قابدەش ءجۇمادىل
«قازاق ادەبيەتى» گازەتىندە (1965-1967)، «جازۋشى» باسپاسىندا (1967-1976)، مەملەكەتتىك باسپا كوميتەتىندە (1976-1981) جاۋاپتى قىزمەتتەر اتقاردى. 1981 -جىلدان ءبىرىڭعاي شىعارماشىلىق جۇمىستا.
جازۋشىنىڭ ادەبي قىزمەتى شاۋەشەك گيمنازياسىندا وقىپ جۇرگەندە باستالعان. 1954- جىلى «شىنجاڭ گازەتىندە» العاشقى ولەڭدەرى جارىق كوردى. «جامال» اتتى تىرناق الدى اڭگىمەسى 1956- جىلى «شۇعىلا» جۇرنالىندا باسىلدى. جاستىق شاقتا جازىلعان ولەڭدەرى 1967- جىلى «جاس داۋرەن» دەگەن اتپەن جەكە جيناق بولىپ شىقتى. وسىدان كەيىن جازۋشى ءبىرىڭعاي پروزا جازۋعا ويىسقان. «قازدار قايتىپ بارادى» اتتى العاشقى اڭگىمەلەر جيناعى 1968-جىلى، «كوكەيكەستى» رومانى 1969-جىلى جارىق كوردى. سودان بەرى جازۋشى قالامىنان كوپتەگەن اڭگىمە، حيكاياتتار، ون شاقتى رومان تۋدى. روماندارىنىڭ ءدىنى تاريحي تاقىرىپقا ارنالعان. ونىڭ ەكى كىتاپتان تۇراتىن «سوڭعى كوش» (1974-1981)، «اتامەكەن» (1985)، «تاعدىر» (1988) روماندارى شىڭجاڭ قازاقتارىنىڭ ومىرىنەن جازىلعان. «سوڭعى كوش» ديلوگياسىنا 1983- جىلى م.اۋەزوۆ اتىنداعى ادەبي سىيلىق، «تاعدىر» رومانىنا 1990-جىلى اباي اتىنداعى مەملەكەتتىك سىيلىق بەرىلدى.
قوس تومدى «دارابوز» (1996) رومانى تاريحي تاقىرىپقا، «سارجايلاۋ»، «سايگۇلىكتەر»، «ءبىر قاپانىڭ تۇرعىندارى»، «ءبىر ءتۇپ توراڭعى» اتتى شىعارمالارى بۇگىنگى زامان تاقىرىبىنا ارنالسا، «قىل كوپىر» رومانى (2003) مەن سوڭعى جىلدارى جازىلعان ءبىر توپ اڭگىمەلەرىندە تاۋەلسىزدىكتەن كەيىنگى وتپەلى ءداۋىر شىندىعى كورىنىس تاپقان. جازۋشى «تاڭعاجايىپ دۇنيە» اتتى عۇمىرنامالىق رومانىندا (1999) ءوزى ءومىر سۇرگەن ورتا مەن زامانداستارى جايىندا سىر شەرتەدى.
نەگىزگى ەڭبەكتەرى 2003-2004 - جىلدارى «قازىعۇرت» باسپاسىنان شىققان «ون ەكى تومدىق» شىعارمالار جيناعىنا توپتاستىرىلعان. 1998- جىلى «قازاقستاننىڭ حالىق جازۋشىسى» دەگەن اتاق بەرىلدى.
