ويىن ولەڭدەر
ساناماق
ءبىرىم - ءبىر،
ەكىم - ەكى،
ءۇشىم - ءۇش،
ءتورتىم - ءتورت،
بەسىم - بەس،
التىم - التى،
جەتىم - جەتى،
سەگىزىم - سەگىز،
توعىزىم - توعىز،
ونىم - ون.
ون ءبىرىم - ونى تاپشى اي-كۇنىم؟
ءبىر دەگەنىڭ - بىلەۋ،
ەكى دەگەنىڭ - ەگەۋ.
ءۇش دەگەنىڭ - ۇسكى،
ءتورت دەگەنىڭ - توسەك،
بەس دەگەنىڭ - بەسىك،
التى دەگەنىڭ - اسىق،
جەتى دەگەنىڭ - جەلكە،
سەگىز دەگەنىڭ - سەركە،
توعىز دەگەنىڭ - تورقا،
ون دەگەنىڭ - ويماق،
ون ءبىر - قارا جۇمباق.
قۋىر-قۋىر قۋىرماش،
بالالارعا ءبيداي ءشاش!
تاۋىقتارعا تارى ءشاش!
ساۋساق ساناۋ ويىنى
باس بارماق،
بالالى ۇيرەك،
ورتان تەرەك،
ءشۇلدىر شۇمەك،
كىشكەنە بوبەك.
سەن تۇر،- قويىڭا بار!
سەن تۇر - قوزىڭا بار!
سەن تۇر - جىلقىڭا بار!
سەن تۇر - سيىرىڭا بار!
سەن تۇر - تۇيەڭە بار!
...ال سەن الاڭداماي،
قازان ءتۇبىن جالاپ،
ۇيدە جات.
مىنا جەردە قۇرت بار،
مىنا جەردە ماي بار...
مىنا جەردە قاتىق بار...
قىتىق، قىتىق!
ويلاپ تاپ؟
تۇيە، بوتا ماڭ باسقان،
ءتورت اياعىن تەڭ باسقان.
شۇناق قۇلاق بەس ەشكى،
قوس-قوس لاقتى قوس ەشكى
ءتورت قوزىلى ەكى قوي،
ءبارىن بىرگە ويلاپ قوي.
سان ىشىندە كىم ۇتتى؟
بىرەۋ دەدىك،
ەكەۋ دەدىك،
ۇشەۋ دەدىك،
تورتەۋ دەدىك،
بەسەۋ دەدىك،
التاۋ دەدىك،
جەتەۋ دەدىك،
سان ىشىندە كىم ۇتتى؟
بىرەۋدەن باستاپ، جەتەۋ ۇتتى.
وندى قايدا تاستادىڭ، وڭعا قاراي باس ادىم.
نەشە رەت «ەۋ» دەدىك؟
التى رەت «ەۋ» دەدىك.
نەشە رەت «اۋ» دەدىك؟
ءبىر رەت «اۋ» دەدىك.
التىنى «اۋ» دەدىك.
«اۋ» دەسىپ تۇگەل جونەلدىك.
قۇلاق كەسۋ
قارعام، قارعام دەسەدى،
قارعام قاشان وسەدى؟
جاقسى تىلەك جار بولسا،
سوندا قارعام وسەدى.
قارعام سوققان پىشاعى
قىزىل قىرعىش دەسەدى،
اشۋىنا تيسەڭدەر قۇلاعىڭدى كەسەدى.
اينالايىن بالادان
(ديالوگ تۇرىندە جىرلانادى)
اينالايىن بالادان، تاۋىپ الدىق دالادان.
دالادا بالا جاتا ما؟
ءتۇسىپ قاپتى شانادان.
... ءبىزدىڭ قايدا ەكەن؟
قىزدارمەنەن تويدا ەكەن.
تويدا نەعىپ ءجۇر ەكەن؟
الما تەرىپ ءجۇر ەكەن.
الماسىنان كانەكي؟
جاڭا تەرىپ ءجۇر ەكەن.
جاڭاسىنان كانەكي؟
-قابى تولماي ءجۇر ەكەن.
بالالار ديالوگى
ءبىرىنشى بالا:
اپاڭ كەتتى بەل اسىپ،
بەلىنە بەلبەۋ جاراسىپ.
تەزەك تەرىپ جۇرگەندە،
كەتىپ قاپتى اداسىپ.
