ءبىر ستاقان ءسۇت - عيبراتتى اڭگىمە
قازىر ويلانىپ وتىرىپ، انامنىڭ مەنى جاقسىلىققا دەگەن باۋلۋى ەكەنىن تۇسىنەمىن.
شىنىندا، كىم نەندەي جاقسىلىق قىلسا، سونىڭ قايىرىمىن كورەدى دەگەن ءسوز بار ەمەس پە؟ مىنا وقيعادان وتە قاتتى اسەرلەندىم. ءتىپتى، كەيبىرلەرىڭىزدىڭ باستارىڭىزدان مۇنداي وقيعالار وتكەن دە بولار. جاقسىلىقتى قايىرىمسىز جاساي الۋ - نەتكەن كەرەمەت ادەت!
ءبىر ستاقان ءسۇت
حوۆارد كەدەي وتباسىنان بولىپ، مەكتەپكە كەرەك كىتاپ-داپتەرىن الۋ ءۇشىن كوشەدە ءجۇرىپ، زاتتار ساتاتىن.
كۇندەردىڭ بىرىندە ەشنارسە ساتا الماپتى، وعان قوسا قارنى دا اشقان. ءبىر ءۇيدىڭ ەسىگىن قاعىپ، تاماق سۇراۋدى شەشتى. ءبىراق، ەسىكتى اشقان جاس ايەلدى كورىپ ۇيالدى. ۇيالا-بوزارا ايەلدەن تاماق سۇراۋدىڭ ورنىنا:
- كەشىرىڭىز، ءبىر ستاقان ءسۇتىڭىز بار ما؟ - دەي الدى.
جاس ايەل بالانىڭ اش بولۋ ىقتيمالىن ويلاپ، وعان ۇلكەن ستاقان ءسۇت اكەلدى. بالا ءسۇتتى اسىقپاي، ءار جۇتىمىن سىڭدىرە ءىشىپ بولعاڭ سوڭ:
- كوپ راحمەت! ءسۇت ءۇشىن قانشا قارىزبىن؟ - دەپ سۇرايدى.
- ەش قارىزىڭىز جوق! - دەدى كۇلىمدەپ جاس ايەل،
- انام كورسەتكەن جاقسىلىق پەن جاساعان كومەگىن ءۇشىن ەشقانداي اقى دامەتپەۋىمىزدى ۇيرەتكەن بولاتىن.
- ونداي بولسا، شىنايى جۇرەكتەن تاعى دا ۇلكەن راحمەت ايتامىن!
حوۆارد كەللي سول ۇيدەن شىققان كەزدە، ءوزىنىڭ تويعانىن عانا ەمەس، رۋحاني بايىعانىن دا سەزدى.
كوپ جىلدار ءوتتى. جاس ايەل سيرەك كەزدەسەتىن ءبىر اۋرۋمەن ناۋقاستانادى. جەرگىلىكتى دارىگەرلەر تۇك ىستەي الماي، ناۋقاستى قالانىڭ ۇلكەن مەركەزىنە جىبەرەدى. دوكتور حوۆارد كەللي كەڭەس بەرۋ ءۇشىن شاقىرىلعان كەزدە، ناۋقاستىڭ قاي جاقتان كەلگەنىن ەستىگەن كەزدە، ناۋقاستى ءوزى بارىپ كورگىسى كەلەدى. ءبىر كەزدەرى وعان ءسۇت بەرىپ، مەيىرىم تانىتقان ايەلدى دەرەۋ تانىدى دا، ايەلدىڭ جاقسى بولۋىنا بار كۇشىن سالدى.
قيىن وپەراتسيادان كەيىن ايەلدىڭ دەنساۋلىعى جاقسارا ءتۇستى. وپەراتسيا اقىسى ءۇشىن چەك جازىلىپ، دوكتور كەلليدىڭ مامىلەسىنە اكەلىنگەن كەزدە، دوكتور چەكتىڭ ۇستىنە ءبىر نارسەلەردى جازدى دا، چەكتى ناۋقاسقا تاپسىرۋعا رۇقسات ەتتى. جاس ايەل چەك بولعان حاتقالتانى قولعا العان كەزدە، ول چەكتى ومىرىندە تولەي المايتىنىنان سەزىپ، حاتقالتانى قورقىپ اشتى. حاتقالتا ىشىندەگى چەككە جاپسىرىلعان جازبا حاتقا كوزى ىلىنەدى.
«اۋرۋحانا مەن وپەراتسيا شىعىندارى تولىعىمەن ءبىر ستاقان ءسۇت اقىسىنا تولەندى».