بالالار جىرى
بالا تۋعاندا
قۋانىپ جان جۇرەگىم قاق جارىلىپ،
قاسىرەت باسىمداعى قالدى ارىلىپ.
ۇل كورىپ، ۇلى ءدۇبىر توي جاسايمىن،
اتقان سوڭ ماڭدايىمنان تاڭ جارىلىپ.
بەسىكتى الاستاۋ
الاس، الاس، بالادان الاس،
يەسى كەلدى، پالەسى كوش!
الاس، الاس، بالەدەن الاس،
كوزى جاماننىڭ كوزىنەن الاس!
ءتىلى جاماننىڭ تىلىنەن الاس!
قىرىق قابىرعاسىنان الاس،
وتىز ومىرتقاسىنان الاس!
الاس، الاس، الاسى،
كەلدى، مىنە، بالاسى.
كوش، كوش، پالەسى،
كەلدى، مىنە، ەگەسى.
اتالارىڭ اقىرسا، ودان قورىقپا،
انالارىڭ، اعالارىڭ شاقىرسا، ودان قورىقپا.
ويناقتاعان لاقتان قورىقپا،
سىلدىراعان بۇلاقتان قورىقپا.
تۋلاعان تايدان،
قۋالاعان بوتادان قورىقپا!
ماڭ توبەتتەي ۇيقىلى بول،
تۇلكىنىڭ بالاسىنداي كۇلكىلى بول.
الاس، الاس، الاسى،
كەلدى، مىنە، بالاسى.
ۇيىقتاپ دەم السىن، قۋناپ ويانسىن!
بالانى مايلاپ سىلاعاندا
تاۋ، تاۋ، تاۋ،
سىلاماق مەنەن،
قاتىپ قالماق سەنەن.
مەنىڭ قولىم ەمەس،
ءبيبى فاتيما، ءبيبى زۋحرا قولى،
ۇماي انا، قامبار انا قولى!
تاستاي قىل،
تەمىردەي قىل.
سۇتتەي اق قىل.
دەرت ۇيگە كىرمەسىن،
بالاعا تيمەسىن.
بەسىككە بولەۋ
موينىمداعى تۇمارىم،
تارقامايتىن قۇمارىم.
تاعدىر بەرگەن السىن دەپ،
اق بەسىككە سالسىن دەپ.
موينىمداعى مارجانىم،
قوراداعى مال-جانىم،
بەسىگىڭە جاتا عوي،
ءتاتتى ۇيقىعا باتا عوي!
بالام جاتسىن بەسىككە،
پالەسى قالسىن ەسىكتە.
بەسىكتەن شەشىپ الاردا
اناسى شەشىپ السىن،
ۇيقىسى بەسىكتە قالسىن.
بالام بەسىكتەن شىقسىن،
پالەسى ەسىكتەن شىقسىن.
بالا العاش وتىرعاندا
وتىرسىن، بوپەم، وتىرسىن،
قۇشاعىن گۇلگە تولتىرسىن.
بالانى شاقىرۋ
كەل، كەل، كەلە عوي،
ناسىبايىڭنان بەرە عوي.
مەيىرلەنسىن اتاسى،
ساعان ءتيسىن باتاسى.
كەل، كەل، كەلە عوي،
اتاسىنىڭ بالاسى،
اياق باسقانىن قاراشى.
كەل، كەل، كەلە عوي،
ناسىبايىڭنان بەرە عوي!
كيىم كيگىزگەندە
جاعاسى جايلى بولسىن،
ەتەگى مايلى بولسىن.
كيىمىڭ توزا بەرسىن،
ءومىرىڭ وزا بەرسىن.
تۇساۋ كەسۋ جىرى
قاز-قاز، بالام، قاز، بالام،
قادام باسساڭ ءماز بولام.
كۇرمەۋىڭدى شەشەيىن،
تۇساۋىڭدى كەسەيىن.
قاز-قاز، بالام، قاز، بالام،
تاقىمىڭدى جاز، بالام.
قادامىڭا قارايىق،
باسقانىڭدى سانايىق.
قاز-قاز، بالام، جۇرە عوي،
بالتىرىڭدى تۇرە عوي.
تاي-قۇلىن بوپ شابا عوي،
وزىپ، بايگە الا عوي.
قاز باسا عوي، قاراعىم،
قۇتتى بولسىن قادامىڭ.