ەكىنشى بالا:
اپاسى ونىڭ كەلەدى،
جۇمىرتقا اكەپ بەرەدى،
... ونى بىلەدى،
جىلامايدى، كۇلەدى.
اينالايىن ايدان
اينالايىن ايدان،
سۋ الايىن سايدان،
... بوپەشىم،
ءتيسىن ەلگە پايداڭ!
اسپانداعى جۇلدىزىم،
ماڭدايداعى قۇندىزىم،
ۇيىقتاي قويشى تەزىرەك،
تولىقسىعان قىرمىزىم!
قالاماق
(1- ءتۇرى)
جىلقى-مىلقى،
ويىن-كۇلكى،
سيىر-ميىر،
ەشكى-مەشكى،
تۇيە-مۇيە،
قوي-موي،
قوزى-موزى،
تورعاي-مورعاي،
قوس سوزدەر وسىلاي.
ون اتتا
سول جاققا.
2- ءتۇرى
قاعاز، قالام
قولعا الام،
ەلگە بارام،
مالشى بولام.
سيىر باعام،
ەشكى ساۋام،
وتىن شابام،
ونى جارام،
وتىن جاعام.
ون اتتا وڭ جاققا.
قالاماق
(3-ءتۇرى)
وگىز سەمىز،
جىلقى قوڭدى،
تۇيە قومدى،
ەشكى مايلى،
شاجىرقايلى،
سيىرىم ءسۇتتى،
ساۋلىعىم قۇتتى.
قالاماق
(4- ءتۇرى)
قالاماق
قويان قاشقىن،
قايدا قاشتىڭ؟
توعايعا قاشتىم.
نەگە قاشتىڭ؟
سەنەن ساستىم.
نەگە ساستىڭ؟
ءىزىمدى باستىڭ.
ەندەشە قاشپا.
مىلتىعىڭدى تاستا.
اۋزىڭدى اش تا،
ون ءسوز -
زىت تەز!
(5- ءتۇرى)
قارعا، قارعا، قارعالار،
قاناتىمەن جورعالار،
ەسەنبيكە جەڭگەلەر،
كۇمىس تونىن تۇيمەلەر،
اتوي سالدىم قاباقتا،
مەيىز سالدىم تاباققا.
توقتىشاق ويىنى
(قالاماق)
ءبىرىم - ءبىرىم،
ەكىم - ەكىم،
ءۇشىم - ءۇشىم،
ءتورتىم - ءتورتىم،
بەسىم - بەسىم،
التىم - التىم،
التى مالتام،
التىن بالتام،
سارى الا قاز ساڭقىلداۋىق،
قىرمان تاۋىق قىرقىلداۋىق.
سەن كىر، سەن شىق.
اي كەرەك-اۋ، اي كەرەك،
ايدىڭ باسى دوڭگەلەك.
اق سەرەك پەن كوك سەرەك،
شاۋىپ الدىم بايتەرەك،
سوناۋ تۇرعان بالانىڭ ءوز باسى كەرەك.
اق ساندىق، كوك ساندىق
ەرتەڭ اۋلىم كوشەدى،
ۋىق باۋىن شەشەدى.
الا تايىم وينايدى،
قارا توقتىم قاشادى،
قۇمالاعىن شاشادى.
اق ساندىق، كوك ساندىق،
ارقان تارت، كىلەم ارت!
كىم كەرەك؟
(قالاماق)
-اق سەرەك، كوك سەرەك،
بىزدەن سىزگە كىم كەرەك؟
-اق شاناش، كوك شاناش،
ىشىندە بار كوپ شاناش.
اقباي؛كوكباي؛بورانباي؛
بوتاباي؛ اي، زۋ-ۋ-ۋ...
(جارىسا جونەلەدى)
اق سەرەك، كوك سەرەك
تەم-تەم، تەم ەتكەن،
تەبىنگىدەن تەر وتكەن،
قانجىعادان قان وتكەن،
قاراعاي باسىن قايىرعان،
جاۋدان جىلقى ايىرعان.
جاسىرىنباق
ءبىرىم، ەكىم، تىعىل! بەكىن!
مەن سانايىن: سەن بول دايىن.
سارى شىمشىق، سىرتىلداۋىق.
سەن تۇر، سەن شىق!
