى ۇركىتىپ كەتۋشى ەدى،
تەكپىشەكتەن ادامدار ءمىنىپ، تۇسكەن.
شوعىن ۇرلەپ عاشىقتىڭ الماتى نىق،
اربالۋمەن ءتۇن ءوتتى جانعا تۇنىق.
كەۋدەمىزگە باق قۇسى ۇيا سالىپ،
بولمەمىزگە قايتامىز تاڭدى اتىرىپ.
تاعدىرىمىز ءتۇيىسىپ تورعىن بەلدە،
جۇزىڭدەگى شومىلعام ءمولدىر كولگە.
بۇلدىراعان دالانىڭ ساعىمىنداي،
ەلەس بولىپ بارادى-اۋ سول كۇندەر دە.
ەھ، ءتورتىنشى قاباتتا تۇراتىن قىز،
ءوزىڭ باردا بولمايتىن مۇراتىم كۇز.
...سول ەكەۋمىز سىر شەرتىپ، ارماندى ايتىپ،
قالا ۇيقىسىن كۇزەتىپ شىعاتىنبىز.
باۋىرجان ءالىقوجا
توپتاستىرعان: شەرحان تالاپ ۇلى
massaget.kz