ومىرگە اياق باسا بەر،
اسۋلاردان اسا بەر.
جۇگىرە قويشى، قۇلىنىم،
جەلبىرەسىن تۇلىمىڭ،
ەلگەزەك بول، ەرىنبە،
ىلگەرى باس، شەگىنبە.
ءتاي-ءتاي
ءتاي-ءتاي، بالام، ءتاي، بالعىن،
جۇرە قويشى جاي، بالعىن،
قارىس سۇيەم قاز باستىڭ،
قادامىڭنان اينالدىم!
ءوس-ءوس!
(بالدىرعاننىڭ قول-اياعىن سوزۋ)
ءوس-ءوس، بالام، وسە بەر،
باتىر بول - بالۋان بىلەكتى،
باتىل بول - تايماس جۇرەكتى
اياعىڭدى سوزايىق،
ساۋساعىڭدى جازايىق،
ەتتى بولسىن بالتىرىڭ،
ەپتى بوپ ءوس، جارقىنىم.
ءوس-ءوس!
ال بىلەك
ال بىلەك، ال بىلەك،
بالبىراعان بال، بىلەك.
اۋىلىڭ تولى مال، بىلەك،
اتقا توقىم سال، بىلەك.
اتاڭنىڭ ءتىلىن ال، بىلەك،
مال ىشىنە بار، بىلەك.
ال بىلەك، ال بىلەك،
اتاڭ كارى شال، بىلەك.
وتىنعا ءوزىڭ بار، بىلەك،
بوپەشىم
بالام، بالام، بالدايىن،
قايماق بەرىپ الدايىن.
قاراعىم مەنىڭ قانداي-دى؟
موينىنا ساداق بايلايدى.
شاپقان جاۋدىڭ جىلقىسىن
دۇركىرەتىپ ايدايدى.
اينالايىن جايناعىم،
ءسۇت بەتىندەگى قايماعىم.
جانعا داۋا ناز ءۇنىڭ،
ات بايلايتىن قازىعىم!
جىلاما، ءالدي، جىلاما
ءالدي، بوپەم، اق بوپەم،
اق بەسىككە جات، بوپەم.
بىلامىققا ماي قۇيىپ،
توڭكەرمە قىپ بەرەيىن.
جىلاما، ءالدي، جىلاما،
جىلاما، ءالدي، جىلاما.
جىلاما، ءالدي، جىلاما،
جىلاما، ءالدي، جىلاما!
شىلدىر-شىلدىر شىلدىرلاق،
سۋ اعادى سىلدىرلاپ.
بىلدىر-بىلدىر بىلدىرلاق،
نە سويلەيدى بىلدىرلاپ.
جىلاما، ءالدي، جىلاما،
جىلاما، ءالدي، جىلاما.
جىلاما، ءالدي، جىلاما،
جىلاما، ءالدي، جىلاما!
بوپەشىم مەنىڭ ۇعاما؟
قاز-قاز بالام باسارسىڭ،
سۇتكە سۋدى قوسارسىڭ.
تال شىبىقتان ات ءمىنىپ،
بالدىرعان مىلتىق اسارسىڭ.
جىلاما، بالام، جىلاما،
اپاڭدى سەن قيناما!
جۇمىستارىڭ تاۋسىلماي،
تەرلەپ-تەپشىپ جۇرەرسىڭ.
قىزىعىمەن ويىننىڭ
ساقىلداپ سەن دە كۇلەرسىڭ،
ەس توقتاتىپ ءبىر كەزدە،
الدى-ارتىڭدى بىلەرسىڭ.
ءالدي، بالام، ءالدي-اي،
اپاڭ ايتقان ءان-كۇي-اي.
بەسىك جىرىن اپاڭنىڭ
كىشكەنەڭنەن جاتتاي بەر.
قاز-قاز تۇرىپ ومىرگە،
باسىپ تابان اتتاي بەر.
اكەڭ سەنىڭ قۋانسىن،
شەشەڭ سەنىڭ قۋانسىن،
وزىڭە ارناپ بوپەشىم،
تاۋ سۋىنداي سارقىراپ،
تولقىپ اققان جىر السىن.
جەڭىلتەك بولما، بوپەشىم،
سالماقتى بول ەرلەردەي.
جۇگىرە بەرمە دالاڭداپ،
قۇر بەكەرگە ەربەڭدەي.