كوز قاراسۋ وينى
كوزىم، كوزىم، كوز اينا،
كوزىمدە بار شوڭاينا،
شوڭايناسى كىرەدى،
جۇم كوزىڭدى، ابايلا.
ۇشتى-ۇشتى
ويىندى ءۇي ىشىندە دە، سىرتتا دا ويناي بەرۋگە بولادى. ويىنعا قاتىسۋشىلار باستاۋشىنىڭ ءسوزىن قالت جىبەرمەي باعىپ وتىرۋى شارت. ۇشاتىن زات ايتىلسا، قولدارىن جوعارى كوتەرەدى دە، ۇشپايتىن زات ايتىلسا، تىرپ ەتپەي وتىرادى. قاتەلەسكەن بالا ايىپ تارتىپ، تاقپاق ايتادى نە ءان سالادى. ەكى رەت جاڭىلسا، ايىپ شارتى ۇلعايا تۇسەدى.
باستاۋشى ويىندى بىلايشا جۇرگىزەدى.
ۇشتى-ۇشتى، سۇڭقار ۇشتى! (قول كوتەرىلەدى).
ۇشتى-ۇشتى، تۇلپار ۇشتى! (قول كوتەرىلمەيدى).
ۇشتى-ۇشتى، قارعا ۇشتى! (قول كوتەرىلەدى).
ۇشتى-ۇشتى، اربا ۇشتى! (قول كوتەرىلمەيدى).
ۇشتى-ۇشتى، تارعاق ۇشتى! (قول كوتەرىلەدى).
ۇشتى-ۇشتى، جارعاق ۇشتى! (قول كوتەرىلمەيدى).
ۇشتى-ۇشتى، داۋىل ۇشتى! (قول كوتەرىلەدى).
ۇشتى-ۇشتى، قاۋىن ۇشتى! (قول كوتەرىلمەيدى).
ۇشتى-ۇشتى، ۇيرەك ۇشتى! (قول كوتەرىلەدى).
ۇشتى-ۇشتى، بۇيرەك ۇشتى! (قول كوتەرىلمەيدى).
ۇشتى-ۇشتى، قىران ۇشتى! (قول كوتەرىلەدى).
ۇشتى-ۇشتى، جىلان ۇشتى! (قول كوتەرىلمەيدى).
ۇشتى-ۇشتى، قىزعىش ۇشتى! (قول كوتەرىلەدى).
ۇشتى-ۇشتى سىزعىش ۇشتى! (قول كوتەرىلمەيدى).
ۇشتى-ۇشتى ۇزاق ۇشتى! (قول كوتەرىلەدى).
ۇشتى-ۇشتى تۇزاق ۇشتى! (قول كوتەرىلمەيدى).
وسىلايشا جۇرگىزىلگەن ويىندا جاڭىلىسپاعان ويىنشى جەڭەدى.
شىمبيكە
ويناۋشىلاردىڭ سانى ون ادامنان كەم بولماۋى كەرەك. ويىن باستالماس بۇرىن اراسى بەس مەتردەي ەكى كومبە بەلگىلەنەدى. ءبىرىنشى كومبەدە ويناۋشىلار توپ باسقارۋشىنىڭ ارتىنا قاتارعا تۇرادى، ال ەكىنشى كومبەدە قالاماق ايتىپ بەلگىلەنگەن «جالماۋىز كەمپىر» (اقساق) قاراپ تۇرادى. قاتارداعى ەڭ ءبىرىنشى ويىنشى نەمەسە توپ باسقارۋشى «جالماۋىز كەمپىرگە» قاراپ:
- شىم-شىم شىمبيكە، شىمىلدىعىڭدى قۇر، بيكە، اقساق كەمپىر توڭقىلداق،بۇراما تەمىر سولقىلداق، مىنا سۋدان قايتىپ وتەيىن؟-
دەيدى.
«جالماۋىز كەمپىر»:
- اقساق كەمپىر توڭقىلدايدى، بۇراما تەمىر سولقىلدايدى، كويلەگىڭدى سالىپ ءوت!
مۇنى ەستىگەن ويىنشى العا ءبىر سەكىرەدى دە، تاعى دا:
مىنا سۋدان قايتىپ وتەمىن؟- دەيدى.
تونىڭدى سالىپ ءوت!
ويىنشى تاعى سەكىرەدى. وسىلايشا ءتورتىنشى رەت سەكىرگەندە «جالماۋىز كەمپىر» قولىنان ۇستاپ وتكىزەدى دە:
-نەشە اياق كوجە ىشەسىڭ؟- دەپ سۇرايدى دا وتىرعىزىپ قويادى.
كەلەسى ويىنشى دا وسىلاي وتەدى. ءبارى ءوتىپ بولعان سوڭ، «كەمپىر» نوكەرىنىڭ ءبىرىن شاقىرىپ الىپ:
-ادام بالاسى جالماۋىزدىڭ قولىنا ءتۇستى، جازالايسىڭ،- دەپ بۇيرىق بەرەدى. نوكەر بۇيرىق بويىنشا نەشە اياق كوجە ىشەمىن دەگەن بولسا، سونشا رەت ماڭدايىنان شەرتەدى. ءبارىن جازالاپ بولعان سوڭ «جالماۋىز كەمپىر» رولىن اۋىستىرادى دا، ويىن جالعاسا بەرەدى.
«سەن تۇر، سەن شىق!»
بۇل ويىندى 3-4 بالا وينايدى. ويناۋشى بالالار بارلىق ساۋساقتارىن ستولدىڭ ۇستىنە سالىپ وتىرادى. ويىندى العاش باستايتىن بالا تەك سول جاق قولىن عانا سالادى. وڭ جاق سۇق ساۋساعىمەن ستولداعى ساۋساقتاردى ساناپ شىعادى: ءبىر، ەكى، ءۇش، ءتورت... بۇدان سوڭ ءوزى قالاعان ءبىر ساۋساقتان باستاپ ويىننىڭ سان سوزدەرىن ايتا بەرەدى:
ءبىرىم-ءبىرىم،
ەكىم-ەكىم،
ءۇشىم-ءۇشىم،
ءتورتىم-ءتورتىم،
بەسىم-بەسىم،
التىم-التىم،
اۋىر بالتام،
قالىڭ قالتام.
التاي-سالتاي،
بالاقاي-ولاقاي.
ولپىق،
سولپىق،
سەن بۇك (بۇل ساۋساق ىشكە قاراي بۇگىلەدى).
سەن تۇر (بۇل ساۋساق باسىن كوتەرەدى).
سەن شىق (بۇل ساۋساق الاقانعا قاراي بۇگىلىپ، ساپتان شىعادى).
كەزەكتى تۇرعان ساۋساقتان باستاپ، تاعى دا ءارى قاراي جوعارعى سان سوزدەر قايتالانادى دا، 15- ءسوز: «سەن شىق» دەگەندە، 15- ساۋساق تاعى دا ساپتان شىعادى. ويىننىڭ ماقساتى اركىم ءوز ساۋساقتارىن بۇرىن شىعارىپ اكەتۋ. ەڭ سوڭىندا قالعان ساۋساق يەسى ايىپ تارتادى.
وسى 15 اۋىز سان ءسوز نەشە رەت ايتىلعاندا، «سەن شىق» دەگەن ءسوزدىڭ كىمنىڭ ساۋساعىنا ءدال كەلەتىنىن ەسەپتەپ، بولجاپ وتىرۋعا بولادى. ءۇشىنشى، كەيدە ەكىنشى ساۋساق ويىننىڭ ەڭ ارتىندا قالادى. وندا سول بۇرىنعى كەزەك تارتىبىمەن الگى 15 اۋىز ءسوزدى اينالا قايتالاي بەرەدى.
«بۇك» دەگەندە بۇگىلىپ قالعان ساۋساقتار (ياعني 13- ءسوز كەلگەندە) «قاسقىردان بۇعىپ قالعان تۇلىكتىڭ ءبىرى» دەپ ەسەپتەلىنەدى دە، سول بالانىڭ قۇلاعىنا بىلاي ايقايلايدى. مىسالى:
بۇعىپ قالعان «لاق»،- دەسە:
«شورە-شورە»- دەپ جاۋاپ قايتارادى.
«قۇلىن» دەسە؛
«قۇراۋ-قۇراۋ»؛
«بۇزاۋ» دەسە؛
«اۋكىم-اۋكىم»؛
«قوزى» دەسە؛
«ءپۇشايت-ءپۇشايت»،- دەيدى.
