USD 429.57 EUR 447.35
RUB 6.94 CNY 63.23
جاڭالىقتار

ەنەممەن تۇرعىم كەلەدى

26 تامىز 18:43
:ءبولىسۋ

نۇر-سۇلتان. قازاقپارات - ەل قاتارلى قوعامدىق كولىكپەن جۇرەم. تاڭەرتەڭ جۇمىسقا كەلە جاتقاندا ادەتتەگىدەي 12 س م- لىك بيىك وكشە اياق كيىممەن اۆتوبۋستىڭ ارت جاعىندا تۇرعام. جاستارعا ورىن بولۋشى مە ەدى.

وتىرىپ الىپ، بۇكىل اۆتوبۋستاعى ادامداردى ەرىكسىز سوزدەرىنە قۇلاق استىرعان ەكى ايەلدىڭ اڭگىمەسى مەنىڭ دە ويىمدى ءبولدى. قۇلاققاپپەن تىڭداپ تۇرعان اعىلشىن ءتىلىنىڭ جاتتىعۋلارى جايىنا قالدى.

- ءسۇيتىپ سول، ءايتىپ-ءبۇيتىپ قۇدالىقتى وتكىزىپ الدىق. ەندى كۇيەۋ بالا ەكەۋى ءوز تىرشىلىكتەرىن جاساسا دەپ وتىرمىن. قىزىمنىڭ دا قۇلاعىنا قۇيىپ جاتىرمىن. بولدى ەندى، ەنەسىنىڭ ۇيىندە 2-3 اي تۇردى عوي، جىبەرسىن دەپ وتىرمىن.

- دۇرىس قوي، جاستار ءوز بەتتەرىمەن ءومىر ءسۇرۋ كەرەك. ەڭ باستىسى ەنەسىمەن تۇرماسا بولدى عوي.

- سونى ايتام.

ارى قاراي اڭگىمەلەرى جاعىمسىز بولدى. قۇلاققابىمدى قايتا قوسىپ، بار داۋسىمەن قاتتى قويىپ الدىم. اۆتوبۋستاعىلاردىڭ ءبارى ولاردى تىڭداپ وتىر. ءۇپ-ۇلكەن ايەلدەر. اڭگىمەلەرى جاعىمسىز. شىنىمدى ايتسام، جاقتىرمادىم. جىنىم كەلدى. وزدەرى ەنە كورمەگەندەي. نە بولماسا، ەنە بولمايتىنداي. ءبىرىنىڭ بولماسا، ءبىرىنىڭ ۇلى بار شىعار. ادام ويلانىپ سويلەسە قايتەدى ەكەن.

ەنە دەگەن دە ايەل زاتى. ول دا انا. كەلىنگە سويلەسە جامان بولسىن دەمەيتىن شىعار. ءبىزدىڭ ۇيدە ۇل جوق، سوندىقتان كەلىن دە كورگەمىز جوق، انامىز دا ەنە بولعان جوق. ءبىراق ەنە دەگەندى ەشقاشان جاعىمسىز ەتىپ تۇسىندىرگەن ەمەس بىزگە.

كەرىسىنشە، جاس وتباسىعا كوزباسشى بولاتىن ۇلكەن ادام كەرەك ەمەس پە؟ ەكەۋدەن ەكەۋ، وڭاشا كەتۋگە نەسىنە اسىعادى؟ مۇمكىن، تۇرمىس قۇرماعان سوڭ، ەشتەڭە تۇسىنبەيسىڭ دەپ كوپ ادام مەنى جازعىراتىن دا شىعار...

قالاي بولعاندا دا، بولاشاقتا تۇرمىس قۇرىپ جاتسام، ەنەممەن بىرگە تۇرعىم كەلەدى. قىز بالاسىن ۇيىندە ونسىزدا قوناق دەپ تورىنە شىعارىپ، قۇرمەتتەيدى. ەركە وسەرى ءسوزسىز. ال وتباسىلىق ومىرگە قادام باسقاندا ماعان بولاشاق ەنەمنىڭ كوپ كومەگى كەرەك. قاراپايىم اس دايىنداۋدان باستاپ، ءۇيدى، كۇيەۋدى، بالا-شاعانى قالاي باپتاۋ كەرەكتىگىن، وتباسىلىق ءومىردى قالاي ءسۇرۋ كەرەكتىگىن ەنە ۇيرەتپەگەندە كىم ۇيرەتەدى؟ بالالارىما كىم قاراسادى؟ العاش رەت انا بولعاندا، دىم بىلمەيمىن، بالالاردى شومىلدىرۋعا، اياق-قولىن سوزۋعا كىم كومەكتەسەدى؟

ولاردىڭ ءتىلى بىلدىرلاپ شىعىپ، قىلىقتارى كورىنە باستاعاندا قۋانىشىما كىم ورتاقتاسادى؟ جۇمىستان كەلگەندە بالالاردىڭ ءبىرىن جەتەكتەپ، ءبىرىن ارقالاپ الدىمنان كىم شىعادى؟ ارينە، مۇنداي نارسەلەردى اناڭمەن بولىسۋگە دە بولادى. ءبىراق ەنەنىڭ ورنى بولەك. مۇمكىندىك بولسا، مەن بولاشاقتا ەنەممەن بىرگە تۇرعىم كەلەدى. ال ەگەر، تاعدىردىڭ قانداي بولارىن كىم ءبىلسىن، بولاشاق جارىمنىڭ اناسى بولماعان جاعدايدا ەشتەڭە ەتپەيدى. ول كەزدە جۇبايىما تۇڭعىش بالامداي قاراپ، اناسىنداي قامقورلىق تانىتار ەم...

قالاي بولعاندا دا، جاس وتباسى ءۇشىن اتا-ەنەمەن تۇرۋ وتە ماڭىزدى جانە اسا قاجەت دەپ ويلايمىن!

اقبوتا مۇسابەك
blogtime.kz


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات