التىن ساعات وقيعاسى

نۇر-سۇلتان. قازاقپارات - جاس ورتاسىنا كەلىپ قالعان كەزى بولسا كەرەك، جاقىن دوسى توققا ءتۇسىپ، ومىردەن ءوتىپتى دەگەن سۋىق حاباردى ەستىپ، قيماس دوسىن سوڭعى ساپارعا شىعارىپ سالۋ ءۇشىن اتامىز دا سول جەرگە بارعان ەدى.

دوسىن اعاش قوراپقا سالىپ، جەر قوينىنا بەرمەس بۇرىن، ءبىر كورىپ قالعىسى كەلگەن اتام، تاقتايدىڭ بەتىن اشىپ قالعاندا، دوسىنىڭ قولىنداعى وتە قىمبات باعالى التىن ساعاتقا كوزى ءتۇسىپتى.

ۇيگە كەلگەن سوڭ، جەرلەنگەن ادامعا التىن ساعاتتىڭ ەش پايداسى بولمايتىنىن جاقسى بىلەتىن اتامىز بىردەن التىن ساعاتتى قازىپ الۋعا شەشىم قابىلداماسى بار ما؟ ءتۇن ورتاسىندا دوسى جەرلەنگەن جەرگە كەلىپ، ءتىلىن كاليماعا كەلتىرىپ، كوردى قازا باستايدى. ءبىر كەزدە اعاش ساندىققا دا جەتەدى. التىن ساعاتتى كورگەندە، بارلىق قورقىنىش سەيىلىپ، جايمەن عانا ساعاتتى الىپ، قولىن كەيىن قاراي تارتا بەرگەندە، بىلەگىنەن سارت ەتىپ ۇستاي العان سۇپ- سۋىق قولدان زارەسى ۇشادى. «قايدا الىپ بارا جاتىرسىڭ؟». مۇندايدا اۋىزعا ءسوز تۇسە مە، «نە دە بولسا دۇعامدى ايتىپ، قاشىپ قۇتىلايىن» دەپ ويلاپ ۇلگەرگەنشە، جاڭاعى تاستاي قول جاعاسىنا جارماسا كەتەدى. قانشا ۋاقىت وتكەنى بەلگىسىز، ءبىر كەزدە تىلگە كەلگەن اتامىز: «سەن ولگەن ەدىڭ عوي»، - دەيدى ارەڭ.

«مەن بۇل جەردە قايدان ءجۇرمىن؟». ەكى دوس ءبىر- ءبىرىن سوندا عانا تانىپ، تۇسىنىسە باستايدى.

جەر قوينىنا كەتكەن دوسىنىڭ شىن مانىندە ولمەگەنىن، تەك توق اسەرىنەن ەسەڭگىرەپ قالعانىن ەندى ءتۇسىندى. التىن ساعات يەسىن قۇتقارىپ، قايتا ءومىر سىيلاعان اتامىزدىڭ قولىنا ءوتتى.

massaget