ەڭ سوڭىنداعى بالا ءۇشىن ۇپاي شارتىن ويناۋشىلار وزدەرى كەلىسىپ بەلگىلەيدى.
تاۋقىرايدان
ويناۋشىلار ءبىرىنىڭ قولى ءبىرىنىڭ باسىنا جەتەرلىكتەي مولشەردە دوڭگەلەنىپ وتىرادى. ويىن باستاۋشىدان باسقاسى جالاڭ باس بولۋى كەرەك. ويىن باستاۋشى:
- تاۋقىرايدان-تاۋقىرايدان،- دەپ قايتالاپ ايتا تۇسەدى دە، ءوز باسىنداعى تاقيانى وڭ جاعىنداعى كورشىسىنىڭ باسىنا كيگىزە قويادى. كورشى دە سول. ءسوزدى قايتالاپ، وڭ جاق كورشىسىنە كيگىزەدى. وسىلاي جالعاسىپ كەتە بەرەدى. ءبىر مەزەتتە، ويىن باستاۋشى كوزىن جۇمىپ وتىرادى دا:
تاۋ-تاۋ،- دەپ، باسىن ءوزى قولىمەن باسا قويادى.
تاقيا كىمنىڭ باسىندا قالسا، سوعان ايىپ سالادى.
قۋىر-قۋىر قۋىرماش
وڭ قولدىڭ بەس ساۋساعىن ءبىر جەرگە تۇيىستىرەدى دە، سول قولىمەن ونى بۇركەمەلەپ، ساۋساقتاردىڭ باسىن عانا كورسەتىپ، قاپسىرا ۇستايدى. سودان سوڭ ەكىنشى بالاعا:
ورتان قولىمدى تاپشى،- دەيدى. ەكىنشى بالا قاراپ وتىرادى دا:
مىنە،- دەپ، ءبىر ساۋساقتىڭ باسىنان شىمشىپ ۇستاپ تۇرادى. ەگەر ساۋساقتى ءدال تاپسا، جاسىرعان بالا ايىپ تارتادى، تابا الماسا ىزدەگەن بالا تارتادى. ءبىراق ۇتقان بالا ۇپاي الۋ ءۇشىن مىنا ەرەجەلەردى جاقسى ءبىلۋى كەرەك:
* باس بارماقتان باستاپ، شىناشاققا دەيىن ساۋساقتاردىڭ ءبىر رەت تۇگەل اتىن ايتىپ بەرەدى: باس بارماق، سۇق قول، ورتان قول، اتى جوق قول، شىناشاق.
* بۇدان كەيىن ساۋساقتارعا: باس بارماق، بالالى ۇيرەك، ورتان تەرەك، شىلدىر شۇمەك، كىشكەنە بوبەك،- دەپ تۇگەل ات قويىپ شىعادى. بەس ساۋساق تۇگەل جۇمىلادى.
ەندى قايتادان باس بارماقتان باستاپ مىنا سوزدەردى ايتىپ ساۋساقتاردى جازادى:
سەن تۇر - قويىڭا بار؛
سەن تۇر - تۇيەڭە بار؛
سەن تۇر - جىلقىڭا بار؛
سەن تۇر - سيىرىڭا بار؛
-ال سەن كىشكەنتاي بوبەك، ءالى جاس ەكەنسىڭ، قازاننىڭ قاسپاعىن قىرىپ جە، جىلاماي وتىرا تۇر.
ەندى وسى شىناشاقتىڭ ءوزىن الاقاننىڭ شۇڭقىرىنا بۇگىپ، تۇقىرتا ۇستايدى دا: قۋىر-قۋىر قۋىرماش، بالالارعا ءبيداي شاش، اكەڭ كەلسە، ەسىك اش،قاسقىر كەلسە مىقتاپ باس،- دەپ شىناشاقتى شىر ايلاندىرىپ، بالانىڭ الاقانىن قىتىقتايدى. ولاردى ىستەپ بولا بەرىپ:
-مىنا جەردە قوي بار،- دەپ بالانىڭ بىلەزىگىن تۇرتەدى؛
-مىنا جەردە تۇيە بار،- دەپ، بىلەگىن تۇرتەدى؛
مىنا جەردە جىلقى بار،- دەپ، بىلەكتىڭ جوعارعى جاعىن تۇرتەدى؛
مىنا جەردە تۇلكى بار،- دەپ، قولتىعىنا تامان بارادى دا تەزدەتە تۇسەدى؛
مىنا جەردە كۇلكى بار،- دەپ قىتىقتاي باستايدى.