جىلاما، بالام، جىلاما،
اتاسى ايتقان بۇل ءسوزدى
بوپەشىم مەنىڭ ۇعا ما؟
ءالدي، بالام، ءالدي-اي!
جەتىگە قاشان كەلەسىڭ؟
سۋىن اكەپ شەشەڭنىڭ
ەر جەتكەن سوڭ بەرەرسىڭ.
قۇرىعىن ۇستاپ اكەڭنىڭ،
سوڭىنان سەن دە ەرەرسىڭ.
جىلاما، بالام، جىلاما،
اپاڭدى سەن قيناما!
باتىراق
اي، باتىراق، باتىراق،
كۇنىڭ شىقتى جادىراپ.
ارامىزدا بولماسىن
مولدا مەنەن باي، قۇلاق.
شۇبارىم
استىمدا مەنىڭ شۇبارىم،
جاڭادان تاققان تۇمارىم.
اق بوكەندەي ءدۇرسىلى،
تاۋ تەكەدەي گۇرسىلى.
شاي قايناتىپ بەرەيىن
اپاتايىم باتيما،
باسىڭ اۋىرىپ جاتىر ما؟
شاي قايناتىپ بەرەيىن،
تاڭدايىڭا تاتي ما؟!
تورپاقتى ىزدەۋ
اسقا بارعان اپالار،
الاڭداماي قايتىڭدار.
الدىڭنان تورپاق كورىنسە،
الدىمەن ماعان ايتىڭدار!
تويعا بارعان اپالار،
تويتاڭداماي قايتىڭدار،
توپ سيىردىڭ ىشىندە،
تورپاق بولسا ايتىڭدار!
ەرتەك-ەرتەك ەرتە ەكەن
بار ەكەن دە جوق ەكەن،
اش ەكەن دە توق، ەكەن.
ءبورى بوكەۋىل ەكەن،
تۇلكى جاساۋىل ەكەن،
ەرتەك-ەرتەك، ەرتە ەكەن،
ەشكى ءجۇنى بورتە ەكەن،
قۇيرىعى ونىڭ كەلتە ەكەن.
قىرعاۋىل ءجۇنى قىزىل ەكەن،
قۇيرىق ءجۇنى ۇزىن ەكەن.
مۇزعا تايعان ەكەن،
بۇتى سىنعان ەكەن.
وينار
باسىر، باسىر باس وينار،
ەكى باقسى تاس وينار.
كوبىك قاردا تۇلكى وينار،
كوكتەمەدە جىلقى وينار،
ارىق اتقا قامشى وينار،
جىرتىق ۇيدە تامشى وينار،
كوجە مەنەن تۇز وينار،
ەتىك پەنەن ءبىز وينار...
توڭعاق
«ءىش-شاي!»
كۇننىڭ سۋىعى-اي!
بوز بيەنىڭ قۋىعى-اي!
التى قويدىڭ اسىعى-اي!
التىنبەكتىڭ جاسىعى-اي!
- «اقتۇش!»
- اق سيىردىڭ ءسۇتىن ءىش!
اق سۇت بەرەر ساعان كۇش.
شىم-شىم ءمولدىر سۋعا ءتۇس
تۇماۋ تيسە، قۋا ءتۇس!
كەدەي بالانىڭ زارى
اي، قاسقىر، جەپ قويعانىڭ ءبىزدىڭ شابدار،
اكەڭدى ءولتىردىم بە، مەندە نەڭ بار؟
پاتشانىڭ ەلدى سورعان بايلارىنداي
سەن داعى بولدىڭ با بۇل ءبىزدى تابار؟
بارۋعا ايايسىڭ با باي دەگەنگە،
قايتەدى قۇلىن مەنەن تاي جەگەندە؟
تارتقانىڭ بوزقىراۋدا كارى شاندىر،
جۇرەگىڭ اۋىرا ما ماي جەگەندە؟!
كەتىك
كەتىك-كەتىك كەكشەباي،
تالقانىڭدى ەكشە باي،
تاۋعا بارىپ تارى جە،
تاۋىسپاساڭ، تاعى جە!
كەتىك بالاعا
كەتىك، كەتىك، كەتىگىم،
ماڭداي ءتىسى سەتىگىم.
سۋدان شورتان اسىپ جە،
تۇزدى سۋعا سالىپ جە،
كەتىگىڭدى جالاما،
كەم ءتىسىڭدى ساناما.
