Alibaba پلاتفورماسىنا شىعاتىن قازاقستاندىق كومپانيا سانى جۇزگە جەتتى

نۇر- سۇلتان. قازاقپارات - ەلىمىزدەگى وندىرۋشىلەر Alibaba پلاتفورماسى ارقىلى 45 ميلليون دوللارعا ەكسپورتتىق كەلىسىم- شارت جاسادى. ونلاين دۇكەنگە بىلتىر 100-گە تارتا وتاندىق وندىرىستىك كاسىپورىن ورنالاسقان.

ولار 4 مىڭنان اسا تاۋار ءتۇرىن ساتىپتى. قازاقستاندىق ماكارون ونىمدەرى، ۇن، بال، تاتتىلەر مەن ەت، سۋسىندار جانە وسىمدىك مايلارى، جيھاز، كيىم- كەشەكتەر قىتاي، ماكەدونيا، بىرىككەن اراب امىرلىكتەرى، ومان، ەۋرازيالىق ەكونوميكالىق وداق ەلدەرى مەن ورتالىق ازيا تۇتىنۋشىلارى اراسىندا سۇرانىسقا يە.

قازىر ەكسپورتتاۋشىلارىمىز وڭتۇستىك- شىعىس ازيا، تاياۋ شىعىس ەلدەرىمەن كەلىسسوزدەر جۇرگىزىپ جاتىر. ولار ازىرگە قازاقستاندىق تاماق ونىمدەرىن الىپ وتىر، ال بولاشاقتا سۇزگى، توقىما، ەلەكترلى تەحنيكا سياقتى تاۋار تۇرلەرىن تۇتىنساق دەگەن نيەتىن بىلدىرگەن.

ەسكە سالايىن، بيىل تاعى وتاندىق 50 كومپانيا Alibaba حالىقارالىق ساۋدا پلاتفورماسىنا شىعاتىن بولادى.

www.24.kz