-قىتىق، قىتىق!
اساۋ ماستەك
ويىنعا بالالار «اساۋ ماستەك» قۇرادى. ول ءۇشىن اراسىن 4-5 قادامداي قاشىقتىقتا ەكى مىقتى قادا قاعادى. كەيدە بۇعان ءوسىپ تۇرعان ەكى اعاشتى دا پايدالانۋعا بولادى. جەردەن 50-70 س م. بيىكتىكتە ەكى قادانىڭ اراسىنا ارقان بايلايدى دا، ونىڭ ۇستىنە ەسكى كورپەشە (شاپان، تون) سالادى. ويىن جۇرگىزۋشى بالالاردى ويىنعا تاقپاق ايتىپ شاقىرادى:
ءاي، ەر ەكەنىڭ بىلەيىن، ەشكى سويىپ بەرەيىن. تاقيا الساڭ ەڭكەيىپ، قۇلاماساڭ تەڭكەيىپ، ەرلىگىڭە سەنەيىن!
ءوزىنىڭ ەپتىلىگىن سىناعىسى كەلگەن ويىنشى:
اساۋ ماستەك بۇل بولسا، ۇيرەتەيىن كورىڭىز، ماعان تاياق بەرىڭىز!-
دەپ، ورتاعا شىعادى. ويىن جۇرگىزۋشى تاياقتى بەرىپ تۇرىپ: ساناي باستايدى:
مىنە، ساعان تاياق،
ۇشكە دەيىن ساناق.
ءبىر...
ەكى...
ءۇش...
ويىنعا شىققان بالا ساناق بىتكەنشە تاياقتىڭ كومەگىمەن ارقاننىڭ ۇستىنە اتشا ءمىنىپ الۋى ءتيىس تە، جەردەن ەڭكەيىپ تاقيا الادى. جەڭىپ شىقسا ويىن جۇرگىزۋشى ايىپتى بولادى دا، جىعىلسا ءوزى ايىپ تارتادى.
ايىپ ولەڭ ايتۋ، ءان سالۋ، نەمەسە قوراز بولىپ شاقىرۋ، تۇيەدەي بوزداۋ، ەشكى سياقتى ماڭىراۋ تۇرىندە بولادى.
«كوگي گوك»
تاقپاق (قالاماق) ايتىپ، ءبىر قىزدى «كەمپىر» ەتىپ سايلايدى. قالعاندارى قاز بولادى. «كەمپىر» شەتكە شىعىپ تۇرادى، باسقا ويىنشىلار قازداي ءتىزىلىپ، ءبىرىنىڭ سوڭىنان ءبىرى ۇستاپ:
گوك، گوك، كوگي گوك، گوك، گوك، كوگي گوك، گوك، گوك، كوگي گوك،-دەپ، قازدىڭ جۇرىسىنە ەلىكتەي اقىرىن وڭ مەن سولعا شايقالىپ «كەمپىردىڭ» قاسىنا كەلەدى. ءبىرىنشى كەلگەن بالاعا «كەمپىر» ينە (ءشوپ، كىشكەنە تاياقشا، شيدىڭ سىنىعى) بەرىپ: «جوعالتپاڭدار!» دەپ تاپسىرادى. بالالار اينالا ءجۇرىپ، قايتادان قازداي ءتىزىلىپ «كەمپىرگە» كەلەدى. «كەمپىر»:
الگىم قايدا؟ الگىم قايدا؟-دەپ سۇرايدى. بالالار ءبارى بىردەي:
الگىڭ قايدا؟- قالدى سايدا!- دەپ جاۋاپ بەرەدى.
- ولاي بولسا، سەندەردىڭ ءبىرىڭدى الىپ قالامىن،- دەپ «كەمپىر» بالالارعا باس سالادى. بالالار تىزبەگىن جازباي قاشا جەنەلۋى كەرەك. قولعا تۇسكەن بىرەۋىن «كەمپىر» قاسىنا الىپ قالا بەرەدى. ويىن بارلىق بالالاردى تۇگەل ۇستاپ بولعانشا قايتا جالعاسا بەرەدى.