تاز بالاعا
تازىم، تازىم تايىرما،
تازدىڭ شاشى جيىرما،
ونىن الىپ، ونىن قوي.
تاز باسىنا شايىن قوي.
تاز باسىڭدى جاسىرىپ،
شاشىڭدى سونشا ءوسىرىپ،
ەمدەتپەگەن سورىڭ عوي.
ءسۇيىمجان
مەنىڭ اتىم - ءسۇيىمجان،
تەنتەكپىن-اۋ قۇيىننان!
جامان تونىم جالپ ەتىپ،
قۇلاپ قالدىم سيىردان!
اسىق-اي
اسىق، اسىق، اسىق-اي،
انام بەرگەن قاسىق-اي!
مەن اتامنىڭ بالاسى،
بايعارانىڭ جاسىعى-اي!
الىسسام ونى جىعامىن،
باسىن قۇمعا تىعامىن،
اجەم بەرگەن كوجەسىن
جەلكەسىنەن سىعامىن!
اسان، جاقسى بالاسىڭ
اسان، جاقسى بالاسىڭ،
ايتقان ءتىلدى الاسىڭ.
ايتقان ءتىلدى الماساڭ،
ارام قاتىپ قالاسىڭ.
«ر»-دى ايتا المايتىن بالاعا
ساقاۋ، ساقاۋ، ساعىندىق،
سەن ساقاۋعا نە قىلدىق.
قاراعايدىڭ بۇتاعى،
قاي ءتىسىڭدى بۇتادى،
«بار» دەگەندى «باي» دەيسىڭ،
«نار» دەگەندى «ناي» دەيسىڭ،
«ر»-دى كىمدەر جۇتادى.
جىلاۋىق
وي، جىلاۋىق، قۇراما،
ويباي سالىپ جىلاما!
تالقان شىلاپ بەرەيىن
تارىنعانىڭ بولا ما؟!
ويناماساڭ، ويىن باق
ويناماساڭ، ويىن باق،
قويشىبايدىڭ قويىن باق!
قارا بيە سويايىن،
قاعىن ساعان قويايىن،
«كەتىك پىشاق بەرەيىن،
كەرتىپ جەسەڭ، كورەيىن!
ەرىنشەكسىڭ، تۇرسىن،
قۇداي توبەڭنەن ءۇرسىن!
... كەلەدى سايمەنەن،
قۇلا قاسقا تايمەنەن.
تايى جۇرمەي قامشىلايد،
كوزىنەن جاسى تامشىلايد!
وتىرىكشى، ورمەكشى،
ءىشىڭ كەۋىپ دوڭبەكشى!
اۋىلىڭ قايدا؟
اۋىلىڭ قايدا؟
اسقار تاۋدا.
قويىڭ قايدا؟
قوشقارتاۋدا.
قويىڭ نە جەيدى؟
جۋسان جەيدى..
كىم ايتار؟
قارق-قارق قارعالار،
قار ۇستىندە جورعالار.
جورعالار دەپ كىم ايتار؟
- اڭ اۋلاعان اڭشى ايتار.
اڭشى ايتار دەپ كىم ايتار؟
مال قايىرعان مالشى ايتار.
مالشى ايتار دەپ كىم ايتار؟
ارقانداۋلى بيە ايتار،
سورتاڭداعى تۇيە ايتار.
تۇيە ايتار دەپ كىم ايتار؟
قۇدىقتاعى باقا ايتار.
باقا ايتار دەپ كىم ايتار؟
باقىلداعان تەكە ايتار.
تەكە ايتار دەپ كىم ايتار؟
جارتاستاعى ەشكى ايتار.
ەشكى ايتار دەپ كىم ايتار؟
تەلى ەمگەن بەستى ايتار.
بەستى ايتار دەپ كىم ايتار؟
سىلدىراپ اققان سۋ ايتار.
سۋ ايتار دەپ كىم ايتار؟
سىبدىراعان كوك ايتار.
كوك ايتار دەپ كىم ايتار؟
كوك وراي شالعىن ءشوپ ايتار.
ءشوپ ايتار دەپ كىم ايتار؟
قىدىرا قىردا جۇگىرگەن،
قىزىل قيىك بالاسى.
جار جاعالاي جۇگىرگەن جاسىل كيىك بالاسى.
