مارال ىسقاقباي
الماتى وبلىسىنىڭ جامبىل اۋدانىندا ورىس ءتىلى جانە ادەبيەتى ءپانىنىڭ مۇعالىمى، مەكتەپ ديرەكتورىنىڭ ورىنباسارى، ورتا مەكتەپ ديرەكتورى بولىپ ىستەيدى.
وسى جىلدارى ول العاشقى تۋىندىسى «قىرىق قىز» حيكاياتىن جازىپ جاريالايدى. سونان سوڭ ادەبيەتپەن تياناقتى تۇردە اينالىسۋ ءۇشىن، 1971- جىلى الماتىعا كوشىپ كەلەدى. مۇندا ول اۋەلى قازاق ەنسيكلوپەدياسىنا عىلىمي رەداكتور بولىپ ورنالاسادى دا، 1973- جىلى مەملەكەتتىك باسپا كوميتەتىنە اۋىسادى. 1976 -جىلى «قازاق كىتاپ» بىرلەستىگىنە باس رەداكتور بولىپ تاعايىندالادى. 1977- جىلى قازاقستان كومپارتياسى ورتالىق كوميتەتىنە شاقىرىلىپ، 1984 -جىلعا دەيىن پارتيالىق قىزمەتتە بولادى. 1984 -جىلى قازاقستان جازۋشىلارى وداعى باسقارماسىنىڭ حاتشىلىعىنا سايلانادى دا، 1985- جىلى «مەكتەپ» باسپاسىنا ديرەكتور بولىپ تاعايىندالادى. 1986- جىلى «جازۋشى» باسپاسىنىڭ ديرەكتورلىعىنا اۋىستىرىلادى. 1991- جىلى م.ىسقاقباي قازاقستان رەسپۋبليكاسىنىڭ اۆتورلىق جانە ساباقتاس قۇقىقتار جونىندەگى مەملەكەتتىك اگەنتتىگىن (قازم ا س ق ا) قۇرىپ، ونىڭ ءتوراعاسى بولىپ ىستەيدى. 1997- جىلى سول قىزمەتتەن زەينەتكەرلىككە شىعىپ، «قازاقستان اۆتورلارى قوعامى» دەيتىن رەسپۋبليكالىق قوعامدىق بىرلەستىك قۇرادى. 12 جىلدان بەرى وسى مەكەمەنىڭ ءتوراعاسى بولىپ ىستەپ كەلەدى.
م.ىسقاقبايدىڭ كوركەمدىك ساپاسى جوعارى كوپتەگەن اڭگىمەلەرىمەن قاتار «تاڭ اتاردا»، «شىلدە باستالعاندا»، «كەزەك دۇنيە»، «جويقان توبە»، «عاشىق بوپ كورمەگەن كەلىنشەك»، «پەندە عۇمىر» سياقتى كولەمدى حيكاياتتارى، روماندارى بار. سونداي-اق، جازۋشىنىڭ ادەبي سىندارى، زەرتتەۋلەرى جەكە كىتاپ بولىپ جارىق كورگەن. 2008 -جىلى جازۋشىنىڭ 70 جاسقا تولۋىنا وراي 5 تومدىق شىعارمالار جيناعى جاريالانعان.
