الەمدەگى ەڭ تازالىق سۇيگىش جانۋار

نۇر-سۇلتان. قازاقپارات - قۇندىز تازالىققا وتە بەكەم جانۋار. ولار ءبىر كۇننىڭ ىشىندە تەرى جامىلعىسىن بىرنەشە مارتە رەتكە كەلتىرىپ وتىرادى. سۋدان شىعا سالىپ، قۇرعاق جەرگە ءتورت اياقتاپ جاتادى دا ءۇستى- باسىن تازالايدى.

قۇندىز دەنەسىنە جابىسىپ قالعان قوقىستاردى بۇگە-شۇگەسىنە دەيىن تازالايدى. ونىڭ ارتقى ەكى تابانىندا ارنايى ءجۇن تازالاۋعا ءبىر-ءبىر ۇلكەن تىرناقتارى بار.

قۇندىزدار نەگە سۋ توعانىن سالادى؟

قۇندىز سۋدا ءومىر سۇرەتىن جانۋار بولعاندىقتان، جاز، قىسقا قاراماستان بەلسەندىلىك تانىتادى. قىس مەزگىلىن قالايدا امان ەسەن قىستاپ شىعۋ ءۇشىن ولارعا تەرەڭ ءارى جىلى پانا كەرەك. قۇندىزدار ىندەرىن سۋ استىنا سالاتىندىقتان وزەندى ءبىر قالىپتى جانە سۋ قورىن تۇراقتى، مولىراق ەتىپ ۇستاپ تۇرۋعا سۋ توعانىن سالادى. ولار بوگەت تۇرعىزۋ ءۇشىن الدىمەن وزەننىڭ تومەنگى جاعىنا ۇيەڭكىنىڭ شىبىقتارىن ورنالاستىرادى، ءسويتىپ ۇستىنە بۇتاق اعاشتارىن ۇيەدى، بەتىنە ءار ءتۇرلى اعاشتاردىڭ ساباعىن مىعىمداپ، ونىڭ ۇستىڭگى جاعىن اۋىر تاستارمەن كومكەرەدى.

قۇندىز اعاشتى سۇلاتىپ تۇسىرۋگە الدىڭعى ازۋ تىستەرىن پايدالانادى. تىستەرىمەن ولار اعاشتى وڭاي كەمىرەدى. ءبىر تىستەگەندە شامامەن 2 سانتيمەتر اعاش قابىعىن جۇلىپ الادى. ادەتتە قۇندىزدار قالىڭدىعى 25 سانتيمەتر بولاتىن، تەرەك، قاندى اعاش، كوكتەرەك سەكىلدى اعاش دىڭگەگىن تاڭدايدى. بۇل اعاشتى قۇندىز ءبىر ءتۇننىڭ ىشىندە قۇلاتادى. ازىق رەتىندە اعاشتىڭ تەك ىشكى بولىگى جەلىنەدى، ال قالعان بولشەكتەرى توعان تۇرعىزعانعا پايدالانىلادى. توعانداردىڭ بيىكتىگى 2 مەتردەن اسپايدى، ءبىراق بوگەتتىڭ ۇزىندىعى ۇلكەن بولۋى مۇمكىن. قىستاۋدى ولار جازدىڭ سوڭعى ايىندا نەمەسە كۇز مەزگىلى كەلگەندە باستايدى.

دايىنداعان: نۇربول نۇرماحان ۇلى

massaget.kz