دۋبايداعى اتاقتى التىن بازارى - فوتو

نۇر-سۇلتان.قازاقپارات - اتاقتى التىن بازارى دۋباي ورتالىعىنداعى دەيرە اتالاتىن ساۋدا اۋدانىندا ورنالاسقان. بۇل بازار - الىپ جاتقان اۋماعى جانە ساتىلاتىن التىندار مولشەرى جونىنەن الەمدەگى بارلىق التىن ساتاتىن ورىنداردان وزىپ تۇر.

گولد سۋك ( Gold Souk) بازارىندا 55 جىلدان بەرى التىن ساتۋ جانە ساتىپ الۋ ۇدەرىسى ۇزدىكسىز ءجۇرىپ كەلەدى. بۇل جەردەن كەز كەلگەن اشەكەي بۇيىمدى: ءداستۇرلى شىعىس بۇيىمدارىنان باستاپ، زاماناۋي اشەكەيلەرگە دەيىن ساتىپ الۋعا بولادى.

الەمنىڭ ەڭ ۇزدىك دەگەن زەرگەرلەرى مەن الدىڭعى قاتارلى كومپانيالاردىڭ تۋىندىلارى گولد سۋك بازارىنا قويىلادى.

سانى جوق، ءبىراق ساپاسى بار دۇكەندەر سارى، اق، القىزىل ءتۇستى 18 كاراتتىق التىنداردى، ءتىپتى، 21,22, 24 كاراتتىق التىنداردى ۇسىنادى. ودان باسقا گاۋھارمەن، جاقۇتپەن، مەرۋەرتپەن، لاعىلمەن جانە تاعى دا باسقا اسىل تاستارمەن بەزەندىرىلگەن التىن بۇيىمداردى دا وڭاي تابۋعا بولادى.

بىرىككەن اراب امىرلىگى - ەڭ الپاۋىت التىن ەكسپورتشىلاردىڭ ءبىرى. مۇندا باعالى مەتاللدىڭ ءبىر گرامى الەمدەگى ەڭ ارزان باعا بويىنشا قويىلادى. ءتىپتى كەيدە، دۋبايداعى التىن باعاسى لوندوندىق بيرجاداعى باعادان دا تومەن بولادى ەكەن.

اۋقىمدى اشەكەي دۇكەندەرىنىڭ سىرتىنان ءوتىپ بارا جاتىپ، باقشادا پىسكەن جەمىستەي، ىلگىشتەردە سالبىراپ تۇرعان التىنداردى كورگەندە ءۇزىلىپ قۇلاي ما دەگەن ويعا قالاسىز. ءبىراق، ونداي وقىس وقيعالار بولمايدى.

ساتۋشىلار ءار كۇن سايىن جاڭا بۇيىمداردى ءىلىپ، ەسكىلەرىن الىپ جاتادى. ءاربىر ساۋداگەر ءوز تاۋارىنا لايىقتى ماقتاۋ سوزدەردى ايتادى. ولار ايتپاسا دا، التىننىڭ ءوزى ساپاسىنان حابار بەرىپ تۇر. گولد سۋكتاعىداي باعا مەن تاڭداۋ الەمنىڭ باسقا ەشبىر جەرىندە جوق!

دايىنداعان: ايگەرىم سماتۋللايەۆا

massaget