كىم كۇشتى؟
ەرتە، ەرتە، ەرتە ەكەن، ەشكى ءجۇنى بورتە ەكەن. قىرعاۋىلى قىزىل ەكەن، قۇيرىق ءجۇنى ۇزىن ەكەن. قىرعاۋىلى قىرقىلداپ، جالتىر مۇزعا سىرتىلداپ، الشايا كەلىپ قونىپتى. شاتى ايرىلىپ قالىپتى. قيسايا جاتىپ قىرعاۋىل سوندا مۇزدان سۇراپتى:
مۇز، مۇز، سەن نەدەن كۇشتى بولدىڭ؟
مەن كۇشتى بولسام، باۋىرىمدى جاڭبىرعا تەستىرمەس ەدىم.
جاڭبىر، جاڭبىر، سەن نەدەن كۇشتى بولدىڭ؟
مەن كۇشتى بولسام، جەرگە جۇتقىزار ما ەدىم.
جەر، جەر، سەن نەدەن كۇشتى بولدىڭ؟
مەن كۇشتى بولسام،
كوك شوپكە باۋىرىمدى جاردىرماس ەدىم.
كوك ءشوپ، كوك ءشوپ، سەن نەدەن كۇشتى بولدىڭ؟
مەن كۇشتى بولسام،
كوك توقتى موينىمنان جۇلقىماس ەدى.
كوك توقتى، كوك توقتى، سەن نەدەن كۇششتى بولدىڭ؟
مەن كۇشتى بولسام،
كوك شۇناققا قۇيرىعىمدى جۇلقىتپاس ەدىم.
قاسقىر، قاسقىر، سەن نەدەن كۇشتى بولدىڭ؟
مەن كۇشتى بولسام،
كوك مىلتىققا قوڭىمدى ويدىرماس ەدىم،
كوك مىلتىق، كوك مىلتىق، سەن نەدەن كۇشتى بولدىڭ؟
مەن كۇشتى بولسام،
قوڭىر شولاق تىشقانعا بىلتەمدى قيدىرماس ەدىم.
تىشقان، تىشقان، سەن نەدەن كۇشتى بولدىڭ؟
مەن كۇشتى بولسام، قۇمىرسقاعا ەن سالدىرماس ەدىم.
قۇمىرسقا، قۇمىرسقا، سەن نەدەن كۇشتى بولدىڭ؟
التى باتپان اۋىردى ارقالاعان كۇشتىمىن.
جەتى باتپان اۋىردى جەلكەلەگەن كۇشتىمىن.
اۋىلىڭ قايدا؟
اۋىلىڭ قايدا؟
اسقار تاۋدا.
قويىڭ قايدا؟
قوشقارتاۋدا.
قويىڭ نە جەيدى؟
جۋسان جەيدى..
مىسىعىم
مىسىعىم-اۋ، مىسىعىم،
كوزى سىعىر قىسىعىم.
مىسىعىمنان اينالدىم،
پىرىلداعان پۇشىعىم،
مىسىعىم-اۋ، مىسىعىم.
سۇراماق
اپام ۇيىنە بارامىن
اپام ۇيىنە بارامىن.
اپاڭ ءۇيى نە بەرەر؟
ەشكى ساۋىپ ءسۇت بەرەر،
لاق سويىپ ەت بەرەر.
ونى قايدا قويامىز؟
تال تۇبىنە قويامىز.
ءيت جەپ كەتسە قايتەمىز؟
باقان الا قۋامىز.
جەتكىزبەسە قايتەمىز؟
جىلاي-جىلاي قالامىز.
باقا
باقا، باقا، بالپاق،
باسىڭ نەگە جالپاق،
كوزىڭ نەدەن توستاق،
بۇتىڭ نەگە تالتاق؟
تەمىر تەلپەك كوپ كيىپ،
باسىم سودان جالپاق.
قىردان قاراۋىل كوپ قاراپ،
كوزىم سودان توستاق.
كوپ كوسىلىپ ۇيىمدە،
بۇتىم سودان تالتاق.
بۇلتقا
اقسىڭ، سۇرسىڭ، قاراسىڭ،
قايدا قالقىپ باراسىڭ؟
جەرگە نوسەر توگەمىن،
ءوسسىن گۇلدەر، كوپ ەگىن!
گۇل-گۇل جايناپ وسەر كوك،
نوسەرلەتسەڭ، نوسەرلەت!
