كىسى مەن ارىستان - «بالاۋسانىڭ» وقىرماندارىنا
ارىستان اقىردى وعان اۋزىن اشىپ:
«كورەيىن، قيمىلداشى قارسىلاسىپ!
شەكىرەيىپ: «جان بىتكەنگە پاتشامىن!» - دەپ،
ماقتانىپ جۇرۋشى ەدىڭ سۋداي تاسىپ.
قايراتىڭ ماقتاناتىن قانداي ەكەن،
كەل بەرى، بايقاسالىق كۇش سىناسىپ.
ادامىم، راس بىزگە پاتشا بولساڭ،
ءجۇرىپ كور اياعىڭدى قادام باسىپ!»
«ارىستان! سەنەن ارتىق ەمەس كۇشىم،
ءسوزىمدى ىلتيپاتپەن تىڭداپ، ءتۇسىن.
ەتەتىن مەنى ارتىق حايۋانداردان
كۇش ەمەس، ونەرىم مەن ەتكەن ءىسىم.
ول راس، سەندەي ونشا باتىر ەمەن،
ماقتانشاق، وتىرىككە جاقىن ەمەن.
قانشاما كۇش جەتپەيتىن قيىن ءىستى
ورنىنا كەلتىرەمىن اقىلىممەن.
بۇل ساعان ايتىپ تۇرعان ناعىز شىنىم،
شىندىعىن كورسەتەيىن قازىر مۇنىڭ.
ەگەر دە ءسوزىم جالعان بولىپ شىقسا،
جەيسىڭ عوي سونان سوڭ دا، جارىقتىعىم!
سەن قارا: قىلداي ورمەك اناۋ تۇرعان،
مەن ەدىم ازاپتانىپ سونى قۇرعان.
كىشكەنە جەلگە دە ءوزى سەلكىلدەيدى،
كورەسىڭ، تەمىر ەمەس ءيا تاس قورعان.
جۇرسەم دە قايراتىڭا سىرتتان قانىپ،
كوزىممەن كورگەنىم جوق ءالى انىق.
اۋەلى مەن وتەيىن ار جاعىنا،
وتەرسىڭ، مىقتى بولساڭ، بۇزىپ-جارىپ».
«تۇرسىڭ عوي كۇش سىنارعا قىلداي تورمەن،
ول تۇل، بايقاسقانمىن ونان زورمەن.
سەن بارىپ، ار جاعىندا دايار بوپ تۇر،
جەتەرمىن مەن دە قازىر تۋرا جولمەن».
جونەلدى كوپ سويلەمەي ادام پاقىر،
قۋانىپ جىلدام ءجۇرىپ بارا جاتىر.
داتىنان تور-تورلاردىڭ ءوتىپ الىپ،
تۇردى ەندى: «كەلسەڭ، كەل، - دەپ، - ءبىزدىڭ باتىر!».
ارىستان شاپتى تورعا اتقان وقتاي،
قومسىنىپ، بەينە الدىندا نارسە جوقتاي.
وتە الماي توردى بۇزىپ، شىرماتىلىپ،
سول جەردە قولعا ءتۇستى ۇرماي-سوقپاي.
ورالىپ جاتتى تورعا ارىستانىم،
اقىلدان ءبىلدى كۇشتىڭ قالىسقانىن.
تەرىسىن ارىستاننىڭ سويىپ الىپ،
ولجالى قايتتى اڭشى ءدانىشپانىم.
* * *
بۇل جازعان بوزبالاعا ءبىر وسيەت،
ونەرسىز قارا كۇشتە جوق قاسيەت.
ويلاماي، كۇشكە سەنىپ ەتكەن ءىستىڭ
زالالى ءار ۋاقىتتا باسقا تيەد.
دەمەيمىن كۇش كەرەكسىز ادامزاتقا،
ونەر، وي ونان دا ارتىق مال مەن باققا.
ونەردىڭ جوقتىعىنان ازىپ ءجۇرمىز،
ناعىز بۇل ارىستانداي بولماساق تا.
بۇل كۇندە كۇشتەن ويدى بۇرىن جۇمسا،
قارا كۇش بايگە الماي ءجۇر وسى شاقتا.
امال ەت زامانىڭنىڭ ىڭعايىنا،
بايگەسىز قۇر لاعىپ بوسقا شاپپا.
اقىلدان كۇشىڭدى ارتىق كورىپ جۇرسەڭ،
جادىڭا بۇل كەڭەستى وقىپ ساقتا!
«قىرىق مىسال»
