پاۆلودارلىق وقۋشى Apple كومپانياسىنىڭ جۇلدەسىن جەڭىپ الدى
بۇل جونىندە pavlodarnews.kz رەسۋرسىنا سىلتەمە جاساپ قازاقپارات حابارلايدى.
ءبىلىم ورداسى باسپا ءسوز قىزمەتىنىڭ مالىمەتىنشە، قۋانىشتى حابار وقۋشىنىڭ ەلەكتروندى پوشتاسىنا كەلىپ تۇسكەن. اتالمىش سايىسقا جاس زياتكەر اۋتيزممەن كۇرەسىپ جۇرگەن بالالارعا ارنالعان ءوزىنىڭ ءموبيلدى قوسىمشاسىن ۇسىنعان.
- جارىسقا الەمنىڭ 41 ەلىنەن ميلليونداعان ادامدار ءوتىنىش بەرگەن، - دەيدى ەركەبۇلان.
- وسىعان دەيىن جەڭىمپازدار قاتارىنان تابىلعان قازاقستاندىقتاردىڭ سانى ساۋساقپەن سانارلىق ەكەن. الەمنىڭ ەڭ اۋقاتتى كومپانياسىنىڭ ۇزدىك ينجەنەرلەرىمەن قويان-قولتىق جۇمىس جاساۋ مۇمكىندىگىنە يە بولعانىم مەنى وتە ەرەكشە سەزىمگە بولەيدى. بۇل كىمگە دە بولسىن ارمان دەپ ەسەپتەيمىن. جارىس بارىسىندا الەم بويىنشا ەڭ ۇزدىك 350 قوسىمشا تاڭداپ الىندى.
جەڭىمپاز كومپانيانىڭ ەكسكليۋزيۆتى كۇرتەشەسى مەن Apple Developer Program باعدارلاماسى بويىنشا ءبىر جىل كولەمىندە بارلىق قۇرىلعىلاردى تەگىن پايدالانۋ مۇمكىندىگىنە يە بولدى. وعان قوسا، Apple ينجەنەرلەرىمەن ونلاين «جەكە» كەزدەسۋلەردە ساباق الىپ، شەبەرلىك ساعاتتارىنا قاتىساى.
- مەن اۋتيزممەن كۇرەسىپ جۇرگەن بالالارعا ارنالعان قوسىمشانى جاساپ شىعاردىم. بۇل باعدارلاما ارقىلى ادامداردىڭ ەموتسياسىن انىقتاۋ الدەقايدا وڭاي بولادى. سونىمەن قوسا، ينتەرفەيس تولىقتاي بالالارعا قولايلى ەتىپ جاسالىندى. تاعى ءبىر ەرەكشەلىگى، 2019-جىلعى پرەزەنتاتسياداعى وزىق تەحنولوگيالار وسى قوسىمشادا قولدانىلدى، - دەيدى وقۋشى.
جەڭىمپازدار جىل سايىن الەمنىڭ ەڭ ۇزدىك ازىرلەۋشىلەرىن ءبىر ارناعا توعىستىراتىن WWDC كونفەرەنتسياسىنا قاتىسا الادى. بيىل 22- ماۋسىمدا باستالاتىن اۋقىمدى شارا 31-رەت ۇيىمداستىرىلىپ وتىر. ادەتتە ءداستۇرلى دودا جەڭىمپازدارى كاليفورنياداعى Apple Park عيماراتىندا تورتكۇل دۇنيە كوز تىككەن WWDC پرەزەنتاتسياسىنا قاتىسىپ، كەيىننەن ءبىر اپتا بويى Apple كومپانياسىنىڭ باس ديرەكتورى تيم كۋكپەن كەزدەسىپ، ەڭ مىقتى ينجەنەرلەردەن ساباق الاتىن.
الايدا وسى جىلى COVID-19 پاندەمياcىنا بايلانىستى ۇيىمداستىرۋشىلار بارلىق ءىس-شارالارىن ونلاين فورماتتا وتكىزەدى. ميلليونداعان ازىرلەۋشى iOS، iPadOS، macOS، watchOS جانە tvOS بولاشاق نۇسقالارىنا قول جەتكىزە الادى. سونداي-اق بۇكىل الەم بويىنشا Apple پايدالانۋشىلارىنىڭ ءومىرىن جاقسارتاتىن قوسىمشالاردى جاسايتىن Apple ينجەنەرلەرىمەن قاشىقتىقتان وتكەن كەزدەسۋدە بىلىمدەرىن ارتتىرادى.